Rumıniyalı ekspert: Ukrayna münaqişəsində eskalasiya ehtimalı qalır

Bakı:

26 °C

73 %

3 m/s

Əlaqə

AZ RU EN

Ana səhifə / Dünya / Rumıniyalı ekspert: Ukrayna münaqişəsində eskalasiya ehtimalı qalır

Rumıniyalı ekspert: Ukrayna münaqişəsində eskalasiya ehtimalı qalır

24.02.2026 [19:53]

Rumıniyalı tarixçi və postsovet məkanı üzrə ekspert Armand Qoşu Ukraynadakı müharibənin yeni mərhələyə keçə biləcəyini istisna etmədiyini bildirib. Onun sözlərinə görə, hazırkı vəziyyət nisbi sabitlik təsiri bağışlasa da, eskalasiya riski tam aradan qalxmayıb və Kreml qarşısında zaman faktoru getdikcə daha ciddi rol oynayır.

AZƏRTAC xəbər verir ki, Armand Qoşu Rumıniya mətbuatına açıqlamasında vurğulayıb ki, Rusiya Prezidenti Vladimir Putinin strateji seçim imkanları əvvəlki dövrlərlə müqayisədə daha məhduddur. Müharibənin uzanması həm iqtisadi, həm hərbi, həm də siyasi baxımdan rəsmi Moskva üçün əlavə yük yaradır. Ekspertin fikrincə, məhz bu səbəbdən Kremlin yaxın aylarda daha sərt və riskli addımlar atmaq ehtimalı nəzərdən qaçırılmamalıdır.

Tarixçi hesab edir ki, münaqişənin taleyi yalnız cəbhə xəttində baş verən hadisələrdən asılı deyil. O, qeyd edib ki, Qərbin hərbi və maliyyə dəstəyi, sanksiyaların təsiri, eləcə də Rusiyanın daxili siyasi və iqtisadi vəziyyəti prosesin istiqamətini müəyyən edən əsas amillərdir. Armand Qoşunun fikrincə, rəsmi Moskva üçün ən böyük problem uzunmüddətli resursun tükənməsi və beynəlxalq təcridin dərinləşməsidir.

Ekspert əlavə edib ki, Rusiya rəhbərliyi üçün zaman amili həlledici xarakter daşıyır. Müharibənin uzanması Kremlin manevr imkanlarını azaldır və daxili ictimai-siyasi sabitlik baxımından əlavə risklər yaradır. Bu isə müəyyən mərhələdə daha kəskin qərarların qəbuluna səbəb ola bilər.

Armand Qoşu, həmçinin qeyd edib ki, eskalasiya yalnız genişmiqyaslı hərbi əməliyyatların artması demək deyil. O, enerji təzyiqi, informasiya müharibəsi, kiberhücumlar və diplomatik qarşıdurmaların da gərginliyin yüksəlməsi ssenarisinə daxil olduğunu bildirib. Ekspertin qənaətinə görə, qarşıdakı dövrdə münaqişə həm hərbi, həm də hibrid formatda davam edə bilər.

Tarixçi vurğulayıb ki, Avropa İttifaqı və NATO üçün əsas vəzifə strateji səbr nümayiş etdirmək və Ukraynaya dəstəyi davam etdirməkdir. Onun sözlərinə görə, münaqişənin nəticəsi yalnız cəbhədə deyil, həm də siyasi iradə və davamlılıq səviyyəsində müəyyən olunacaq.

Qeyd edək ki, Armand Qoşu postsovet məkanı və Rusiya siyasəti üzrə ixtisaslaşmış analitik kimi mütəmadi olaraq Şərqi Avropada təhlükəsizlik məsələləri ilə bağlı geniş təhlillər təqdim edir. Onun fikrincə, Ukrayna müharibəsinin növbəti mərhələsi regional təhlükəsizlik sisteminin gələcək arxitekturasına birbaşa təsir göstərəcək.

Paylaş:

Baxılıb: 539 dəfə