Ermənistanda siyasi xaos dərinləşir

Bakı:

20 °C

60 %

2 m/s

Əlaqə

AZ RU EN

Ana səhifə / Dünya / Ermənistanda siyasi xaos dərinləşir

Ermənistanda siyasi xaos dərinləşir

03.02.2021 [08:57]

Müharibədə ağır məğlubiyyətə düçar olan Ermənistanda daxili siyasi böhran özünün növbəti mərhələsinə qədəm qoyub. Belə ki, müxalif siyasi qüvvələrin birləşdiyi “Vətənin xilası naminə hərəkat” hökumətin istefası tələbi ilə aksiyalarını yeni formada davam etdirir, hakim komanda daxilində isə istefa dalğası səngimək bilmir. Baş nazir Nikol Paşinyanın mövcud vəziyyətdə atdığı addımlar isə, onsuz da, ölkədə hökm sürən qeyri-müəyyənliyi daha da artırır.
Ermənistan mediasının verdiyi məlumata görə, yeni ildən Paşinyana qarşı mübarizədə taktikanı dəyişən 17 müxalifət partiyasının birləşdiyi “Vətənin xilası naminə hərəkat”ın təmsilçiləri regionlarda fəal iş aparırlar. “Panorama.am” yazır ki, hərəkatın əsas üzvlərindən hesab edilən “Hayrenik” (“Vətən”) partiyası da bölgələrdə görüşlərini davam etdirir. Belə ki, partiyanın mətbuat katibi Sos Hakopyanın sözlərinə görə, bu günlərdə Qeqarkunik və Kotayk vilayətlərində partiyanın regional ofislərində görüşlər keçiriblər. Görüşlər zamanı müxalifətin 18 fevral mitinqinə yerli strukturların daha fəal hazırlaşması və itaətsizlik aksiyalarının əhatə dairəsinin genişləndirilməsi məsələləri müzakirə olunub.
Yeri gəlmişkən, hakim komandanı yeni istefa dalğası təhlükəsi təhdid edir. Belə ki, Paşinyanın ən yaxın silahdaşlarından olan parlament sədrinin müavini Lena Nazaryanın əri, Dövlət əmlakının idarə edilməsi komitəsinin sədri Narek Babayan istefa verib. “Hraparak.am”ın yazdığına görə, bu qərarın səbəbi onun Ərazi idarəetmə və infrastruktur naziri Suren Papikyanla gərgin münasibətləri olub. Deyilənə görə, S.Papikyan vitse-spikerin həyat yoldaşı Babayanın baş nazir Paşinyanla birbaşa təmasını qadağan edibmiş.
Ən maraqlısı isə odur ki, Babayanın yerinə Paşinyanın etdiyi təyinat daha böyük hay-küyə səbəb olub. Belə ki, bu yüksək vəzifə Ararat (Vedi) vilayətinin keçmiş qubernatoru Qarik Sarkisyana həvalə olunub. Xatırladaq ki, Q.Sarkisyan qubernator olduğu zaman gülünc bəyanatları ilə dəfələrlə qalmaqalların mərkəzində olub. “News.am” yazır ki, Q.Sarkisyan qubernator işləyəndə Araratda damcı sistemi ilə suvarılan 40 min hektar əraziyə malik olması, timsah yetişdirmək üçün ferma açması, hətta xaricdən timsah yumurtaları gətirməsi barədə iddialarla üzləşmişdi. Q.Sarkisyan bu iddiaları təkzib etmək əvəzinə timsah yumurtalarını quş yumurtası adı ilə gömrükdən keçirərək gətirməsi və timsahların mənşəyi haqqında açıqlamalar verməklə özünü pis vəziyyətə salmışdı.
Qeyd edək ki, məğlub ölkədə qalmaqallar təkcə bununla bitmir. Ötən il mətbuatda dəfələrlə adı hallanan erməni “silah baronu” David Qalstyan həbs olunub. Xatırladaq ki, 2020-ci ilin iyulunda eks-prezident S.Sarkisyanın kürəkəni M.Minasyan Paşinyan hakimiyyətinin qanunsuz silah ticarətinə qurşanmasından bəhs edəndə Ermənistan Respublikası adından D.Qalstyana silah sövdələşmələrini həyata keçirmək hüququ verildiyini iddia etmişdi.
Göründüyü kimi, uzun müddətdir ki, siyasi, sosial-iqtisadi böhran dövrünü yaşayan məğlub Ermənistan artıq yeni qalmaqallarla çalxalanır. Ekspertlərin fikrincə, komandasında yeni istefa dalğasının başlamasından sonra Paşinyanın anlaşılmaz kadr siyasəti vəziyyəti daha gərgin məcraya yönəldir.
Qaşqay ZİYƏDDİNOĞLU

Paylaş:

Baxılıb: 1017 dəfə