Milli Məclisdə Bələdiyyələrin fəaliyyətinə inzibati nəzarəti həyata keçirən orqanın illik məruzəsi dinlənilib

Bakı:

21 °C

83 %

2 m/s

AZ RU EN

Ana səhifə / Daxili siyasət / Milli Məclisdə Bələdiyyələrin fəaliyyətinə inzibati nəzarəti həyata keçirən orqanın illik məruzəsi dinlənilib

Milli Məclisdə Bələdiyyələrin fəaliyyətinə inzibati nəzarəti həyata keçirən orqanın illik məruzəsi dinlənilib

07.02.2018 [10:11]

Fevralın 6-da Milli Məclisin Regional məsələlər komitəsinin iclası keçirilib.
AZƏRTAC xəbər verir ki, komitə sədri Arif Rəhimzadə gündəliyə “Bələdiyyələrin fəaliyyətinə inzibati nəzarəti həyata keçirən orqanın illik məruzəsi” ilə bağlı hesabatın daxil edildiyini bildirib.
Ədliyyə nazirinin müavini Vilayət Zahirov hesabatı təqdim edib. Bildirib ki, 2017-ci il bələdiyyələrin fəaliyyətində uğurlu il olub. O, xüsusilə Bələdiyyə Qulluqçularının Etik Davranış Kodeksinin qəbulunun bələdiyyələrin fəaliyyətində mühüm rol oynadığını vurğulayıb. Vilayət Zahirov qeyd edib ki, 2017-ci ildə Ədliyyə Nazirliyinin Bələdiyyələrlə İş Mərkəzinə 65 minə yaxın bələdiyyə aktı daxil olub. Hər bir bələdiyyə aktı hüquqi ekspertizadan keçib və onların qanunvericiliyə uyğunluğu yoxlanıb. Bu aktların böyük əksəriyyəti qanunvericiliyə uyğun olub. 1979 aktın dəyişdirilməsi və ləğv edilməsi ilə bağlı nazirlik tərəfindən bələdiyyələrə tövsiyələr verilib, 741 akt ləğv edilib və 714 akt dəyişdirilib. Bələdiyyə aktları yoxlanılarkən torpaq qanunvericiliyinin pozulması halları müəyyən edilib və 2636 hektar torpaq sahəsinin bələdiyyələr tərəfindən qanunsuz verilməsi müəyyən olunub. Bu torpaqların bələdiyyələrə qaytarılması istiqamətində tədbirlər görülüb. Bələdiyyələrlə bağlı 24 fakt üzrə materiallar toplanılıb və müvafiq hüquq-mühafizə orqanlarına göndərilib. Qanun pozuntuları torpaq sahəsinin qanunsuz icarəyə verilməsi, həmin icarədən alınan vəsaitin bələdiyyə büdcəsinə ödənilməməsi, təmir işləri ilə bağlı bələdiyyə vəsaitlərinin mənimsənilməsi, büdcə vəsaitlərinin qanunsuz silinməsi və digər məsələlərlə bağlı olub. Bu faktlarla bağlı Baş Prokuror yanında Korrupsiyaya qarşı Mübarizə Baş İdarəsində araşdırmalar aparılıb və 15 fakt üzrə cinayət işi başlanılıb. Nazir müavini məruzəsində onu da vurğulayıb ki, ümumilikdə ötən il torpaq qanunvericiliyinin pozulması halları 2016-cı ilə nisbətən üç dəfədən çox azalıb.
Komitə üzvləri Fəttah Heydərov, Rüstəm Xəlilov, Tahir Rzayev, Kamran Bayramov, Malik Həsənov, Nəsimi, Nərimanov, Yasamal rayon bələdiyyələrinin əməkdaşları məruzə haqqında fikir və təkliflərini səsləndiriblər.
Müzakirələrin sonunda “Bələdiyyələrin fəaliyyətinə inzibati nəzarəti həyata keçirən orqanın illik məruzəsi” Milli Məclisin plenar iclasına tövsiyə olunub.

Paylaş:

Baxılıb: 2331 dəfə