Ermənistan işğalçılıq siyasətinin “bəhrəsini dərir”

Bakı:

15 °C

72 %

9 m/s

Əlaqə

AZ RU EN

Ana səhifə / Dünya / Ermənistan işğalçılıq siyasətinin “bəhrəsini dərir”

Ermənistan işğalçılıq siyasətinin “bəhrəsini dərir”

05.08.2015 [08:38]

İqtisadi böhran bu ölkənin strateji obyektlərinin də satışa çıxarılması ilə nəticələnib
Ermənistanda mövcud olan iqtisadi və siyasi böhran işğalçı ölkənin bütün, o cümlədən, strateji obyektlərini satması ilə nəticələnir. Son vaxtlar Yerevan küçələrində baş qaldıran etiraz aksiyaları isə Sarkisyanın yeni-yeni sahələri satışa çıxarması ilə nəticələnib.
Belə ki, Ermənistanın baş naziri Ovik Abramyan bu günlərdə mətbuata verdiyi açıqlamada elektrik enerjisinin qiymətlərindəki artımlarla əlaqədar əhaliyə kompensasiya veriləcəyini bildirib. Məlum olduğu kimi, Ermənistan hökuməti Vorotan su elektrik stansiyasının kaskadını ABŞ-ın “Contour Global” energetika holdinqinə satmaqla əldə edəcəyi vəsaitləri hesabına əhaliyə kompensasiya verməyi düşünür. “Ermənistan prezidentinin bəyan etdiyi kimi, hökumət elektrik enerjisi tariflərinin qaldırılması ilə bağlı xərcləri subsidiya hesabına kompensasiya edəcək. Vəsaitlər Vorotan su elektrik stansiyasının kaskadının satılması hesabına əldə ediləcək”, - deyə Abramyan bildirib.
Məlumat üçün bildirək ki, avqustun 1-dən Ermənistanda elektrik enerjisi tarifləri 16,7 faiz qalxıb. Daha dəqiq desək, avqustun 1-nə qədər ermənilər 1 kvt/s elektrik enerjisi üçün gündüz vaxtı 41,85 dram, gecələr isə 31,85 dram pul ödəyirdi. Avqustun 1-dən sonra isə müvafiq olaraq bu qiymətlər 58 və 48 drama qədər qalxıb. Bu qərar Ermənistan cəmiyyətində kəskin reaksiyaya və qərarın ləğv olunmasını tələb edən etiraz hərəkatının formalaşmasına səbəb olub. Mətbuatda gəzən xəbərlərə görə ABŞ-ın “Contour Global” energetika holdinqi iyunun 8-də Ermənistan-İran sərhədində yerləşən Vorotan su elektrik stansiyasının kaskadının sahibi olub. Holdinq bu strateji əhəmiyyətli obyekti 180 mln dollara əldə edib. Maraqlı məqam ondadır ki, Vorotan SES Ermənistan - İran sərhəddində yerləşir. Bu obyektin məhz amerikalılara satılması isə rəsmi Yerevanın İranla münasibətlərinə soyuqluq gətirə bilər.
Əslində, Sarkisyan hökumətinin hakimiyyətdə qalmaq naminə hətta bütün Ermənistanı kimə gəldi, necə gəldi satmaq siyasəti heç də təəccüblü deyil. Çünki mövcud rejim ölkəni böhrandan çıxaracaq gücdə deyil. Hər halda Ermənistan hakimiyyətinin hətta öz vətəndaşlarının maraqları naminə milliləşdirmə siyasətini reallaşdırmaq gücündə olmaması deyilənləri təsdiqləyir. Belə ki, Sarkisyan etiraz edən kütlənin təzyiqi altında iyul ayının sonlarında Ermənistanın “Elektrik şəbəkələri” paylayıcı şirkətinin dövlətə qaytarılmasını istisna etmədiyini bildirsə də, bir qədər sonra dediklərini inkar etdi. Ermənistanın baş naziri Ovik Abramyan qəti şəkildə bildirib ki, “Elektrik şəbəkələri” paylaşdırıcı şirkətinin milliləşdirilməsi məsələsi müzakirə olunmur.
Beləliklə, göründüyü kimi, Ermənistan işğalçılıq siyasətinin “bəhrəsini dərir”. Və əgər bu siyasətə son qoyulmasa, Ermənistan bir dövlət olaraq satışa çıxarılacaq.
Emin KƏRİMOV

Paylaş:

Baxılıb: 1251 dəfə