YAP Kəlbəcər rayon təşkilatı tərəfindən “Əvəzsiz tarixi şəxsiyyət – Ulu Öndər Heydər Əliyev” adlı tədbir keçirildi

Bakı:

19 °C

55 %

2 m/s

AZ RU EN

Ana səhifə / Arxiv / YAP Kəlbəcər rayon təşkilatı tərəfindən “Əvəzsiz tarixi şəxsiyyət – Ulu Öndər Heydər Əliyev” adlı tədbir keçirildi

YAP Kəlbəcər rayon təşkilatı tərəfindən “Əvəzsiz tarixi şəxsiyyət – Ulu Öndər Heydər Əliyev” adlı tədbir keçirildi

08.05.2026 [13:59]

Yeni Azərbaycan Partiyası Kəlbəcər rayon təşkilatı tərəfindən Göygöl rayonunun Uçtəpə qəsəbəsində fəaliyyət göstərən Kəlbəcər rayon 115 nömrəli tam orta məktəbdə Ulu Öndər Heydər Əliyevin anadan olmasının 103-cü ildönümünə həsr olunmuş “Əvəzsiz tarixi şəxsiyyət – Ulu Öndər Heydər Əliyev” adlı tədbir keçirildi.

Tədbirdə YAP Kəlbəcər rayon təşkilatının sədri Həbib Misirov, Kəlbəcər rayon təhsil sektorunun müdiri Namiq Rəcəbov, Kəlbəcər rayon 115 nömrəli tam orta məktəbin direktoru Aqil Muxtarov, eləcə də pedaqoji kollektivin üzvləri iştirak etdilər.
Əvvəlcə tədbir iştirakçıları müasir Azərbaycan dövlətinin memarı və qurucusu Ulu Öndər Heydər Əliyevin və Vətən uğrunda canlarını fəda etmiş şəhidlərimizin əziz xatirəsini bir dəqiqəlik sükutla yad etdilər.

YAP Kəlbəcər rayon təşkilatının sədri Həbib Misirov çıxış edərək bildirdi ki, müasir Azərbaycan dövlətinin qurucusu və memarı olan Heydər Əliyev xalqımızın taleyində mühüm rol oynamış dahi şəxsiyyətdir. XX əsrin 90-cı illərinin əvvəllərində ölkədə hökm sürən siyasi böhran, xaos, iqtisadi tənəzzül və vətəndaş qarşıdurması Azərbaycan dövlətçiliyini ciddi təhlükə ilə üz-üzə qoymuşdu. Belə bir ağır və taleyüklü dövrdə xalqın təkidli tələbi ilə 1993-cü ildə hakimiyyətə qayıdan Ulu Öndər Heydər Əliyev Azərbaycanı parçalanmaq və məhv olmaq təhlükəsindən xilas etdi, ölkədə sabitlik və inkişafın əsasını qoydu. O qeyd etdi ki, Ulu Öndər Heydər Əliyev yalnız böyük siyasətçi deyil, həm də xalqını ürəkdən sevən dahi şəxsiyyət idi. O, milli-mənəvi dəyərlərin qorunmasına xüsusi önəm vermiş, azərbaycançılıq ideologiyasını dövlət siyasətinin əsas istiqamətlərindən birinə çevirmişdir. Onun zəngin siyasi fəaliyyəti və xalqa bağlılığı Azərbaycanın müstəqilliyinin möhkəmlənməsində mühüm rol oynamışdır. Ulu Öndərin adı Azərbaycan tarixinin ən şərəfli səhifələrinə qızıl hərflərlə yazılmışdır. Onun əsasını qoyduğu siyasi kurs bu gün də Azərbaycan Respublikasının Prezidenti İlham Əliyev tərəfindən uğurla davam etdirilir. Sədr Həbib Misirov qeyd etdi ki, cənab Prezident İlham Əliyev 2003-cü ildə fəaliyyətə başladığı ilk gündən Ulu Öndərin siyasi kursuna sadiq qalacağını bəyan etmiş və bu siyasəti uğurla davam etdirmişdir. 2020-ci ildə baş vermiş 44 günlük Vətən müharibəsində xalqımızın birliyi, şəhidlərimizin qəhrəmanlığı, qazilərimizin şücaəti və rəşadətli Ordumuzun gücü sayəsində torpaqlarımız işğaldan azad edilmişdir. 2023-cü ildə isə Xankəndidə Azərbaycanın dövlət suverenliyi tam bərpa olunmuş, bu gün üçrəngli bayrağımız Qarabağda və Şərqi Zəngəzurda qürurla dalğalanmaqdadır.

