Dayanıqlı şəhərlərinin qurulmasına mühüm töhfə

Bakı:

18 °C

63 %

8 m/s

Əlaqə

AZ RU EN

Ana səhifə / Arxiv / Dayanıqlı şəhərlərinin qurulmasına mühüm töhfə

Dayanıqlı şəhərlərinin qurulmasına mühüm töhfə

21.05.2026 [14:53]

2026-cı il mayın 18-də Bakı şəhərində keçirilən Ümumdünya Şəhərsalma Forumunun XIII Sessiyası beynəlxalq ictimaiyyətin diqqət mərkəzində oldu. Dünyanın müxtəlif ölkələrindən dövlət nümayəndələrinin, şəhərsalma üzrə ekspertlərin və beynəlxalq təşkilatların qatıldığı tədbir müasir urbanizasiya, dayanıqlı inkişaf və gələcəyin şəhərləri mövzusunda mühüm müzakirə platformasına çevrildi. Forumun açılış mərasimində çıxış edən Azərbaycan Prezidenti İlham Əliyev ölkəmizin son illərdə əldə etdiyi uğurlardan, şəhərsalma sahəsində görülən işlərdən və Azərbaycanın beynəlxalq əməkdaşlığa verdiyi töhfələrdən bəhs etdi.

Dövlətimizin başçısı çıxışında vurğuladı ki, Azərbaycan müasir şəhərsalma və infrastruktur layihələrinin həyata keçirilməsində böyük təcrübəyə malikdir. Son illərdə ölkənin müxtəlif bölgələrində geniş abadlıq və quruculuq işləri aparılmış, yeni yollar, yaşayış kompleksləri, parklar və sosial obyektlər istifadəyə verilmişdir. Prezident İlham Əliyev qeyd etdi ki, şəhərlərin inkişafı yalnız tikinti prosesi deyil, eyni zamanda insanların rahat və təhlükəsiz yaşayışının təmin edilməsidir.

Çıxış zamanı Bakı şəhərinin müasir simasının formalaşdırılması istiqamətində görülən işlər xüsusi vurğulandı. Bildirildi ki, paytaxtda tarixi irsin qorunması ilə yanaşı, müasir memarlıq nümunələrinin yaradılması şəhərin beynəlxalq nüfuzunu artırıb. Bakı bu gün dünyanın mühüm siyasi, iqtisadi və humanitar tədbirlərinə ev sahibliyi edən şəhərlərdən birinə çevrilib.

Prezident İlham Əliyev işğaldan azad edilmiş ərazilərdə həyata keçirilən yenidənqurma layihələrinə də toxundu. Qeyd olundu ki, Qarabağ və Şərqi Zəngəzur bölgələrində “ağıllı şəhər” və “ağıllı kənd” konsepsiyalarına uyğun layihələr icra edilir. Həmin ərazilərdə müasir infrastruktur yaradılır, ekoloji cəhətdən təmiz enerji mənbələrindən istifadə genişləndirilir və dayanıqlı inkişaf prinsipləri əsas götürülür.

Forum çərçivəsində urbanizasiya problemləri, iqlim dəyişiklikləri, ekoloji təhlükəsizlik və gələcəyin şəhər modelləri kimi vacib mövzular müzakirə edildi. Prezident İlham Əliyev çıxışında bildirdi ki, müasir şəhərlər insanların rifahına xidmət etməli, sosial bərabərliyi və ekoloji tarazlığı təmin etməlidir. Dövlət başçısı vurğuladı ki, gələcəyin şəhərləri innovativ texnologiyalar və davamlı inkişaf prinsipləri üzərində qurulmalıdır.

Bakıda WUF13 forumunun keçirilməsi Azərbaycanın beynəlxalq nüfuzunun artmasının göstəricisi kimi qiymətləndirilir. Bu tədbir ölkəmizin qlobal problemlərin həllində fəal iştirak etdiyini və beynəlxalq əməkdaşlığa böyük önəm verdiyini bir daha nümayiş etdirdi. Forum həmçinin Azərbaycanın şəhərsalma sahəsində qazandığı təcrübənin beynəlxalq səviyyədə təqdim olunması baxımından mühüm əhəmiyyət daşıdı.

Sonda Prezident İlham Əliyev forum iştirakçılarına uğurlar arzuladı və qeyd etdi ki, belə beynəlxalq tədbirlər ölkələr arasında əməkdaşlığın möhkəmlənməsinə, yeni təşəbbüslərin formalaşmasına və gələcəyin daha dayanıqlı şəhərlərinin qurulmasına mühüm töhfə verir.

Çingiz İbrahimov

YAP Göyçay rayon təşkilatının əməkdaşı

Paylaş:

Baxılıb: 228 dəfə