Xəzər regionunun aparıcı enerji tədbiri

Bakı:

22 °C

58 %

4 m/s

Əlaqə

AZ RU EN

Ana səhifə / Arxiv / Xəzər regionunun aparıcı enerji tədbiri

Xəzər regionunun aparıcı enerji tədbiri

03.06.2026 [15:42]

Səyyad Mirzəyev

YAP Ağdam rayon təşkilatının əməkdaşı

İyunun 1-də Azərbaycan Respublikasının Prezidenti İlham Əliyev Bakı Ekspo Mərkəzində Bakı Enerji Həftəsi çərçivəsində keçirilən 31-ci Beynəlxalq Xəzər Neft və Qaz Sərgisi “Caspian Oil and Gas”, 14-cü Xəzər Beynəlxalq Təmiz Enerji Sərgisi “Caspian Power” və 31-ci “Baku Energy Forum”un rəsmi açılış mərasimində iştirak etdi. Prezident cənab İlham Əliyev bu tədbirdə geniş məzmunlu çıxışla Azərbaycanın enerji siyasətinin əsas istiqamətlərini beynəlxalq ictimaiyyətin diqqətinə çatdırdı. Bakı Enerji Həftəsi artıq uzun illərdir ki, dünyanın enerji gündəliyinin formalaşdırıldığı ən nüfuzlu beynəlxalq platformalardan biri kimi tanınır. Xəzər regionunun aparıcı enerji tədbiri hesab olunan bu forum müxtəlif ölkələrdən dövlət rəsmilərini, enerji şirkətlərinin rəhbərlərini, investorları və ekspertləri bir araya gətirərək enerji təhlükəsizliyi, yeni texnologiyalar və yaşıl enerji keçidi istiqamətində fikir mübadiləsi üçün geniş imkanlar yaradır. Prezident İlham Əliyev çıxışında vurğuladı ki, vaxtilə təşkil olunan ilk Xəzər Neft və Qaz Sərgisi müasir Azərbaycanın enerji inkişafının əsasını qoyub. Dövlət başçısının sözləri ilə desək, “Xəzər Neft və Qaz Sərgisi müasir Azərbaycanın enerji inkişafının təməlini qoydu. Vaxt keçdikcə bu tədbir daha da genişləndi və Bakı Enerji Həftəsinə çevrildi.” Bu fikir Azərbaycanın enerji sektorunda əldə etdiyi uğurların başlanğıc nöqtəsinin məhz beynəlxalq əməkdaşlıq və açıq iqtisadi siyasət olduğunu bir daha təsdiqləyir. Azərbaycanın həyata keçirdiyi enerji strategiyası son otuz ildə ölkənin iqtisadi və siyasi müstəqilliyinin möhkəmlənməsində mühüm rol oynayıb. Enerji resurslarından əldə olunan gəlirlər hesabına ölkədə genişmiqyaslı infrastruktur layihələri reallaşdırılıb, sosial rifah yüksəlib, iqtisadi sabitlik təmin olunub və Azərbaycan etibarlı tərəfdaş kimi beynəlxalq nüfuzunu gücləndirib. Bu gün ölkəmiz yalnız enerji istehsalçısı deyil, həm də Avrasiyanın enerji təhlükəsizliyinin təmin edilməsində vacib iştirakçılardan biridir.Prezident İlham Əliyevin çıxışında xüsusi yer tutan məsələlərdən biri də enerji keçidi və yaşıl enerji layihələri olub. Dövlət başçısı Azərbaycanın ənənəvi enerji resursları ilə yanaşı, bərpa olunan enerji mənbələrinin inkişafına da böyük önəm verdiyini qeyd edib. Qarabağ və Şərqi Zəngəzur iqtisadi rayonlarının “yaşıl enerji zonası” elan olunması, günəş və külək enerjisi sahəsində beynəlxalq investorlarla həyata keçirilən layihələr Azərbaycanın gələcək enerji strategiyasının əsas istiqamətlərindən biridir.

Forum çərçivəsində aparılan müzakirələr də göstərdi ki, qlobal enerji bazarında baş verən dəyişikliklər fonunda Azərbaycan həm ənənəvi enerji resurslarının etibarlı təchizatçısı, həm də yaşıl enerji istehsalçısı kimi mövqeyini gücləndirir. Xüsusilə Avropa bazarlarına qaz ixracının genişləndirilməsi və bərpa olunan enerji layihələrinin reallaşdırılması ölkəmizin beynəlxalq tərəfdaşları tərəfindən yüksək qiymətləndirilir.

Bakı Enerji Həftəsi bu strateji kursun dünyaya təqdim olunduğu ən mühüm beynəlxalq platformalardan biri olaraq əhəmiyyətini qoruyub saxlayır.

Paylaş:

Baxılıb: 337 dəfə