Qüdrətli Azərbaycan Ordusu – Zəfər tariximizi yazmış müzəffər güc

Bakı:

26 °C

61 %

7 m/s

Əlaqə

AZ RU EN

Ana səhifə / Arxiv / Qüdrətli Azərbaycan Ordusu – Zəfər tariximizi yazmış müzəffər güc

Qüdrətli Azərbaycan Ordusu – Zəfər tariximizi yazmış müzəffər güc

24.06.2026 [17:50]

26 İyun – Azərbaycan Respublikasının Silahlı Qüvvələri Günü xalqımızın qürur və iftixar hissi ilə qeyd etdiyi əlamətdar günlərdən biridir. Bu tarix Azərbaycan dövlətçiliyinin, milli təhlükəsizliyinin və müstəqilliyinin etibarlı təminatçısı olan ordumuzun şərəfli keçmişini, qazandığı böyük uğurları və gələcək inkişaf perspektivlərini özündə əks etdirir. Milli ordumuzun əsası 1918-ci il iyunun 26-da Azərbaycan Xalq Cümhuriyyəti tərəfindən qoyulmuş, bununla da müstəqil dövlətin müdafiəsini həyata keçirəcək nizami silahlı qüvvələrin formalaşdırılmasına başlanılmışdır. Qısa müddət ərzində milli hərbi hissələrin yaradılması, peşəkar kadrların hazırlanması və ordu quruculuğu sahəsində atılan addımlar gələcək inkişaf üçün möhkəm zəmin yaratmışdır.

Müstəqilliyin bərpasından sonra Azərbaycan çətin sınaqlarla üzləşmiş, Ermənistanın hərbi təcavüzü nəticəsində torpaqlarımızın bir hissəsi işğal olunmuşdu. Ölkədə yaranmış mürəkkəb vəziyyət güclü dövlət idarəçiliyinə və peşəkar ordu quruculuğuna böyük ehtiyac yaratmışdı. Məhz belə bir zamanda xalqın tələbi ilə hakimiyyətə qayıdan ümummilli lider Heydər Əliyev dövlətçiliyin qorunması ilə yanaşı, güclü və nizami ordunun formalaşdırılması istiqamətində mühüm addımlar atdı. Onun rəhbərliyi altında Silahlı Qüvvələrdə vahid komandanlıq sistemi yaradıldı, hərbi intizam möhkəmləndirildi, peşəkar kadr hazırlığı genişləndirildi və ordunun maddi-texniki bazasının gücləndirilməsi istiqamətində mühüm işlər görüldü. 1998-ci ildə imzalanmış Fərmanla 26 İyunun Silahlı Qüvvələr Günü kimi təsis olunması Azərbaycan Ordusunun xidmətlərinə verilən yüksək qiymətin təzahürü idi.

Sonrakı illərdə Prezident, Silahlı Qüvvələrin Ali Baş Komandanı İlham Əliyevin rəhbərliyi ilə Azərbaycan Ordusu öz inkişafının yeni mərhələsinə qədəm qoydu. Hərbi büdcənin artırılması, ən müasir silah və texnikaların alınması, hərbi infrastrukturun yenilənməsi və müdafiə sənayesinin inkişaf etdirilməsi nəticəsində ordumuz regionun ən güclü silahlı qüvvələrindən birinə çevrildi. Əsgər və zabitlərin sosial rifahının yüksəldilməsi, yeni hərbi şəhərciklərin salınması, müasir təlim mərkəzlərinin yaradılması və beynəlxalq təcrübənin tətbiqi Silahlı Qüvvələrimizin döyüş qabiliyyətini daha da artırdı. Azərbaycan Ordusunda vətənpərvərlik ruhu, dövlətə sədaqət və xalqına xidmət prinsipləri əsas dəyərlər kimi qorunub saxlanılır.

2020-ci ildə baş vermiş 44 günlük Vətən müharibəsi Azərbaycan Ordusunun qüdrətini bütün dünyaya nümayiş etdirdi. Müzəffər Ali Baş Komandan İlham Əliyevin rəhbərliyi ilə həyata keçirilən uğurlu hərbi əməliyyatlar nəticəsində Azərbaycan tarixi Zəfər qazandı. Uzun illər işğal altında qalmış torpaqlarımız azad edildi, ölkəmizin ərazi bütövlüyü təmin olundu və Azərbaycan xalqının otuz ilə yaxın davam edən həsrətinə son qoyuldu. Şuşanın azad edilməsi hərb tariximizin ən parlaq səhifələrindən birinə çevrildi. Azərbaycan əsgəri yüksək peşəkarlıq, qəhrəmanlıq və Vətən sevgisi nümayiş etdirərək öz adını tarixə qızıl hərflərlə yazdı. Şəhidlərimizin müqəddəs xatirəsi xalqımızın yaddaşında əbədi yaşayır, qazilərimizin şücaəti isə daim böyük ehtiramla qarşılanır.

Bu gün Azərbaycan Ordusu müstəqilliyimizin, suverenliyimizin və təhlükəsizliyimizin əsas dayağıdır. Müasir çağırışlara cavab verən Silahlı Qüvvələrimiz yüksək hazırlıq səviyyəsi, müasir silahlanması və peşəkar şəxsi heyəti ilə ölkəmizin müdafiəsini etibarlı şəkildə təmin edir. Xalq-ordu birliyi Azərbaycan dövlətinin gücünü daha da artırır və milli həmrəyliyin bariz nümunəsi kimi çıxış edir. 26 İyun – Azərbaycan Respublikasının Silahlı Qüvvələri Günü münasibətilə bütün hərbi qulluqçulara, veteranlara, şəhid ailələrinə və qazilərimizə dərin minnətdarlıq və ehtiram ifadə olunur. Qüdrətli Azərbaycan Ordusu bundan sonra da dövlətimizin suverenliyinin keşiyində inamla dayanacaq, şanlı bayrağımızı daim yüksəklərdə dalğalandıracaq və yeni uğurların müəllifi olacaqdır.

Rövşən Qasımov,

YAP Gədəbəy rayon təşkilatının məsləhətçisi

Paylaş:

Baxılıb: 324 dəfə