Seçki məcəlləsinə dəyişikliklər təklifi Ermənistanda gərginliyi daha da artırıb

Bakı:

16 °C

88 %

5 m/s

Əlaqə

AZ RU EN

Ana səhifə / Dünya / Seçki məcəlləsinə dəyişikliklər təklifi Ermənistanda gərginliyi daha da artırıb

Seçki məcəlləsinə dəyişikliklər təklifi Ermənistanda gərginliyi daha da artırıb

02.04.2021 [22:10]

Ermənistanda aylardır davam edən siyasi böhran seçkiqabağı dövrdə daha da dərinləşib. Yerli mətbuatın yazdığına görə, hakimiyyətin qanunvericilik təşəbbüsü ilə seçki məcəlləsinə dəyişikliklər məsələsinin Ermənistan parlamentində müzakirəyə çıxarılması parlamentdaxili qüvvələr arasında qarşıdurmaya səbəb olub. Belə ki, məsələnin müzakirəsi zamanı müxalifəti təmsil edən deputatlar iclas zalını tərk ediblər. Qeyd edək ki, mərkəzi seçki komissiyası da seçki məcəlləsinə (SM) dəyişikliklərə qarşı çıxıb.

Buna baxmayaraq, “News.am”ın yazdığına görə, Ermənistan parlamenti artıq seçki məcəlləsinə edilən dəyişiklikləri təsdiqləyib. “Çiçəklənən Ermənistan” və “Maariflənən Ermənistan” fraksiyalarının deputatları həm müzakirəni, həm də səsvermə prosesini boykot etsələr belə, qanunvericilik təşəbbüsü 82 deputat tərəfindən yekdilliklə dəstəklənib. Beləliklə, hakim “Mənim addımım” bloku bir neçə bitərəf deputatın dəstəyi ilə düzəlişləri həyata keçirməyə nail olub. Nəticədə “reytinq seçki sistemi” və pandemiya dövründə seçkilərin keçirilməməsi ilə bağlı bənd ləğv edilib. Qeyd edək ki, dəyişikliklərə görə, proporsional seçki sistemi də bərpa edilib. Bundan əlavə, partiyalar və birliklər üçün yeni keçid həddi müəyyən edilib.

Hakimiyyətin “reytinq sistemi”ndən imtina təşəbbüsü ilə bağlı “Armenia today”ə açıqlama verən “Maariflənən Ermənistan” partiyasının sədri Edmon Marukyan hakim fraksiyanın tərkibinin legitim olmadığını vurğulayıb: “Çünki bu fraksiyanın bütün üzvləri özlərinin seçildiyi sistemi tənqid edirlər”.

Marukyan onu da əlavə edib ki, Ermənistanda gözlənilən parlament seçkilərinin legitimliyi də indidən şübhə altındadır: “Müxalifət qüvvələrinin boykot etdiyi halda hakim siyasi çoxluq seçki məcəlləsinə dəyişiklikləri qəbul edib. Bununla da 20 iyun növbədənkənar parlament seçkiləri şübhə altına alınıb. Hakim fraksiya qəbul etdiyi dəyişikliklərlə öz “siyasi məzarı”nı qazır. Bu, sizin sonunuz olacaq”.

Yerli medianın yazdığına görə, parlamentdəki böhrana baxmayaraq, bəzi partiyalar seçkiqabağı qərargahlarını yaratmaqda davam edirlər. Məsələn, elə “Maariflənən Ermənistan” partiyasının seçkiqabağı qərargahına David Xacakyanın rəhbərlik edəcəyi elan edilib. Partiya sədri E.Marukyan isə deyib ki, partiya Paşinyan və Koçaryanla koalisiyaya getmək variantını istisna edir: “İndiki baş nazirin və hər hansı keçmiş rəhbərin hökumətin başçısı olmasına imkan verməməliyik”.

Bu arada “Mənim addımım” blokunun siyahısının necə tərtib olunacağı da bilinib. Belə ki, “Hraparak” qəzeti hakim komandanın seçki siyahısının formalaşmasına dair bəzi təfərrüatları təqdim edib. Qəzetin iddiasına görə, “Mənim addımım” blokunun seçki siyahısı baş nazir tərəfindən formalaşdırılacaq: “Paşinyanın parlamentin sədri Ararat Mirzoyandan narazılığına baxmayaraq böyük ehtimalla siyahıda ikinci yeri indiki spiker tutacaq. Vitse-spiker Lena Nazaryan və fraksiya rəhbəri Lilit Makunts siyahıda qadınlar arasında birincilik uğrunda mübarizə aparırlar”.

Beləliklə, demək olar ki, məğlub Ermənistanda siyasi böhran indi də parlamentdə və hakim komandanın daxilində davam edir. Hakimiyyətin seçki məcəlləsinə dəyişikliklər təklifinin müxalifətin boykotu və kəskin etirazı ilə müşayiət edilməsi də bunu sübut edir.

Qaşqay ZİYƏDDİNOĞLU

Paylaş:

Baxılıb: 791 dəfə