Azərbaycan güləşinin uğur modeli

Bakı:

17 °C

82 %

6 m/s

Əlaqə

AZ RU EN

Ana səhifə / Arxiv / Azərbaycan güləşinin uğur modeli

Azərbaycan güləşinin uğur modeli

04.05.2026 [10:52]

Azərbaycan güləşi bu gün təsadüfi uğurlar üzərində qurulmayıb. Bu sahədə formalaşmış zəngin ənənələr müasir yanaşma ilə sintez olunaraq yeni keyfiyyət mərhələsinə keçib. Xüsusilə diqqət çəkən məqam odur ki, artıq yalnız tanınmış və təcrübəli idmançılar deyil, gənc nəslin nümayəndələri də yüksək nəticələr əldə edirlər. Bu isə seleksiya və hazırlıq sisteminin düzgün qurulduğunu, ehtiyat qüvvələrin davamlı şəkildə yetişdirildiyini göstərir. İdmanda nəsillərarası keçidin uğurla təmin olunması hər bir ölkə üçün strateji əhəmiyyət daşıyır və Azərbaycan bu sahədə sabit model formalaşdırmağa nail olub.

Aprelin 30-da Prezident İlham Əliyevin Avropa çempionatında komanda hesabında qalib olmuş güləşçilərlə görüşü Azərbaycan idmanının inkişaf modelinin ən mühüm xüsusiyyətlərini bir daha aydın şəkildə ortaya qoydu. Bu görüş təkcə əldə olunan nəticələrin qeyd olunması deyildi, eyni zamanda ölkədə idmanın necə sistemli və davamlı şəkildə inkişaf etdiyini nümayiş etdirən mühüm siyasi mesaj idi.

Ümumilikdə isə Azərbaycan idmanının inkişaf dinamikası daha geniş kontekstdə qiymətləndirilməlidir. Olimpiya Oyunlarından tutmuş dünya və Avropa çempionatlarına qədər müxtəlif platformalarda əldə olunan nəticələr ölkənin artan gücünü və beynəlxalq nüfuzunu əks etdirir. İdmanda qələbə və məğlubiyyətin yanaşı olması təbiidir, lakin əsas meyar idmançılarda qalibiyyət ruhunun qorunub saxlanılmasıdır. Məhz bu xüsusiyyət Azərbaycan idmançılarının əsas fərqləndirici cəhətlərindən birinə çevrilib. Burada mühüm amillərdən biri də idmanın dövlət siyasətinin ayrılmaz tərkib hissəsi kimi inkişaf etdirilməsidir. Uzun illər ərzində formalaşmış idarəetmə modeli nəticəsində bu sahədə ardıcıllıq təmin olunub. Müxtəlif nəsillərin yetişməsi, onların bir-birini əvəz etməsi və eyni zamanda nəticələrin aşağı düşməməsi bu siyasətin effektivliyini sübut edir. Bu, yalnız idman infrastrukturu ilə deyil, həm də düzgün təşkil olunmuş idarəetmə, peşəkar məşqçi heyəti və sistemli yanaşma ilə bağlıdır.

Xüsusi diqqət yetirilməli məqamlardan biri də qadın güləşinin inkişafıdır. Cənab Prezident İlham Əliyevin qeyd etdiyi kimi, Azərbaycanda bu istiqamətin sürətlə irəliləməsi cəmiyyətdə idmana marağın daha geniş sosial bazaya yayıldığını göstərir. Qadın idmançıların beynəlxalq arenada uğur qazanması həm gender balansının təmin olunması, həm də idmanın kütləviliyinin artırılması baxımından mühüm əhəmiyyət daşıyır. Bu sahədə əldə olunan nəticələr gələcəkdə daha böyük uğurlar üçün ciddi əsas yaradır. Digər tərəfdən, milli komandada formalaşmış sağlam psixoloji mühit və komanda ruhu uğurların əsas faktorlarından biridir. İdmançıların bir-birinə dəstək verməsi, qələbələri kollektiv sevincə çevirməsi vahid məqsəd ətrafında birləşmənin göstəricisidir. Bu amil isə nəticələrin davamlılığını təmin edən əsas sütunlardan biri kimi çıxış edir.

Natiq Quluzadə

YAP Zəngilan rayon təşkilatının sədri

Paylaş:

Baxılıb: 339 dəfə