Milli Məclisin Əmək və sosial siyasət komitəsinin iclası keçirilib

Bakı:

20 °C

52 %

4 m/s

Əlaqə

AZ RU EN

Ana səhifə / Daxili siyasət / Milli Məclisin Əmək və sosial siyasət komitəsinin iclası keçirilib

Milli Məclisin Əmək və sosial siyasət komitəsinin iclası keçirilib

08.02.2018 [10:02]

Fevralın 7-də Milli Məclisin Əmək və sosial siyasət komitəsinin iclası keçirilib.
AZƏRTAC xəbər verir ki, komitənin sədri Hadi Rəcəbli bildirib ki, gündəliyə üç məsələ daxil edilib.
Sonra gündəlikdəki birinci məsələ - “Əlilliyi olan şəxslərin hüquqları haqqında” yeni qanun layihəsi ictimaiyyətin və qeyri-hökumət təşkilatları nümayəndələrinin iştirakı ilə birgə müzakirə olunub. Hadi Rəcəbli bildirib ki, layihənin əsas məqsədi əlillərin sosial müdafiəsini, onların hüquqlarının qorunmasını, cəmiyyətə tam inteqrasiyasını təmin etməkdir.
Sonra layihə barədə məlumat verən əmək və əhalinin sosial müdafiəsi nazirinin müavini Natiq Məmmədov deyib ki, bu sənəd əlilliyi olan şəxslər barəsində dövlət siyasətinin əsaslarını və onların hüquqlarının müdafiəsi sahəsində dövlətin vəzifələrini müəyyən edəcək, əlilliyi doğuran risklərin, əlillik əlamətinə görə ayrı-seçkiliyin bütün formalarının aradan qaldırılmasını, əlilliyi olan şəxslərin reabilitasiyasını, cəmiyyətin həyatında tam həcmdə iştirakını və sosial inteqrasiyasına şərait yaradılmasını, onlara aid olan strategiya və proqramlara dair qərarların qəbulu prosesinə fəal cəlb olunmasını, əlilliyi olan şəxslərin hüquq və azadlıqlarının tam və bərabər səviyyədə həyata keçirilməsini, onların şərəf və ləyaqətinin müdafiəsi sahəsində yaranan münasibətləri tənzimləyəcək. Bu qanun Azərbaycan Respublikasının vətəndaşlarına, Azərbaycan Respublikasının tərəfdar çıxdığı beynəlxalq müqavilələrdə başqa hal nəzərdə tutulmamışdırsa, Azərbaycan Respublikasının ərazisində daimi yaşayan vətəndaşlığı olmayan şəxslərə və əcnəbilərə şamil ediləcək.
Natiq Məmmədov qeyd edib ki, bu qanun layihəsi ilk dəfə olaraq Azərbaycan tərəfindən BMT-nin xüsusi komitəsinə təqdim edilib, həmin komitənin rəy və təklifləri də nəzərə alınıb. Bundan başqa, Avropa Sosial Xartiyası ilə müzakirələr aparılıb. Həmçinin bununla bağlı UNICEF-lə də əməkdaşlıq edirik.
Qeyd olunub ki, yeni Qanun qüvvəyə mindiyi gündən bu sahəni tənzimləyən və hazırda qüvvədə olan 1992-ci il 25 avqust tarixli Qanun ləğv ediləcək.
Çıxış edən deputatlar Rauf Əliyev, Aytən Mustafayeva, Jalə Əliyeva, Musa Quliyev, Araz Əlizadə, müvafiq qurumların və qeyri-hökumət təşkilatlarının nümayəndələri qanun layihəsi barədə fikirlərini bildiriblər, qeyd və təkliflərini veriblər. Qeyd olunub ki, layihə Milli Məclisin plenar iclasının müzakirəsinə çıxarılanadək deyilən və komitəyə yazılı təqdim olunan təkliflər əsasında onun üzərində iş aparılacaq.
İclasda deputatlar Əmək Məcəlləsinə və “Həmkarlar İttifaqları haqqında” Qanuna təklif olunan dəyişiklikləri də nəzərdən keçiriblər. Qeyd olunub ki, təklif olunan dəyişikliklər texniki xarakter daşıyır. Hər iki layihə Milli Məclisin plenar iclasında müzakirəyə tövsiyə olunub.

Paylaş:

Baxılıb: 2074 dəfə