Zəka, iradə və qələbənin simvolu!

Bakı:

25 °C

57 %

7 m/s

Əlaqə

AZ RU EN

Ana səhifə / Arxiv / Zəka, iradə və qələbənin simvolu!

Zəka, iradə və qələbənin simvolu!

24.07.2026 [08:36]

Vüqar Həşimov Azərbaycan şahmatının unudulmayan simasıdır...

Bu gün Azərbaycan şahmat tarixinin parlaq simalarından, beynəlxalq arenada ölkəmizin adını böyük uğurla təmsil etmiş görkəmli qrossmeyster Vüqar Həşimovun doğum günüdür. Vüqar Həşimov təkcə qazandığı qələbələrlə deyil, həm də yüksək intellekti, mübariz ruhu və təvazökarlığı ilə milyonlarla insanın rəğbətini qazanmış biri kimi yaddaşlarda yaşayır. 6 yaşından atasının köməyi ilə şahmatla məşğul olmağa başlayıb. Kiçik yaşlarında 3 dəfə ölkə, 4 dəfə Avropa qalibi olub. Lakin ağır xəstəlik Azərbaycan şahmatını Vüqarsız qoydu. Onun vəfatı təkcə Azərbaycan deyil, bütün dünya şahmatı üçün böyük itkidir.

Vüqar Həşimov karyerasının pik nöqtəsində FİDE-nin reytinq cədvəlində 6-cı pilləyə qədər yüksəlməyi bacarmışdı. Üçqat Azərbaycan çempionu olmuş və 2009-cu ildə Azərbaycan yığmasının Avropa çempionu olmasında “qələbə qolunu” vuran Vüqar Həşimov, təəssüf ki, beyin xərçənginə qalib gələ bilmədi. O, 1995, 1996 və 1998-ci illərdə Azərbaycan çempionu olub. 1996-2001-ci illərdə Avropa və dünya çempionatlarında 7 dəfə mükafata layiq görülüb. 1999-cu ildə beynəlxalq şahmat ustası, 2002-ci ildə isə qrossmeyster tituluna yiyələnib.

Vüqar Həşimov dörd dəfə - 2002, 2004, 2006 və 2008-ci illərdə şahmat olimpiadalarında Azərbaycan yığma komandasının heyətində çıxış edib. 2009-cu il mayın 7-9-da Heydər Əliyev kuboku uğrunda yarışlar çərçivəsində Bakıda dünya yığmasına qarşı çıxış edən Azərbaycan yığmasının heyətinə daxil olub. 2007-ci ildə şahmat üzrə Avropa komanda çempionatında bürünc medal qazanıb.

2011-ci ildə Avropa çempionatında yığma komandanın heyətində vitse-çempion, 2010-2011-ci illərdə Recio Emiliyada (İtaliya) keçirilən turnirdə qalib olub. FIDE reytinqində ən yüksək nailiyyəti 6-cı yer olan Vüqar Həşimov 26 yaşlı Teymur Rəcəbov və 28 yaşlı Şəhriyar Məmmədyarovla birgə çox güclü bir komanda təşkil edirdilər və onların iştirak etdiyi Azərbaycan milli komandası daima beynəlxalq yarışlarda qızıl medallara iddialı olub.

Ağır xəstəliklə mübarizə aparmasına baxmayaraq, iradəsini heç vaxt itirməyən, həyat eşqini və şahmata olan sonsuz sevgisini qoruyub saxlayan Vüqar Həşimov 2014-cü ildə cəmi 27 yaşında dünyasını dəyişib. Onun adı Azərbaycan idman tarixində silinməz iz buraxıb, yarımçıq qalan arzuları isə bu gün ölkəmizin gənc şahmatçılarının yeni qələbələrində yaşamağa davam edir.

24 iyul 2014-cü ildə Vüqar Həşimovun qəbirüstü abidəsinin açılış mərasimi olub. Bürüncdən olan abidənin müəllifi məşhur heykəltəraş Azad Əliyevdir.

Yeganə BAYRAMOVA

Paylaş:

Baxılıb: 406 dəfə