Nikol Paşinyan Ermənistanı fəlakətə sürükləyir

Bakı:

17 °C

82 %

5 m/s

Əlaqə

AZ RU EN

Ana səhifə / Dünya / Nikol Paşinyan Ermənistanı fəlakətə sürükləyir

Nikol Paşinyan Ermənistanı fəlakətə sürükləyir

04.09.2018 [08:43]

Rusiya ilə münasibətlərin gərginləşməsi, ölkədaxili durumun acınacaqlı olması və ekstremistlərin baş qaldırması buna dəlalət edir
İşğalçı Ermənistanda rəhbərliyi ələ keçirən Nikol Paşinyanın daxildə olduğu kimi, xarici siyasətdəki səriştəsizliyi yerli və xarici medianın gündəmindədir. Xüsusilə Rusiya ilə münasibətlərinin gərginləşməsinə ekspertlər daha çox diqqət yetirirlər. Belə ki, Kollektiv Təhlükəsizlik Müqaviləsi Təşkilatının baş katibinin həbsi ilə gərginləşən münasibətlərin normallaşması üçün elə bir ciddi addım atılmayıb. Əksinə, yeni hökumətin həbsdən azad etdiyi ekstremist-terrorçu şəxslərin Rusiya hərbi bazasının çıxarılması kimi hərbi-siyasi bəyanatlar verməsi vəziyyəti bir qədər də qəlizləşdirib.
Bu günlərdə Apelyasiya Məhkəməsinin KTMT baş katibi Yuri Xaçaturovun şikayətini rədd etməsi də Ermənistan-Rusiya münasibətlərinin gərginləşməsində yeni hökumətin maraqlı olduğunun göstəricisidir. Bu azmış kimi, onsuz da Rusiya ilə mürəkkəb münasibətlərin fonunda rəsmi İrəvanın digər ölkələrdən silah almağa çalışması, Hindistan mətbuatının Ermənistanın bu ölkədən silah almaq niyyəti barədə yazması, əlaqədar orqanların isə məlumatları təsdiqləməsi bu məsələnin ciddiliyindən xəbər verir.
Məsələ ilə bağlı “moscow-baku.ru” saytına münasibət bildirən hərbi analitik Pavel Felgenhauer deyib ki, Rusiya-Ermənistan münasibətlərindəki gərgin vəziyyət Rusiya ilə Azərbaycan arasında əməkdaşlığın daha da inkişafına səbəb ola bilər. Qeyd olunan məsələ barədə fikirlərə eyni səpkidə münasibət sərgiləyən Beynəlxalq Avrasiya Hərəkatının lideri Aleksandr Duqin bildirib ki, bu kontekstdə Azərbaycan daha çox Rusiya ilə strateji müttəfiqliyin gücləndirilməsinə hazır olduğunu nümayiş etdirir. Ermənistanda son günlər baş verən ictimai-siyasi hadisələrə münasibət bildirən A.Duqin “vəziyyətin fəlakətli bir ssenari üzrə inkişaf edə və nəzarətdən çıxa biləcəyini” də istisna etməyib. Onun sözlərinə görə, gözlənilməz olan vəziyyətə geosiyasi amillər də əlavə oluna bilər.
Faşist və anti-Rusiya meyilli qüvvələrin baş qaldırdığına eyham vuran ekspertlər Ermənistanda “Sasuna tsrer” kimi silahlı mübarizə aparan ekstremist qüvvələrin partiya formalaşdırması ideyasının indiki münbit şəraitdə daha fəal olan “Soros” və Qərbin digər fondlarının layihəsi olduğunu söyləyirlər. Həmin terrorçuların siyasi fəaliyyətə başladıqlarını elan etdikləri gün Rusiyaya qarşı bəyanat yaymaları, Ermənistanın sərhədlərini qoruyan rus hərbçilərini əvəz etmək fikrinə düşmələri də bunu sübut edir. Daxildə olduğu kimi, xaricdə, o cümlədən Rusiya mətbuatında da bu çağırışlara kəskin münasibət bildirilir. Məsələn, “kubnews.ru” saytında yer alan yazıda “Soros”la bağlı olanların “Facebook”un erməni seqmentində yaratdığı səhifələrdə Rusiyanın 102-ci hərbi bazasının ölkənin maraqlarını təmin etməməsi və respublika ərazisindən çıxarılması, Rusiya telekanallarının yayımının dayandırılması tələblərinin səbəbi araşdırılır. Saytda yer alan yazıda bu qaralama kampaniyasında 2015-ci ildə erməni ailəsini güllələyən rus sərhədçisi Valeri Permyakovun adının hallandırılması, Panik kəndindəki insidentdən dərhal sonra Ermənistanın müdafiə naziri D.Tonoyanın Rusiya sərhədçilərinin statusuna yenidən baxmağa çağırması xatırladılır.
Ümumiyyətlə, Ermənistanda Rusiya ilə münasibətlərin möhkəmləndirilməsindən daha çox anti-Rusiya kampaniyası aparılması Rusiya KİV-də geniş təhlil olunur. Məsələn, “gradator.ru” saytında yer alan “Rusiyanı qovmaq üçün “Sasuna tsrer” ekstremistləri Paşinyana kömək edəcəklər” sərlövhəli yazıda qeyd olunur ki, Ermənistanın yeni rəhbərliyi bu cür ekstremist əhval-ruhiyyəli radikal qrupları siyasi meydanda gərginlik yaratmaq üçün azadlığa buraxıb. Halbuki onların mübarizə metodları yaxşı heç nə vəd etmir. Məsələn, bu ekstremistlərin liderlərindən biri Jirayr Səfilyanın tərcümeyi-halı buna sübutdur. Belə ki, Livanda doğulmuş və bu ölkənin vətəndaşlığını saxlayan J.Səfilyan Beyrutda vətəndaş müharibəsi zamanı küçə döyüşlərinin fəal iştirakçısı olub, daha sonra Dağlıq Qarabağa gəlib və batalyon komandiri kimi Azərbaycan xalqına qarşı cinayətlərdə iştirak edib.
Yeri gəlmişkən, yuxarıda qeyd edilənləri və hakimiyyətdə olduğu 100 gün müddətində N.Paşinyanın buraxdığı ciddi səhvləri sadalayan parlamentin deputatları Karen Bekaryan, Miqran Hakopyan, Arman Saqatelyan və Samvel Fərmanyanın qələmə aldığı və “aravot.am” saytında yer alan “Açıq şəkildə fəlakətə doğru” sərlövhəli yazıda Ermənistanın düşdüyü vəziyyətin acınacaqlı olduğu etiraf edilir.
Qeyd olunanlardan belə bir nəticəyə gəlmək olar ki, N.Paşinyanın apardığı siyasət Ermənistanı fəlakətə sürükləyir.
Qaşqay ZİYƏDDİNOĞLU

Paylaş:

Baxılıb: 1343 dəfə