Paşinyan mürəkkəb situasiya qarşısında: o, yeganə müttəfiqini də itirə bilər

Bakı:

19 °C

77 %

3 m/s

Əlaqə

AZ RU EN

Ana səhifə / Dünya / Paşinyan mürəkkəb situasiya qarşısında: o, yeganə müttəfiqini də itirə bilər

Paşinyan mürəkkəb situasiya qarşısında: o, yeganə müttəfiqini də itirə bilər

14.03.2020 [10:32]

Ermənistanın baş naziri Nikol Paşinyan bu ölkə konstitusiyasının cəmi 1 maddəsini dəyişdirmək üçün ümumxalq səsverməsinə hazırlaşır. Aprelin 5-ə təyin edilən referendumun təxirə salınması, heç olmasa, təşviqat aksiyalarının ləğv edilməsinə çağırışlar səslənsə də, N.Paşinyan niyyətindən əl çəkmək istəmir.
Paşinyanın referendum keçirmək cəhdinə qarşı etirazlar müxtəlif cəbhələrdən gəlir. “Aysor.am” saytının yazdığına görə, “Politekonomiya” Tədqiqatları İnstitutunun direktoru Andranik Tevanyan buna görə baş nazir N.Paşinyanı sərt tənqid edib. Onun sözlərinə görə, mövcud hakimiyyət öz referendumu ilə koronavirusun yayılmasının ən böyük mənbəyinə çevrilib. A.Tevanyan qeyd edib ki, bütün dünyada kütləvi tədbirlərin keçirilməsinə qadağa qoyulduğu halda, Ermənistan hakimiyyəti referenduma təşviqat naminə insanları bir yerə toplayır və bu addımla, əslində, koronavirusun yayılmasını təşviq edir. Onun sözlərinə görə, ölkədə mövcud olan iqtisadi və digər problemlərə məhəl qoymayan Paşinyan hakimiyyəti 7 nəfərin işdən çıxarılması və daha 7 nəfərin işlə təmin olunması ilə əlaqəli olan bir məsələni siyasi problemə çevirib.
“Hraparak” qəzeti isə yazır ki, təkcə N.Paşinyanın inadkarlığı yox, həm də təşviqat materialı kimi çap olunan “Referendum bəyannaməsi” Ermənistanda narazılıq yaradıb. Belə ki, Paşinyanın yeganə himayədarı və müttəfiqi olan Levon Ter-Petrosyanın rəhbərlik etdiyi “Erməni Milli Konqresi” (EMK) partiyasında həmin sənəddə yer alan bəzi müddəalara görə əsəblər tarıma çəkilib. Qəzetin yazdığına görə, çox güman ki, partiya liderinin təkidi ilə fəallar referendumdan sonra, aprelin 6-da Paşinyan iqtidarına qarşı güclü etiraza başlayacaqlar. Nəşr yazır ki, EMK-də “yox” düşərgəsində yer almamaq üçün hələlik bəyannaməyə münasibət bildirməmək barədə qərar qəbul edilib.
EMK-dəki mənbələrə istinadən qəzetin yazdığına görə, partiya rəhbərliyi bu sənədə görə həddən artıq qəzəblidir. Ona görə ki, L.Ter-Petrosyan dövründə seçkiləri saxtalaşdırması ilə bağlı N.Paşinyanın açıqlamaları müəyyən qədər həzm olunsa da, bu sənəddə Ter-Petrosyan hakimiyyətinin “Robert-Serj cinayətkar rejimi” ilə bərabər səviyyədə tutulması artıq “bağışlanmaz səhv” hesab olunur. Nəşr xatırladır ki, sözügedən bəyannamənin mətnində belə bir müddəa var: “1995-ci ildən 2018-ci ildəki son seçkilərə qədər keçirilən hər hansı bir ümumrespublika seçkilərinin rəsmi nəticələri xalqın azad iradəsini əks etdirməyib”.

Paylaş:

Baxılıb: 984 dəfə