Kəlbəcər rayon təhsil sektorunun müdiri Namiq Rəcəbov çıxışında bildirdi ki, Ulu Öndər Heydər Əliyevin Azərbaycan dövləti və xalqı qarşısındakı xidmətləri misilsizdir. O, həm sovet dövründə, həm də müstəqillik illərində ölkəmizin inkişafı, dövlətçiliyimizin möhkəmlənməsi və beynəlxalq nüfuzunun artması istiqamətində böyük xidmətlər göstərmişdir. Onun rəhbərliyi ilə Azərbaycan keçmiş SSRİ məkanında geridə qalmış respublikadan inkişaf edən sənaye və mədəniyyət mərkəzlərindən birinə çevrilmişdir. Qeyd etdi ki, Ulu Öndər Heydər Əliyevin təhsil sahəsinə göstərdiyi diqqət və qayğı nəticəsində on minlərlə gənc həm SSRİ-nin nüfuzlu ali məktəblərində, həm də xarici ölkələrin universitetlərində təhsil almağa göndərilmiş, ölkədə müasir təhsil infrastrukturu formalaşdırılmışdır. Bu siyasət milli kadr potensialının güclənməsinə xidmət etmişdir.

Bu gün də Ulu Öndərin təhsil siyasəti Prezident İlham Əliyev tərəfindən uğurla davam etdirilir. Eyni zamanda, Heydər Əliyev Fondunun təşəbbüsü ilə yeni məktəblərin tikintisi, mövcud təhsil müəssisələrinin yenidən qurulması və müasir təhsil layihələrinin həyata keçirilməsi davam etdirilir.
Bildirdi ki, möhtərəm Prezidentin rəhbərliyi ilə Qarabağ və Şərqi Zəngəzur iqtisadi rayonlarında həyata keçirilən genişmiqyaslı bərpa və quruculuq işləri nəticəsində işğaldan azad olunmuş ərazilər sürətlə dirçəlir. Bu proses həmin bölgələrin gələcəkdə ölkənin mühüm təhsil, iqtisadi və sosial mərkəzlərindən birinə çevrilməsi üçün möhkəm baza yaradır.

Məktəbin direktoru Aqil Muxtarov çıxışında Ulu Öndər Heydər Əliyevin Azərbaycanın dövlətçilik tarixindəki misilsiz xidmətlərindən, sabitliyin təmin olunması və müstəqil dövlət quruculuğu istiqamətində həyata keçirdiyi uzaqgörən siyasətdən bəhs etdi. O bildirdi ki, Ulu Öndərin müəyyən etdiyi siyasi kurs bu gün Prezident İlham Əliyev tərəfindən uğurla davam etdirilir və Azərbaycan daha da güclənərək inkişaf edir.
Qeyd edildi ki, bu gün Birinci vitse-prezident Mehriban xanım Əliyeva da dövlətimizin inkişafına, beynəlxalq nüfuzunun artmasına mühüm töhfələr verir. O, təhsil, mədəniyyət və incəsənət sahələrinin inkişafına xüsusi diqqət göstərir, şəhid ailələrinə, qazilərə və həssas təbəqələrə daim həssaslıqla yanaşır.

Sonda YAP Kəlbəcər rayon təşkilatının ictimai-siyasi həyatında fəal iştirak edən bir qrup partiya üzvü fəxri fərmanlarla təltif olundu.

Paylaş:

Baxılıb: 199 dəfə