Göygöllülərin məşəl sevinci

Bakı:

23 °C

68 %

3 m/s

Əlaqə

AZ RU EN

Ana səhifə / / Göygöllülərin məşəl sevinci

Göygöllülərin məşəl sevinci

16.05.2015 [12:05]

Mayın 15-də birinci Avropa Oyunlarının məşəli Azərbaycanın səfalı guşələrindən olan Göygölə gətirilib.
AZƏRTAC xəbər verir ki, Göygöl rayonunun Bayraq meydanında Avropa Oyunlarının məşəlinin qarşılanma mərasimi olub. Şəhərin Heydər Əliyev prospektində əllərində gül-çiçək, üçrəngli Azərbaycan bayraqları tutmuş minlərlə rayon sakini yürüş iştirakçılarını alqışlarla qarşılayıb.
Avropa Oyunlarının rəmzi qapısında Göygöl rayon peşə məktəbinin bədən tərbiyəsi müəllimi Təhminə Əliyeva birinci Avropa Oyunlarının məşəlini qəbul edib. Sonra respublikamızı müxtəlif yarışlarda uğurla təmsil edən 10 idmançı məşəli Heydər Əliyev prospektindən keçməklə, Heydər Əliyev Mərkəzinin qarşısında qurulmuş səhnəyə gətirib. Buraya toplaşanlar Avropa Oyunlarının məşəl estafetini qəbul edən idmançıları alqışlarla qarşılayıblar.
Şəhər 1 nömrəli orta məktəbin bədən tərbiyəsi müəllimi, idman ustalığına namizəd Vüqar İbrahimov səhnəyə qalxaraq məşəli alovlandırıb. Sonra məşəldən götürülmüş alovla yandırılan çıraq rayon sakinlərinə təqdim edilib. Bildirilib ki, bu çıraq ilk Avropa Oyunları başa çatana qədər Heydər Əliyev Mərkəzində yanacaq.
Rayon sakinləri birinci Avropa Oyunlarının məşəlinin Göygöldə alovlandırılmasını əsl bayram kimi qeyd edirlər. Təntənəli qarşılanma mərasimində iştirak edən Balçılı kənd orta məktəbinin müəllimi Bünyad Balakişiyev sevincini AZƏRTAC-ın müxbiri ilə bölüşərək deyib: “Bir gənc olaraq bu gün çox sevinirəm. Qürur hissi duyuram ki, belə bir tədbirin keçirilməsi bizim gənclik dövrümüzə təsadüf etdi. İstərdik ki, belə tədbirlər ölkəmizdə tez-tez olsun. Çünki Azərbaycanın belə mötəbər yarışlara ev sahibliyi etməsi onun şöhrətini daha da artırır. Bu, hər bir azərbaycanlı gənc üçün qürurdur və biz bu uğurlarımızla fəxr edirik”.
Rayon sakini Zöhrə Zeynalova ölkəmizin bu cür idman tədbirlərinə ev sahibliyi etməsinin Azərbaycanda düzgün idman siyasətinin həyata keçirilməsi ilə əlaqələndirib: “Fəxr edirəm ki, ilk Avropa Oyunları ölkəmizdə keçirilir. Bu cür möhtəşəm tədbirlərə ev sahibliyi etmək heç də hər ölkəyə nəsib olmur. Azərbaycan bu uğura idman sahəsində qazandığı nailiyyətlərlə, yaratdığı infrastrukturla, özünün iqtisadi inkişafı ilə nail olub”.
Şəhər musiqi məktəbinin müəllimi Aygül Əliyeva isə ürək sözlərini belə ifadə edib: “Azərbaycanda belə möhtəşəm tədbirin keçirilməsi müstəqil respublikamızın ən böyük uğurlarından biridir. Əminəm ki, ev sahibliyi etdiyimiz ilk Avropa Oyunlarında idmançılarımız böyük qələbələr qazanacaqlar”.
Qarşılanma mərasimində çıxış edənlər vurğulayıblar ki, respublikamızın hər yerində olduğu kimi, Göygöl rayonunda da idmana xüsusi diqqət və qayğı göstərilir. Keçən il dövlətimizin başçısının xeyir-duası ilə rayonda Olimpiya İdman Kompleksi istifadəyə verilib. Hazırda rayon mərkəzində, eləcə də kənd və qəsəbələrdə çoxlu sayda idman obyektləri fəaliyyət göstərir ki, bunun da nəticəsində hər il onlarla idmançı dünyanın ən mötəbər yarışlarında Azərbaycanı təmsil edir.
Sonra birinci Avropa Oyunlarının məşəli Gəncəyə yola salınıb.

Paylaş:

Baxılıb: 2117 dəfə