Qədim irsin müasir şəhərsalmada təcəssümü

Bakı:

21 °C

78 %

3 m/s

Əlaqə

AZ RU EN

Ana səhifə / Arxiv / Qədim irsin müasir şəhərsalmada təcəssümü

Qədim irsin müasir şəhərsalmada təcəssümü

19.05.2026 [23:18]

Azərbaycan bu gün yalnız iqtisadi və siyasi uğurları ilə deyil, həm də zəngin tarixi-mədəni irsi ilə dünyanın diqqət mərkəzindədir. Prezident İlham Əliyev 2026-cı il mayın 18-də Bakıda keçirilən Ümumdünya Şəhərsalma Forumunun 13-cü Sessiyasındakı çıxışında xüsusi vurğuladı ki, xalqımız təkcə musiqisi və poeziyası ilə deyil, həm də memarlığında əks olunan qədim tarixi ilə fəxr edir. Dövlət başçısının bu fikirləri Azərbaycanın minilliklərə söykənən mədəni irsinin müasir inkişaf strategiyası ilə vəhdət təşkil etdiyini bir daha nümayiş etdirdi.

Bakının ev sahibliyi etdiyi Ümumdünya Şəhərsalma Forumunun 13-cü Sessiyası Azərbaycanın beynəlxalq nüfuzunun daha bir göstəricisi oldu. Prezident İlham Əliyevin qeyd etdiyi kimi, forumda 182 ölkədən 45 mindən artıq iştirakçı qeydiyyatdan keçmişdi və bu, tədbirin rekord göstəricilərindən biri hesab olunur. Bu fakt Azərbaycanın qlobal platformalarda artan rolunu, ölkəmizin beynəlxalq əməkdaşlığa verdiyi töhfələri və Bakı şəhərinin artıq mühüm beynəlxalq tədbirlərin keçirildiyi mərkəzə çevrildiyini təsdiqləyir.

Azərbaycanın qədim memarlıq ənənələri əsrlər boyu formalaşaraq bu günümüzədək gəlib çatmışdır. İçərişəhər, Şirvanşahlar Sarayı, Qız qalası, Qarabağ və Naxçıvan memarlıq məktəbləri xalqımızın yüksək estetik düşüncəsinin və zəngin mədəni dünyasının parlaq nümunələridir. Bu memarlıq nümunələri yalnız tarixi abidələr deyil, həm də milli kimliyimizin və dövlətçilik tariximizin mühüm daşıyıcılarıdır. Prezident İlham Əliyevin forumdakı çıxışı zamanı vurğuladığı kimi, Azərbaycanın şəhərsalma siyasəti qədim irsin qorunması ilə müasir urbanizasiya prinsiplərinin uzlaşdırılmasına əsaslanır.

Son illərdə Azərbaycanda həyata keçirilən genişmiqyaslı quruculuq və abadlıq işləri ölkənin müasir simasının formalaşmasına mühüm təsir göstərmişdir. Xüsusilə işğaldan azad olunmuş ərazilərdə aparılan bərpa və yenidənqurma layihələri “ağıllı şəhər” və “ağıllı kənd” konsepsiyalarına əsaslanır. Qarabağ və Şərqi Zəngəzurda həyata keçirilən layihələr həm milli-mədəni irsin qorunmasına, həm də ekoloji və dayanıqlı şəhərsalma prinsiplərinə uyğun şəkildə icra olunur. Bu isə Azərbaycanın gələcəyə hesablanmış inkişaf modelinin əsas istiqamətlərindən biridir.

Bakının müasir memarlıq siması da qədimliklə yeniliyin harmoniyasını əks etdirir. Paytaxtda həyata keçirilən layihələr şəhərin tarixi ruhunu qorumaqla yanaşı, onu dünyanın qabaqcıl şəhərlərindən birinə çevirmək məqsədi daşıyır. Müasir infrastruktur, yaşıllıq zonalarının genişləndirilməsi, nəqliyyat sisteminin yenilənməsi və sosial obyektlərin tikintisi Azərbaycanın şəhərsalma sahəsində əldə etdiyi uğurların mühüm göstəriciləridir.

Ümumdünya Şəhərsalma Forumunun Bakıda keçirilməsi həm də Azərbaycanın beynəlxalq dialoq və əməkdaşlıq məkanı olduğunu göstərdi. Forum çərçivəsində dayanıqlı şəhərlər, iqlim dəyişiklikləri, urbanizasiya və insan rifahı ilə bağlı mühüm məsələlər müzakirə olundu. Azərbaycanın bu tədbirə yüksək səviyyədə ev sahibliyi etməsi ölkəmizin qlobal problemlərin həllinə verdiyi töhfənin göstəricisi kimi qiymətləndirildi.

Prezident İlham Əliyevin çıxışında səsləndirdiyi fikirlər bir daha göstərdi ki, Azərbaycan öz qədim tarixi və zəngin mədəni irsi ilə fəxr edir, eyni zamanda müasir inkişaf yolunda inamla irəliləyir. Musiqimizdə, poeziyamızda və memarlığımızda yaşayan milli ruh bu gün dövlət siyasətinin mühüm istiqamətlərindən birinə çevrilmişdir. Tarixi köklərə bağlılıq və müasirliyə açıq olmaq Azərbaycanın inkişaf modelinin əsas mahiyyətini təşkil edir.

Ehtibar İsmayılov

YAP Ordubad rayon təşkilatının sədri

Paylaş:

Baxılıb: 227 dəfə