Azərbaycan–Slovakiya münasibətlərində yeni əməkdaşlıq mərhələsi

Bakı:

25 °C

69 %

10 m/s

Əlaqə

AZ RU EN

Ana səhifə / Arxiv / Azərbaycan–Slovakiya münasibətlərində yeni əməkdaşlıq mərhələsi

Azərbaycan–Slovakiya münasibətlərində yeni əməkdaşlıq mərhələsi

17.07.2026 [15:20]

Azərbaycanın həyata keçirdiyi balanslaşdırılmış xarici siyasət Avropa dövlətləri ilə əməkdaşlığın davamlı inkişafına mühüm zəmin yaradır. Bu baxımdan Slovakiya Prezidenti Peter Pelleqrinin Azərbaycana rəsmi səfəri iki ölkə arasında siyasi dialoqun, iqtisadi tərəfdaşlığın və strateji əməkdaşlığın yeni mərhələyə yüksəldiyini nümayiş etdirən mühüm diplomatik hadisə kimi qiymətləndirilir. Səfər çərçivəsində keçirilən yüksək səviyyəli görüşlər, imzalanan sənədlər və verilən bəyanatlar Azərbaycan–Slovakiya münasibətlərinin perspektivlərinin kifayət qədər geniş olduğunu göstərdi.

Prezident İlham Əliyevin dəvəti ilə Azərbaycana gələn Slovakiya Prezidenti Peter Pelleqrini Bakıda rəsmi qarşılanma mərasimindən sonra Prezident İlham Əliyevlə təkbətək və geniş tərkibdə görüş keçirdi. Daha sonra dövlət başçıları birgə mətbuat konfransında çıxış edərək əməkdaşlığın əsas istiqamətlərini açıqladılar. Səfər proqramına Şuşa və Ağdama səfərlər də daxil edildi və Slovakiya nümayəndə heyəti azad olunmuş ərazilərdə aparılan genişmiqyaslı bərpa və yenidənqurma işləri ilə tanış oldu.

Prezident İlham Əliyev mətbuata bəyanatında bildirdi ki, Azərbaycan və Slovakiya arasında siyasi münasibətlər yüksək səviyyədədir və qarşılıqlı etimada əsaslanır. Dövlət başçısı qeyd etdi ki, iqtisadi əlaqələrin genişləndirilməsi, qarşılıqlı investisiyaların təşviqi, enerji təhlükəsizliyi, nəqliyyat və sənaye sahələrində əməkdaşlıq hər iki ölkənin maraqlarına uyğundur. Prezident vurğuladı ki, Avropanın enerji təhlükəsizliyinin təmin edilməsində Azərbaycanın rolu getdikcə artır və bu istiqamətdə Slovakiya ilə əməkdaşlığın inkişafı üçün əlverişli imkanlar mövcuddur.

Peter Pelleqrini isə çıxışında Azərbaycan ilə Slovakiya münasibətlərinin yalnız iqtisadi maraqlarla məhdudlaşmadığını, qarşılıqlı hörmət və etimada söykəndiyini bildirdi. O qeyd etdi ki, iki ölkənin birgə səyləri əməkdaşlığın real nəticələr verdiyini nümayiş etdirir. Slovakiya Prezidenti Azərbaycanın regionda mühüm tərəfdaş olduğunu vurğulayaraq enerji, innovasiya, nəqliyyat, müdafiə sənayesi və iqtisadiyyatın digər sahələrində əməkdaşlığın genişləndirilməsində maraqlı olduqlarını ifadə etdi.

Səfər zamanı iqtisadi əməkdaşlıq xüsusi diqqət mərkəzində oldu. Bakıda keçirilən Azərbaycan–Slovakiya Biznes Forumu iki ölkənin iş adamlarını və investorlarını bir araya gətirdi. Forumda sənaye, energetika, kənd təsərrüfatı, rəqəmsal texnologiyalar, logistika və infrastruktur layihələri üzrə əməkdaşlıq imkanları müzakirə edildi. Slovak şirkətlərinin Azərbaycanın azad edilmiş ərazilərində həyata keçirilən yenidənqurma layihələrində iştirak perspektivləri də əsas müzakirə mövzularından biri oldu.

