Azərbaycan–Slovakiya münasibətləri: strateji əməkdaşlığın yeni mərhələsi

Bakı:

26 °C

61 %

9 m/s

Əlaqə

AZ RU EN

Ana səhifə / Arxiv / Azərbaycan–Slovakiya münasibətləri: strateji əməkdaşlığın yeni mərhələsi

Azərbaycan–Slovakiya münasibətləri: strateji əməkdaşlığın yeni mərhələsi

17.07.2026 [17:44]

Fidan Hüseynova

YAP Quba rayon təşkilatının sədri

2026-cı il iyulun 14-də Slovakiya Respublikasının Prezidenti Peter Pelleqrinin Azərbaycana rəsmi səfəri çərçivəsində Şuşada keçirilən görüş və Prezident İlham Əliyevin mətbuata bəyanatı təkcə iki ölkə arasında münasibətlərin növbəti mərhələsini müəyyənləşdirən siyasi hadisə deyil, həm də Azərbaycanın beynəlxalq mövqeyinin daha da möhkəmləndiyini nümayiş etdirən mühüm diplomatik mesaj idi.

Diqqət çəkən əsas məqam ondan ibarətdir ki, dövlət başçısı bu bəyanatı Azərbaycanın mədəniyyət paytaxtı, tarixi Zəfərimizin rəmzi olan Şuşadan səsləndirdi. Bu, təsadüfi seçim deyil. Şuşa artıq yalnız tarixi və mədəni irsin daşıyıcısı kimi deyil, beynəlxalq siyasi dialoqların, yüksək səviyyəli görüşlərin keçirildiyi nüfuzlu diplomatik məkana çevrilib. Dünyanın müxtəlif ölkələrinin dövlət və hökumət başçılarının məhz Şuşaya səfər etməsi Azərbaycanın yaratdığı yeni geosiyasi reallığın beynəlxalq səviyyədə qəbulunun növbəti təzahürüdür.

Prezident İlham Əliyevin çıxışında xüsusi yer tutan məsələlərdən biri Azərbaycan ilə Slovakiya arasında münasibətlərin yüksələn xətt üzrə inkişaf etməsi idi. Son illərdə siyasi dialoqun intensivləşməsi, qarşılıqlı səfərlərin artması və iqtisadi əməkdaşlığın genişlənməsi göstərir ki, tərəflər münasibətləri strateji məzmunla zənginləşdirmək niyyətindədirlər. Dövlət başçısının vurğuladığı kimi, ölkələrimiz arasında qarşılıqlı etimad mövcuddur və bu etimad gələcək əməkdaşlıq üçün möhkəm zəmin yaradır.

Bəyanatda diqqəti cəlb edən mühüm məqamlardan biri də Qarabağ və Şərqi Zəngəzurda həyata keçirilən bərpa-quruculuq işlərinin beynəlxalq əməkdaşlıq müstəvisində təqdim olunması idi. Azərbaycanın qısa müddət ərzində azad edilmiş ərazilərdə həyata keçirdiyi nəhəng infrastruktur layihələri, "Ağıllı kənd" və "Ağıllı şəhər" konsepsiyalarının tətbiqi artıq xarici tərəfdaşların da marağına səbəb olur. Slovakiya şirkətlərinin bu prosesdə iştirak etməsi göstərir ki, Qarabağın bərpası təkcə milli layihə deyil, eyni zamanda beynəlxalq iqtisadi əməkdaşlığın yeni platformasına çevrilməkdədir.

Prezident İlham Əliyevin çıxışında Azərbaycanın Avropa ilə əməkdaşlığa verdiyi önəm də aydın şəkildə ifadə olundu. Ölkəmizin enerji təhlükəsizliyinin təmin edilməsində artan rolu, etibarlı tərəfdaş kimi qazandığı nüfuz və nəqliyyat-logistika imkanlarının genişlənməsi Azərbaycanın regional deyil, qlobal əhəmiyyət daşıyan dövlət kimi mövqeyini daha da gücləndirir. Bu gün Azərbaycan müxtəlif maraqları uzlaşdırmağı bacaran, əməkdaşlığı qarşıdurmadan üstün tutan xarici siyasət yürüdür.

Şuşada səsləndirilən mesajların digər mühüm istiqaməti regionda davamlı sülhün və sabitliyin təmin olunması ilə bağlı idi. Azərbaycan postmünaqişə dövründə yalnız dağıdılmış əraziləri bərpa etmir, eyni zamanda Cənubi Qafqazın gələcəyini əməkdaşlıq, qarşılıqlı hörmət və iqtisadi inteqrasiya üzərində qurmağa çalışır. Bu siyasət beynəlxalq tərəfdaşlar tərəfindən də getdikcə daha geniş dəstək qazanır.

Slovakiya Prezidenti Peter Pelleqrinin Qarabağda aparılan genişmiqyaslı quruculuq işlərinə yüksək qiymət verməsi, Azərbaycanın regionun inkişafı və sabitliyində oynadığı rolu xüsusi vurğulaması ölkəmizin həyata keçirdiyi siyasətin beynəlxalq müstəvidə qəbul olunduğunu bir daha təsdiqləyir.

Prezident İlham Əliyevin Şuşada verdiyi bəyanat bir daha nümayiş etdirdi ki, Azərbaycan artıq təkcə öz milli maraqlarını uğurla təmin edən dövlət deyil, həm də regionun gələcəyini formalaşdıran, etibarlı tərəfdaş kimi qəbul edilən və beynəlxalq əməkdaşlıq üçün yeni imkanlar yaradan mühüm siyasi mərkəzə çevrilib. Bu gün Şuşadan verilən mesajlar yalnız iki ölkənin münasibətlərinə deyil, bütövlükdə Cənubi Qafqazın gələcəyinə dair strateji baxışın ifadəsidir.

Azərbaycanın qazandığı uğurların əsasında isə Prezident İlham Əliyevin milli maraqlara söykənən uzaqgörən siyasəti, müstəqil xarici kursu və ölkənin beynəlxalq nüfuzunun davamlı şəkildə yüksəldilməsi dayanır. Məhz bu siyasətin nəticəsidir ki, Şuşa artıq tarix yazan şəhər olmaqla yanaşı, gələcəyin beynəlxalq əməkdaşlıq platforması kimi də dünya siyasi gündəmində öz layiqli yerini tutmaqdadır.

Paylaş:

Baxılıb: 451 dəfə