Mədəniyyət və turizm naziri media nümayəndələri ilə görüşüb

Bakı:

18 °C

63 %

3 m/s

Əlaqə

AZ RU EN

Ana səhifə / Daxili siyasət / Mədəniyyət və turizm naziri media nümayəndələri ilə görüşüb

Mədəniyyət və turizm naziri media nümayəndələri ilə görüşüb

09.04.2015 [10:09]

Aprelin 8-də Azərbaycan Xalça Muzeyində Mətbuat Şurasının (MŞ) təşəbbüsü ilə mədəniyyət və turizm naziri Əbülfəs Qarayevin respublikamızda fəaliyyət göstərən informasiya agentlikləri və nüfuzlu jurnalist təşkilatlarının rəhbərləri, qəzet redaktorları ilə görüşü keçirilib.
AZƏRTAC xəbər verir ki, tədbirdə nazirlikdə aparılan islahatlar, mətbuat orqanları ilə əməkdaşlığın genişləndirilməsi yolları, Üçüncü Mədəniyyətlərarası Dialoq Forumuna hazırlıq, forumun mediada işıqlandırılması ilə bağlı tövsiyələr, “Bakı Avropa Oyunları-2015” ilə əlaqədar nazirliyin vəzifələri, turizm müəssisələrində hazırlığın səviyyəsi kimi mühüm məsələlər müzakirə olunub.
Görüşdə nazir Ə.Qarayev son illər rəhbərlik etdiyi qurum tərəfindən həyata keçirilən işlərdən, mədəniyyətimizin inkişafı, təbliği istiqamətində reallaşdırılan layihələrdən danışıb.
Bildirilib ki, son aylarda nazirliyin daxilində aparılan struktur dəyişikliklər işin daha səmərəli qurulmasına, yeni dövrün tələblərinə cavab verən layihələrin həyata keçirilməsinə xidmət edir.
MŞ-nin sədri Əflatun Amaşov belə görüşlərin təşkilinin böyük əhəmiyyət daşıdığını söyləyib. Onun sözlərinə görə, bu görüşlər media təmsilçilərinə rəhbər qurumların nümayəndələri ilə hər hansı problemin, mövzunun müzakirəsinə və həllinə müsbət təkan verir. İlin sonunadək bir sıra dövlət qurumlarının rəhbərləri ilə də bu qəbildən görüşlərin keçirilməsi nəzərdə tutulur.
Mətbuat Şurasının sədri diqqətə çatdırıb ki, hazırda görüşdə 30-dan çox aparıcı media qurumunun təmsilçisi iştirak edir. Ə.Amaşov əmin olduğunu bildirib ki, görüş səmərəli olacaq, mühüm məsələlərin həlli yolları müzakirə olunacaq, tapşırıq və tövsiyələr dinləniləcək.
Müasir Azərbaycan mətbuatının inkişafından söz açan Ə.Amaşov deyib ki, hazırda ölkəmizdə 40-a yaxın gündəlik qəzet işıq üzü görür, hər həftə bir-neçə xəbər portalı yaradılır.
Azərbaycan mətbuatının keçdiyi tarixi yola nəzər salan Ə.Amaşov bu sahədəki problemlərə də toxunub.
Sonra Ə.Qarayev görüşdə nəzərdə tutulan mövzularla bağlı geniş məlumat verib, hazırlıq işlərindən, medianın bu prosesdəki rolundan və digər məsələlərdən danışıb.
Ötən ilin son günlərində nazirlikdə yeni yaranan İnformasiya və ictimaiyyətlə əlaqələr şöbəsinin gördüyü işlərdən və media qurumları ilə yaradılan sıx əməkdaşlıqdan söz açan nazir belə yeniliklərin zamanın tələbi olduğunu söyləyib. O, həmçinin ölkə başçısının müvafiq sərəncamları ilə Azərbaycan Turizm İnstitutunun bazasında Azərbaycan Turizm və Menecment Universitetinin, Bakı Xoreoqrafiya Məktəbinin bazasında Bakı Xoreoqrafiya Akademiyasının yaradılmasının bu sahələrin inkişafına böyük dəyişiklik gətirəcəyini bildirib.
Nazir üçüncü dəfə keçiriləcək Ümumdünya Mədəniyyətlərarası Dialoq Forumunun təşkilindən, bu ideyanın yaranmasının tarixindən və foruma hazırlıq səviyyəsindən söz açıb.
Bildirilib ki, UNESCO, BMT-nin Sivilizasiyalar Alyansı, Dünya Turizm Təşkilatı, Avropa Şurası və İSESCO-nun tərəfdaş olduğu foruma ümumilikdə bütün qitələrdən 500-dən çox qonaq qatılacaq.
Forumun ölkə KİV-ləri tərəfindən yüksək səviyyədə işıqlandırılmasının vacibliyinə toxunan nazir bildirib ki, bu, həm də bizim mədəniyyətimizin, incəsənətimizin təbliğinə, dünyaya çatdırılmasına bir təkandır.
Vurğulanıb ki, yaxın günlərdə Parisdə forumun gündəliyi təsdiqləndikdən sonra mediaya geniş məlumat veriləcək.
Paytaxtımızda təşkil olunacaq “Bakı Avropa Oyunları-2015” ilə bağlı mehmanxanalarda aparılan monitorinqlərdən söz açan nazır deyib ki, yarışların keçiriləcəyi günlərdə qonaqlarımız üçün tarixi yerlərə, muzeylərə ekskursiyalar təşkil olunacaq, mədəni proqramlar təqdim ediləcək: “Biz bununla əlaqədar Azərbaycan Turizm və Menecment Universitetində, Bakı Turizm Kollecində, eləcə də digər mədəniyyət ocaqlarında çalışan işçilər üçün treninqlər təşkil etmişik. Bakıda keçiriləcək birinci Avropa Oyunları ilə əlaqədar bütün muzeylər uzadılmış iş rejiminə keçəcək. Hazırda teatrlarda tərcümə məsələsi üzərində iş aparılır, bələdçilər hazırlanır. Azərbaycanı dünyaya tanıtmaq, təbliğ etmək əsas vəzifə kimi qarşıya qoyulub. Çalışmalıyıq ki, ölkəmizə gələn qonaqlar razı getsinlər”.
Sonra görüş müzakirələrlə davam etdirilib, yeni təkliflər, fikirlər səsləndirilib, maraq doğuran məsələlər ətrafında müzakirələr aparılıb, suallar cavablandırılıb.