Paşinyan hakimiyyətinin ömrünü uzatmaq üçün siyasi repressiya həyata keçirir

Bakı:

25 °C

64 %

4 m/s

Əlaqə

AZ RU EN

Ana səhifə / Dünya / Paşinyan hakimiyyətinin ömrünü uzatmaq üçün siyasi repressiya həyata keçirir

Paşinyan hakimiyyətinin ömrünü uzatmaq üçün siyasi repressiya həyata keçirir

18.06.2020 [08:44]

Mövcud siyasi böhran şəraitində Ermənistanda baş verən qanunsuz hallara reaksiya vermək əvəzinə, ikili standartlardan çıxış edən bəzi beynəlxalq təşkilatlar isə susmağı üstün tuturlar
Məlum olduğu kimi, iyunun 16-da “Çiçəklənən Ermənistan” partiyasının sədri, Ermənistan parlamentindəki eyniadlı fraksiyanın lideri Qaqik Çarukyanın deputat toxunulmazlığı parlament tərəfindən ləğv edilib. Eyni zamanda, Q.Çarukyan ölkənin Təhlükəsizlik Xidməti (TX) tərəfindən ifadə vermək üçün istintaqa cəlb edilib. Hadisələrin gedişi göstərir ki, partiya sədrinin həbs ediləcəyi istisna deyil. Q.Çarukyanın məhz Paşinyan hakimiyyətini tənqid etməsindən sonra təzyiqlərə məruz qalması baş verənlərin siyasi təqib olduğunu sübut edir.
Yeri gəlmişkən, Q.Çarukyanla bağlı son hadisələr fonunda “azadlıq carçısı” olan bəzi beynəlxalq qurumların, bir sıra Qərb təşkilatlarının işğalçı ölkədə baş verənlərə seyrçi qalması haqlı suallar doğurur. Məsələ burasındadır ki, Q.Çarukyanın tərəfdarlarının TX-nin və Ermənistan parlamentinin binaları önündə etiraz aksiyalarına cəhdlərinin qarşısı ölkənin hüququ-mühafizə orqanları tərəfindən kobud şəkildə alınıb və yüzlərlə adam saxlanılıb. Hətta polis işçiləri aksiyanı işıqlandıran jurnalistlərə qarşı da güc tətbiq ediblər. “Çiçəklənən Ermənistan” Partiyasından olan deputat Naira Zöhrabyan hüquq-mühafizə orqanları əməkdaşlarının hərəkətlərini “siyasi repressiya” kimi qiymətləndirib. O, həmçinin qeyd edib ki, beynəlxalq təşkilatlara və səfirliklərə hakimiyyətin qanunsuz hərəkətləri barədə məlumat verilib. Lakin beynəlxalq təşkilatların Ermənistandakı nümayəndəliklərinin ofisləri qarşısında piketlər keçirilsə də, baş verənlərə beynəlxalq qurumlar tərəfindən ciddi reaksiya gəlməyib. Halbuki hadisələr zamanı insanların söz və ifadə azadlığı, sərbəst toplaşma hüququ, hüquq-mühafizə orqanları tərəfindən lüzumsuz yerə güc tətbiqi, KİV əməkdaşlarının fəaliyyətinə maneçilik yaradılması və s. kimi Qərbin həssas yanaşdığı dəyərlərin pozulması müşahidə olunub. Buna baxmayaraq, nədənsə Qərb sükutunu pozmur. ABŞ Dövlət Departamenti, Avropa Şurası Parlament Assambleyası (AŞPA), ATƏT-in Media Azadlığı üzrə nümayəndəsi, ABŞ-ın Ermənistandakı səfiri, Qərb dövlətlərinin ölkədəki səfiri və nümayəndələri özlərini elə aparırlar ki, sanki heç nə baş verməyib.
Yeri gəlmişkən, onu da qeyd edək ki, bu, işğalçı ölkədə baş verən və Qərbin seyrçi qaldığı ilk hadisə deyil. Ötən il müxalif siyasətçi və jurnalist Mher Yeqizaryan həbsxanada aclıq elan etdikdən sonra ölməsi zamanı da Qərb təkilatları heç bir reaksiya verməyiblər. Ümumiyyətlə, N.Paşinyan hakimiyyətə gəldikdən sonra ölkənin tanınmış siyasi və ictimai xadimlərini zərərsizləşdirməsi heç kimə sirr deyil. Baş nazir öz siyasi rəqiblərini bir-bir həbsə atdırır. Bununla yanaşı, Paşinyan tərəfindən indiyədək Ermənistanın keçmiş rəhbərliyinə qarşı silsilə cinayət işləri açılıb və hazırda istintaq davam edir. Paşinyanın özünə rəqib hesab etdiyi və ya gələcəkdə rəqib olmaq ehtimalı olan istənilən şəxsi korrupsiya ilə mübarizə ittihamı ilə həbs etdirməsi və bunu Qərbin sükutla qarşılaması onun əl-qolunu daha da açır. Buna görə N.Paşinyan şəxsən güc strukturlarına onu tənqid edənləri müxtəlif təzyiqlərə məruz qoymağı və cinayət məsuliyyətinə cəlb etməyi tapşırır.
Qeyd edək ki, son hadisələrdən sonra Ermənistanda N.Paşinyanı diktator hesab edənlərin sayı artır. Təsadüfi edyil ki, bəzi ekspertlər mediaya açıqlamalarında artıq Ermənistanda “totalitar inqilabi diktatura”nın mövcud olduğunu söyləyirlər.
Beləliklə, hazırda Ermənistanda təkcə pandemiya böhranı deyil, həm də siyasi böhran da yaşanır. Buna görə də öz hakimiyyətinin müddətini uzatmaq üçün N.Paşinyan ölkədə siyasi repressiya həyata keçirir.
Burada maraqlı məqam odur ki, azərbaycanofobiyadan ilhamlanan bəzi beynəlxalq təşkilatlar ölkəmizdə ən kiçik məsələyə belə reaksiya verdikləri halda, Ermənistanda baş verən qanunsuzluqlara görə bir dəfə də olsun ölkə hakimiyyətini ittiham etməyiblər. Bu da həmin beynəlxalq təşkilatların ikili standartlardan çıxış etdiklərini bir daha sübuta yetirir. Bu halda Qərb “demokratiya”sının əsl mahiyyətinin nədən ibarət olduğunu əyani olaraq görmək mümkündür.
Qaşqay ZİYƏDDİNOĞLU

Paylaş:

Baxılıb: 695 dəfə