Ana dilimiz – milli kimliyimiz və mənəvi varlığımızdır

Bakı:

26 °C

78 %

2 m/s

Əlaqə

AZ RU EN

Ana səhifə / Arxiv / Ana dilimiz – milli kimliyimiz və mənəvi varlığımızdır

Ana dilimiz – milli kimliyimiz və mənəvi varlığımızdır

30.07.2026 [12:03]

Ulu Öndər Heydər Əliyev hər zaman Azərbaycan dilinin qorunmasına, inkişafına və dövlət dili kimi möhkəmlənməsinə xüsusi diqqət göstərmişdir. Onun “Dil hər bir millətin milliliyinin əsasıdır” fikri ana dilimizin xalqımızın həyatındakı əvəzsiz rolunu aydın şəkildə ifadə edir. Heydər Əliyevin uzaqgörən dil siyasəti nəticəsində Azərbaycan dilinin milli dəyər kimi qorunması, cəmiyyətdə mövqeyinin möhkəmləndirilməsi və gələcək nəsillərə ötürülməsi istiqamətində mühüm işlər görülmüşdür.Azərbaycan dili xalqımızın əsrlər boyu formalaşmış tarixi yaddaşını, zəngin mədəni irsini və milli düşüncə tərzini özündə yaşadan ən böyük mənəvi sərvətlərimizdən biridir. Dil yalnız ünsiyyət vasitəsi deyil, eyni zamanda xalqın kimliyini, keçmişini və mənəvi dünyasını əks etdirən əsas amillərdəndir. Öz dilini qoruyan xalq öz tarixini, mədəniyyətini və milli dəyərlərini də qorumuş olur.Tarixin müxtəlif dövrlərində Azərbaycan dili bir sıra çətinliklərlə üzləşmişdir. Xüsusilə sovet hakimiyyəti illərində milli dillərin inkişafına müəyyən məhdudiyyətlər yaradılmış, ana dili məsələsini gündəmə gətirmək böyük cəsarət tələb etmişdir. Həmin dövrdə ziyalılarımızın milli dilimizin qorunması istiqamətində göstərdiyi səylər Azərbaycan dilinin yaşadılmasında mühüm rol oynamışdır.Azərbaycan xalqı bütün çətinliklərə baxmayaraq, öz ana dilinə bağlılığını qoruyub saxlamışdır. Dilimiz nəsildən-nəslə ötürülərək bu günümüzə qədər gəlib çatmış, müstəqillik illərində isə dövlət dili kimi öz layiqli mövqeyini daha da möhkəmləndirmişdir.

Ulu Öndər Heydər Əliyevin rəhbərliyi ilə həyata keçirilən məqsədyönlü siyasət nəticəsində Azərbaycan dilinin dövlət dili kimi inkişafı, onun tətbiq dairəsinin genişləndirilməsi və milli dəyərlər sistemindəki rolu daha da artırılmışdır. Azərbaycan əlifbasının təkmilləşdirilməsi və latın qrafikalı əlifbaya keçid xalqımızın mədəni həyatında mühüm tarixi hadisələrdən biri olmuşdur.Bu gün Azərbaycan dilinin qorunması və inkişaf etdirilməsi dövlət siyasətinin əsas istiqamətlərindən biridir. Cənab Prezident İlham Əliyevin rəhbərliyi ilə ana dilimizin təbliği, onun saflığının qorunması və beynəlxalq səviyyədə tanıdılması istiqamətində mühüm tədbirlər həyata keçirilir. Azərbaycan dili ölkəmizdə yaşayan milyonlarla insanın mənəvi birliyini ifadə etməklə yanaşı, dünyanın müxtəlif ölkələrində yaşayan soydaşlarımız üçün də milli bağlılıq rəmzidir.

1 Avqust – Azərbaycan əlifbası və Azərbaycan dili Günü doğma dilimizə olan hörmət və sevgimizin ifadəsidir. Bu əlamətdar gün bizə ana dilimizin keçdiyi şərəfli yolu, onun qorunması uğrunda göstərilən səyləri və gələcək nəsillər qarşısında məsuliyyətimizi xatırladır.Hər bir Azərbaycan vətəndaşı ana dilinə böyük ehtiramla yanaşmalı, onun zənginliyini qorumalı, düzgün istifadəsinə diqqət yetirməli və bu qiymətli milli sərvəti gələcək nəsillərə layiqincə ötürməlidir. Çünki dilini yaşadan xalq öz milli varlığını, tarixini və gələcəyini qoruyur.

Anar Əhmədov

YAP Kəlbəcər rayon təşkilatının məsləhətçisi

Paylaş:

Baxılıb: 317 dəfə