Keçmiş fransız deputat Fransua Pupponi dövlət vəsaitlərinin mənimsənilməsinə görə məhkum edilib

Bakı:

9 °C

87 %

3 m/s

Əlaqə

AZ RU EN

Ana səhifə / Dünya / Keçmiş fransız deputat Fransua Pupponi dövlət vəsaitlərinin mənimsənilməsinə görə məhkum edilib

Keçmiş fransız deputat Fransua Pupponi dövlət vəsaitlərinin mənimsənilməsinə görə məhkum edilib

10.12.2025 [14:19]

Keçmiş deputat, Sosialist Partiyasının (PS) üzvü Fransua Pupponi Paris Cinayət Məhkəməsi tərəfindən dövlət vəsaitlərinin mənimsənilməsi maddəsi ilə məhkum edilib. Məhkəmə qərarı Pupponinin öz günahını etiraf etməsi əsasında – Fransa hüququnda saxlanılan ittiham üzrə təqsirin əvvəlcədən tanınması proseduru çərçivəsində verilib.

AZƏRTAC xəbər verir ki, bu iş Fransa siyasi sistemində parlament nəzarətinin, şəffaflıq mexanizmlərinin və deputat imtiyazlarının istifadəsi üzrə aparılan ən diqqətçəkən araşdırmalardan biri kimi qiymətləndirilir. Vaxtilə erməni separtçılarının ən fəal müdafiəçisi kimi tanınan F. Pupponinin dövlət vəsaitlərini mənimsəməsi - 122 min avroluq uyğunsuz xərclər üzrə istintaq üzə çıxıb.

İctimai Həyatda Şəffaflıq üzrə Ali Səlahiyyətli orqan (Haute Autorité pour la transparence de la vie publique-HATVP) tərəfindən 2020-ci ildə daxil olmuş siqnal Pupponinin deputatlara ayrılan mandat xərcləri üçün təmsilolunma müavinəti (IRFM) vəsaitindən şəxsi məqsədlərlə istifadə etdiyi şübhəsini gündəmə gətirmişdi.

İstintaqın nəticələri göstərib ki, 2015–2018-ci illərdə Pupponi aşağıdakı qadağan olunmuş və qeyri-qanuni ödənişləri edib:

42 min avro – Korsikada şəxsi səfərlərə aid xərclər, 21 min avro – bir neçə avtomobilin icarəsi, 18 min avro – restoran ödənişləri, 7000 avro – televiziya abunələri və 2500 avro – Sosialist Partiyasına üzvlük haqları.

Milli Maliyyə Prokurorluğunun (PNF) nümayəndəsi Hedi Kzilalinin sözlərinə görə, bu məbləğlər deputatlar arasında aşkarlanmış ən böyük qayda pozuntularından biridir.

2015-ci ildə Fransa Milli Assambleyasının rəhbərliyi IRFM-in istifadəsinə sərt məhdudiyyətlər bildirərək, bütün deputatlara rəsmi xəbərdarlıq göndərmişdi.

Prokurorun sözlərinə görə, Fransua Pupponi qayda dəyişikliklərini nəzərə almayıb və şəxsi ehtiyacları üçün büdcədən istifadə etməyə davam edib.

Məhkəmədə Pupponini müdafiə edən vəkil cəzanın simvolik deyil, ağır olduğunu vurğulasa da, keçmiş deputat mətbuata heç bir açıqlama verməyib.

Pupponi 20 ildən artıq PS-də təmsil olunduqdan sonra 2018-ci ildə partiyanı tərk edərək, əvvəlcə “Libertés et Territoires”, daha sonra isə MoDem qrupuna qoşulmuşdu. 2022-ci ildə seçkilərdə məğlub olaraq, parlamentdən kənarda qalıb. Lakin bu iş təkcə bir siyasətçinin şəxsi məsuliyyətsizliyinin nəticəsi deyil, daha geniş sistem böhranına işarədir.

PNF 2023-cü ildə parlament üzvlərinin dövlət vəsaitlərindən sui-istifadəsi ilə bağlı 20-yə yaxın siqnala baxıldığını açıqlamışdı. Onların bir qismi xitam edilsə də, bir neçə iş artıq məhkəmə hökmü ilə nəticələnib.

Bu, Fransa siyasi sistemində hesabatlılıq və parlament etikası ilə bağlı uzun müddətdir müzakirə olunan böhranın daha da dərinləşdiyini göstərir.

Paylaş:

Baxılıb: 430 dəfə