Enerji sahəsi Azərbaycan–Slovakiya münasibətlərinin strateji istiqamətlərindən biri kimi ön plana çıxır. Azərbaycan uzun illərdir Avropanın etibarlı enerji tərəfdaşı kimi tanınır. Təbii qazın Cənub Qaz Dəhlizi vasitəsilə Avropa bazarlarına çatdırılması enerji təhlükəsizliyinin möhkəmləndirilməsində mühüm rol oynayır. Slovakiya da enerji mənbələrinin şaxələndirilməsində maraqlı ölkələrdən biridir və bu baxımdan Azərbaycan ilə əməkdaşlıq hər iki tərəf üçün qarşılıqlı fayda yaradır.

Nəqliyyat və logistika sahəsində əməkdaşlıq da mühüm perspektivlər vəd edir. Azərbaycanın Orta Dəhliz layihəsində artan rolu Avropa ilə Asiya arasında yükdaşımaların genişlənməsinə xidmət edir. Slovakiyanın Mərkəzi Avropadakı coğrafi mövqeyi isə bu marşrutun inkişafında əlavə imkanlar yaradır. Bu səbəbdən tərəflər nəqliyyat əlaqələrinin genişləndirilməsini və logistika sahəsində birgə layihələrin həyata keçirilməsini vacib hesab edirlər.

Prezident Pelleqrinin Şuşaya səfəri xüsusi siyasi və simvolik əhəmiyyət daşıdı. O, Qarabağda aparılan yenidənqurma işlərini yüksək qiymətləndirərək Slovakiyanın bu prosesdə iştirak etməyə hazır olduğunu bildirdi. Birgə bəyanatda Slovakiya Prezidenti vurğuladı ki, ölkəsinin Qarabağdakı layihələrdə izi qalacaq və bu əməkdaşlıq gələcəkdə daha da genişlənəcək.

Azərbaycan və Slovakiya arasında münasibətlərin tarixi son illərdə daha da intensiv xarakter alıb. Qarşılıqlı yüksək səviyyəli səfərlər, hökumətlərarası komissiyaların fəaliyyəti, parlamentlərarası əlaqələr və biznes platformalarının yaradılması münasibətlərin institusional əsaslarını möhkəmləndirib. Hər iki ölkə beynəlxalq təşkilatlar çərçivəsində də əməkdaşlığı davam etdirir və qarşılıqlı maraq doğuran məsələlər üzrə dialoqu inkişaf etdirir.

Mədəni-humanitar əməkdaşlıq da ikitərəfli münasibətlərin mühüm istiqamətlərindəndir. Təhsil, elm, turizm və mədəniyyət sahələrində əlaqələrin genişləndirilməsi xalqlar arasında qarşılıqlı anlaşmanın möhkəmlənməsinə xidmət edir. Gələcək illərdə tələbə mübadiləsi proqramlarının, birgə elmi layihələrin və turizm əlaqələrinin daha da inkişaf etdirilməsi gözlənilir.

Peter Pelleqrinin Azərbaycana rəsmi səfəri göstərdi ki, Bakı və Bratislava arasında münasibətlər yeni məzmun qazanır. Qarşılıqlı etimada əsaslanan siyasi dialoq, enerji və iqtisadi əməkdaşlığın genişlənməsi, nəqliyyat və logistika sahəsində yeni imkanlar, eləcə də azad olunmuş ərazilərin bərpasında Slovakiya şirkətlərinin iştirakı iki ölkənin strateji tərəfdaşlığını daha da gücləndirə bilər.

Müasir geosiyasi şəraitdə Azərbaycan–Slovakiya əlaqələrinin inkişafı həm ikitərəfli münasibətlər, həm də Avropa ilə Cənubi Qafqaz arasında əməkdaşlığın möhkəmləndirilməsi baxımından xüsusi əhəmiyyət kəsb edir. Peter Pelleqrinin Bakıya və Qarabağa səfəri bu əməkdaşlığın yeni mərhələsinin başlanğıcı kimi qiymətləndirilə bilər.

Araz Xudadanov

YAP Sabunçu rayon təşkilatının sədri

Paylaş:

Baxılıb: 561 dəfə