Ermənistanda hökumətin istefası hakimiyyət böhranı yarada bilər

Bakı:

24 °C

69 %

4 m/s

Əlaqə

AZ RU EN

Ana səhifə / Dünya / Ermənistanda hökumətin istefası hakimiyyət böhranı yarada bilər

Ermənistanda hökumətin istefası hakimiyyət böhranı yarada bilər

27.04.2021 [08:25]

Məğlub Ermənistanda aylardır davam edən siyasi xoas növbədənkənar seçkilərlə bağlı hakimiyyətin atdığı növbəti addımdan sonra yeni mərhələyə qədəm qoyub. Yerli medianın yazdığına görə, 3 partiya arasında razılaşmada nəzərdə tutulduğu kimi, 20 iyunda parlament seçkilərinin keçirilməsinin yolunu açmaq üçün Nikol Paşinyan və hökumətinin 25 apreldə istefa verməsi yeni situasiya yaradıb. Belə ki, bəzi müxalifətçilər və siyasi qüvvələr mövcud parlamentin üzvlərini yaranmış vəziyyətdən istifadə edərək yeni baş nazir seçməyə çağırırlar. Ekspertlərin fikrincə, yaranmış boşluq hakimiyyət böhranı baş verməsinə şərait yarada bilər. Qeyd edək ki, artıq prezident Armen Sarkisyan baş nazir Paşinyan və hökumətinin istefasını qəbul edib. Lakin Paşinyan elan edib ki, o, seçkilərə qədər müvəqqəti olaraq baş nazir vəzifəsini davam etdirəcək. Ancaq bəzi mütəxəssislər Paşinyanın istefadan sonra baş nazir vəzifəsini icra etməsini qanunsuz hesab edirlər. “Panorama.am” yazır ki, erməni vəkil Tiqran Atanesyan bildirib ki, könüllü istefasından sonra Paşinyan hökumət başçısı kimi fəaliyyət göstərə bilməz: “Baş nazirin istefasından sonra müavinlərindən biri onun vəzifəsini icra etməlidir”.
Onun sözlərinə görə, hazırda Ermənistanın cinayət məcəlləsinin 300-cü maddəsinin 2-ci hissəsinə (hakimiyyəti qəsbetmə) əsasən, cinayət faktı mövcuddur. Yeri gəlmişkən, onu da xatırladaq ki, ölkə qanunvericiliyinə görə, baş nazirin istefasından sonra parlamentin fraksiyaları yeddi gün ərzində namizəd irəli sürmək hüququna malikdir. Mövcud konstitusiyaya görə, növbədənkənar seçkilər yalnız baş nazirin istefası, iki dəfə yeni baş nazirin seçilməməsi və parlamentin buraxılması halında mümkündür. Yaranmış fürsəti dəyərləndirən Paşinyanın əleyhdarları parlament üzvlərini yeni baş nazir seçməklə hakimiyyət dəyişikliyini həyata keçirməyə çağırırlar.
Belə ki, ölkənin Vatikandakı keçmiş səfiri Mikael Minasyan parlamentdə fraksiyaları olan “Çiçəklənən Ermənistan” və “Maariflənən Ermənistan” partiyalarının deputatlarını baş nazir postuna namizəd irəli sürməyə çağırıb. Onun sözlərinə görə, yalnız bu addımla həmin partiyalar əsl müxalifət olduqlarını sübut edə bilərlər. Bu barədə məlumat verən “News.am”ın yazdığına görə, eyni mövqedən çıxış edən Ermənistanın keçmiş baş naziri Hrant Baqratyan deyib ki, müxalifət partiyaları baş nazir postuna namizəd irəli sürməsələr, “hökumətin oyuncağı” olduqlarını təsdiq edəcəklər.
Bütün ittihamların və nəzərlərin tuşlandığı parlamentdəki müxalifət partiyalarına gəlincə, “Maariflənən Ermənistan” elan edib ki, Paşinyanla razılaşmanı pozmayacaq. “Sputnik-Ermənistan” xəbər verir ki, partiyanın lideri Edmon Marukyanın sözlərinə görə, partiya növbədənkənar seçkiləri daxili siyasi böhrandan çıxış yolu hesab edir və parlamentin buraxılmasına mane olmayacaq: “Bu səbəbdən baş nazir postuna namizəd irəli sürməyəcəyik və heç kimin namizədliyini dəstəkləməyəcəyik”.
Göründüyü kimi, Paşinyanın əleyhdarları parlamenti hökuməti kənarlaşdırmaq üçün yaranmış fürsətdən istifadəyə çağırır. Bu ehtimal baş tutsa, Ermənistanda hökm sürən siyasi qarşdurma fonunda yeni hakimiyyət böhranı qaçılmazdır.
Qaşqay ZİYƏDDİNOĞLU

Paylaş:

Baxılıb: 882 dəfə