Azərbaycanın beynəlxalq arenada mövqeyini gücləndirən platforma

Bakı:

25 °C

63 %

0 m/s

Əlaqə

AZ RU EN

Ana səhifə / Arxiv / Azərbaycanın beynəlxalq arenada mövqeyini gücləndirən platforma

Azərbaycanın beynəlxalq arenada mövqeyini gücləndirən platforma

21.05.2026 [10:28]

Bakı şəhərində keçirilən Ümumdünya Şəhərsalma Forumunun 13-cü Sessiyası Azərbaycanın beynəlxalq nüfuzunu bir daha nümayiş etdirən mühüm tədbirlərdən biri kimi yadda qaldı. Dünyanın müxtəlif ölkələrindən dövlət nümayəndələrinin, ekspertlərin, memarların və şəhərsalma üzrə mütəxəssislərin iştirak etdiyi forum qlobal urbanizasiya, dayanıqlı inkişaf və müasir şəhər idarəçiliyi məsələlərinin müzakirəsi baxımından böyük əhəmiyyət daşıdı.

Tədbirin açılış mərasimində Azərbaycan Respublikasının Prezidenti cənab İlham Əliyev geniş çıxış edərək ölkəmizin şəhərsalma siyasəti, həyata keçirilən iri layihələr və gələcək inkişaf prioritetləri barədə mühüm fikirlər səsləndirdi.

Möhtərəm Prezident çıxışında vurğuladı ki, Azərbaycan son illərdə şəhərsalma sahəsində mühüm nailiyyətlər əldə edib. Xüsusilə, paytaxt Bakı və digər bölgələrdə həyata keçirilən infrastruktur layihələri ölkənin sosial-iqtisadi inkişafına mühüm töhfə verib. Dövlət başçısı qeyd etdi ki, müasir şəhərsalma yalnız binaların tikintisi deyil, eyni zamanda insanların rahat və təhlükəsiz yaşayışının təmin olunması, ekoloji tarazlığın qorunması və innovativ texnologiyaların tətbiqi deməkdir.

Çıxış zamanı erməni işğalından azad olunmuş ərazilərdə aparılan genişmiqyaslı bərpa və yenidənqurma işlərinə də xüsusi diqqət ayrıldı. Cənab Prezident bildirdi ki, həmin ərazilərdə “ağıllı şəhər” və “ağıllı kənd” konsepsiyalarına uyğun layihələr həyata keçirilir. Müasir texnologiyaların tətbiqi, yaşıl enerji mənbələrindən istifadə və ekoloji yanaşmalar bu layihələrin əsas istiqamətlərini təşkil edir. Bu yanaşma Azərbaycanın gələcəyə hesablanmış inkişaf strategiyasının mühüm tərkib hissəsi kimi təqdim olundu.

Dövlət başçısı Azərbaycanın bu istiqamətdə beynəlxalq təşəbbüsləri dəstəklədiyini və əməkdaşlığa daim açıq olduğunu bildirdi.

Forum çərçivəsində səsləndirilən fikirlər Azərbaycanın müasir şəhərsalma və urbanizasiya sahəsində qabaqcıl təcrübəyə malik ölkələrdən birinə çevrildiyini göstərdi. Bakı şəhərinin belə mötəbər beynəlxalq tədbirə ev sahibliyi etməsi ölkəmizin artan nüfuzunun və təşkilatçılıq imkanlarının göstəricisi oldu

Nəticə etibarilə, Ümumdünya Şəhərsalma Forumunun 13-cü Sessiyası Azərbaycanın beynəlxalq arenada mövqeyini daha da gücləndirən mühüm platformaya çevrildi. Ölkə başçısının çıxışı forumun əsas məqamlarından biri olmaqla yanaşı, ölkənin şəhərsalma siyasətinin əsas istiqamətlərini və gələcəyə baxışını aydın şəkildə ortaya qoydu.

Nazim Bünyatov

YAP Ağcabədi rayon təşkilatının sədr müavini

Paylaş:

Baxılıb: 210 dəfə