Ermənistanda yeni repressiya dalğası...

Bakı:

26 °C

49 %

2 m/s

Əlaqə

AZ RU EN

Ana səhifə / Dünya / Ermənistanda yeni repressiya dalğası...

Ermənistanda yeni repressiya dalğası...

19.12.2020 [00:10]

Ağılsız diktator Paşinyan çıxış yolunu müxaliflərə və etirazçılara qarşı güc tətbiqində görür

Məlum olduğu kimi, 44 gün davam edən müharibədə Azərbaycanın qarşısında məğlub olan təcavüzkar Ermənistanda daxili siyasi böhran və qarşıdurma vəziyyəti davam edir. Belə ki, müxalif siyasi qüvvələrin birləşdiyi “Vətənin xilası naminə hərəkat”ın çağırışı ilə Ermənistanın bütün vilayətlərində vətəndaş itaətsizliyi aksiyaları keçirilir. Gələn həftədən isə ölkədə tətillər başlayacaq. Daxildə və diaspor tərəfindən hökumətin istefası tələb olunsa, həmçinin komanda daxilində istefa dalğası davam etsə də, baş nazir Nikol Paşinyan geri çəkilmək istəmir.

Ermənistan mətbuatının yazdığına görə, Yerevanın mərkəzində hər gün “Nikolsuz Ermənistan” şüarı ilə yürüş-mitinq təşkil edilir. “News.am” yazır ki, paytaxtdakı Fransa meydanında keçirilən növbəti mitinqdə çıxış edən “Daşnaktsutyun”un üzvü Geqam Manukyan hökumətin istefasını tələb edən vətəndaşların sıralarının gündən-günə genişləndiyini, lakin baş naziri devirmək üçün bütün ermənilərin ayağa qalxmasının vacibliyini bildirib.

Qeyd edək ki, “Vətənin xilası naminə hərəkat”ın Yerevanda baş tutan növbəti yürüşünün iştirakçıları ölkənin baş prokurorundan Ermənistanın baş naziri N.Paşinyanın “dövlətə xəyanət” maddəsi ilə həbs olunmasını tələb ediblər. “Aysor.am” yazır ki, prokurorluq binası qarşısında aksiya keçirən etirazçılar baş prokuror Artur Davtyana bu barədə müraciət təqdim ediblər. Sonda etirazçılar prokurorluqdan Paşinyana qarşı həbs qətimkan tədbiri seçilməsini tələb ediblər.

Bu arada, hakim “Mənim addımım” blokunda istefalar davam edir. “News.am” yazır ki, Yerevan bələdiyyəsinin üzvü, Ermənistan baş naziri aparatının keçmiş rəhbəri Gevork Acemyan “Mənim addımım” blokunun fraksiyasından çıxdığını elan edib. “Aysor.am” yazır ki, Lori vilayətinin qubernatoru Andrey Qukasyan da vəzifəsindən istefa verib.

Qeyd edək ki, N.Paşinyan isə hakimiyyətini qorumaq üçün müxtəlif yollara baş vurur. “Joğovurd” qəzeti etibarlı mənbələrinə istinadən yazır ki, yaxın günlərdə kütləvi həbslər gözlənilir: “Səbəb müxalifətin mübarizəsini gündən-günə gücləndirməsidir. Müxalifətin yürüş və mitinqlərlə kifayətlənməyəcəyini, əlavə olaraq tətil və digər aksiyalara da baş vuracağını bəyan etməsindən sonra hakimiyyət təşvişə düşüb”.

Qəzetin yazdığına görə, çərşənbə axşamı bütün müəssisə və universitetlərdə ümumi tətil, kütləvi itaətsizlik aksiyaları elan edilməsi taktikasından narahat olan hakimiyyət hüquq-mühafizə orqanları rəhbərlərinə müxalifət liderləri səviyyəsində həbslər həyata keçirməyi tapşırıb.

Beləliklə, siyasi rəqiblərinə qarşı yeni repressiya dalğası ilə kreslosunu qorumağa çalışan baş nazir müqavimət göstərir. Daha dəqiq desək, “demokrat” imicinə bürünmüş ağılsız diktator Paşinyan çıxış yolunu müxaliflərə və etirazçılara qarşı güc tətbiqində görür.

Q.ZİYƏDDİNOĞLU

Paylaş:

Baxılıb: 800 dəfə