Kanadada timsah dişlərinin izləri olan nəhəng pterozavr qalıqları tapılıb

Bakı:

16 °C

82 %

8 m/s

Əlaqə

AZ RU EN

Ana səhifə / Dünya / Kanadada timsah dişlərinin izləri olan nəhəng pterozavr qalıqları tapılıb

Kanadada timsah dişlərinin izləri olan nəhəng pterozavr qalıqları tapılıb

24.01.2025 [17:32]

Kanadanın Alberta əyalətində paleontoloqlar sümüklərində qədim timsahın dişlərinin izlərini daşıyan “Cryodrakon boreas” növünə aid nəhəng pterozavrın gənc fərdinin qalıqlarını aşkar ediblər. Britaniyanın Ridinq Universitetinin mətbuat xidməti xəbər verir ki, bu, Yerdəki bu ən böyük uçan canlıların mezozoy erasının timsahlarının qida mənbəyinin bir hissəsi olduğunu deməyə əsas verir.

AZƏRTAC xarici mediaya istinadla xəbər verir ki, Ridinq Universitetinin dosenti Brayan Pikl tapıntı ilə bağlı deyib: “Belə nadir tapıntılar dinozavrlar dövründə heyvan növlərinin qarşılıqlı əlaqəsi haqqında anlayışımızı əhəmiyyətli dərəcədə genişləndirməyə imkan verir. Biz hələ ki, bu pterozavrın timsah tərəfindən dişləndiyi vaxt sağ və ya ölü olub-olmadığını deyə bilmərik. Bu, timsahların təxminən 70 milyon il əvvəl vaxtaşırı pterozavrları ovladığını və ya yediyini göstərir”.

Alimlər Albertanın cənubunda, UNESCO-nun Ümumdünya İrs Siyahısına daxil edilmiş Dinozavr Əyalət Parkının ərazisində bu yaxınlarda tapılmış “Cryodrakon boreas” pterozavr növünün sümük izlərini tədqiq edərkən bu kəşfə nail olublar. Burada Təbaşir dövrünün sonunda əmələ gəlmiş süxurlar yerləşir və Mezozoy erasının son nəhəng sürünənlərinin bəzilərinin çoxlu qalıqları var.

Bunlara Yer kürəsində indiyə qədər yaşamış ən böyük uçan canlılar olduğu düşünülən “Cryodrakon boreas” pterozavrları daxildir. Yetkinlərin hündürlüyü zürafələrlə müqayisə oluna bilərdi, həmçinin qanadları təxminən 10 metr və təxmini çəkisi 150-240 kiloqram idi. İndi paleontoloqların inandığı kimi, həyat tərzi və qidalanma baxımından bu canlılar ən çox müasir leyləklərə bənzəyirdi.

Bu nəhəng uçan yırtıcılar paleontoloqların kəşf etdiyi kimi, bəzən Mezozoy dövrünün digər iri heyvanlarının - qalıqları tez-tez Dinozavr Əyalət Parkının ərazisində tapılan “Leidyosuchus canadensis” və ya “Albertochampsa langstoni” növlərinin timsahlarının ovuna çevrilirdi. 2023-cü ildə kanadalı paleontoloqlar tərəfindən tapılan gənc fərdlərdən birinin fəqərələrində elm adamlarının qədim timsahların dişlərinin buraxdığı bir neçə çuxur və dəlik aşkar etməsi də bunu təsdiqləyir.

Tədqiqatçılar qeyd edirlər ki, keçmişdə də paleontoloqlar Təbaşir dövrünə aid iri pterozavrların sümüklərini tapıblar. Bu sümüklərdə yırtıcı dinozavrların dişlərinin izləri var. Onlar belə qənaətə gəliblər ki, timsahların buraxdığı oxşar izlərin tapılması Yerdəki ən böyük uçan sürünənlərin “təbii düşmənləri”nin siyahısını xeyli genişləndirir.

Paylaş:

Baxılıb: 410 dəfə