İdman tarixində parlaq səhifə

Bakı:

12 °C

82 %

2 m/s

Əlaqə

AZ RU EN

Ana səhifə / Arxiv / İdman tarixində parlaq səhifə

İdman tarixində parlaq səhifə

04.05.2026 [10:47]

Tiranada keçirilmiş güləş üzrə Avropa çempionatında milli komandamızın komanda hesabında qazandığı tarixi qələbə Azərbaycanın idman tarixində parlaq səhifələrdən biri kimi yadda qaldı. Prezident İlham Əliyevin çempion güləşçilərlə görüşü zamanı səsləndirdiyi fikirlər bu zəfərin təkcə idman nailiyyəti deyil, həm də ölkəmizin sistemli inkişafının, vətənpərvərlik ruhunun və düzgün dövlət siyasətinin təzahürü olduğunu bir daha təsdiqlədi.

Prezident İlham Əliyev qeyd etdi ki, müasir dünyada güləş üzrə rəqabət kifayət qədər gərgin xarakter daşıyır və belə bir şəraitdə Avropa çempionatında komanda hesabında birinci olmaq, əlbəttə ki, böyük nailiyyətdir. Dövlət başçısı idmançılarımızın öz peşəkarlıqlarını nümayiş etdirərək ədalətli mübarizədə rəqiblərini üstələmələrini yüksək qiymətləndirdi. Bu uğur təsadüfi deyil, bu, ölkəmizdə güləş ənənələrinin yaşadılması, məşq və seleksiya prosesinin düzgün qurulması, eləcə də bölgələrdəki Olimpiya İdman komplekslərinin potensialından səmərəli istifadə olunmasının nəticəsidir. “Nəsillər dəyişir, amma bir şey dəyişmir – o da Azərbaycan idmanının uğurları,” – deyən Prezident, federasiya rəhbərliyində təmsil olunan veteran idmançıların yetişdirdiyi yeni nəslin də eyni uğurlu yolu davam etdirdiyini xüsusi vurğuladı.

Prezident İlham Əliyevin çıxışında diqqət çəkən ən mühüm məqamlardan biri idmançıların medallardan daha çox, onların cəmiyyətdə nümayiş etdirdikləri davranış və mənəvi keyfiyyətlərə verilən önəm idi. Dövlət başçısı idmançıların həm xalça üzərində, həm də ondan kənarda ləyaqətli davranmalarını, özlərini cəmiyyətdə layiqincə aparmalarını yüksək dəyərləndirdi. Qeyd olundu ki, bəzən beynəlxalq yarışlarda, xüsusən də Avropa çempionatlarında Azərbaycan idmançılarına qarşı müəyyən qərəzli yanaşmalar və hakim ədalətsizlikləri ilə qarşılaşırıq. Belə anlarda belə, idmançılarımızın təmkinli, qürurlu və ləyaqətli qalması vacibdir. Bu, həm də idmançılarımızın milli kimliyini və vətənpərvərlik ruhunu əks etdirir.

Azərbaycanın idman siyasəti dövlət siyasətinin ayrılmaz hissəsidir. Ölkəmizdə keçirilən beynəlxalq yarışlar Azərbaycanın idman potensialını dünyaya nümayiş etdirib. Prezident qadın güləşinin inkişafına, qızların bu sahədə qazandıqları nailiyyətlərə toxunaraq, gələcəkdə daha çox qızıl medallar qazanılacağına inamını ifadə etdi. Milli komandada hökm sürən vahid ailə mühiti, idmançıların bir-birinin qələbəsinə sevinməsi, gənc nəslin vətənpərvərlik ruhunda yetişməsi üçün ən yaxşı tərbiyə məktəbidir.

Sonda Prezident İlham Əliyev bir daha bütün idmançıları, məşqçiləri və federasiya kollektivini təbrik edərək, bu qələbə sevincinin bütün Azərbaycan xalqına məxsus olduğunu vurğuladı. İdmançılarımız üçün ən böyük mükafat xalqın onlara olan sevgisi və bayrağımızın yüksəldiyi anlarda yaşanan qürur hissidir. Azərbaycan idmanı öz uğurlu yolunu davam etdirir və ölkəmiz daim yeni zirvələri fəth etməyə hazırdır.

Əlişah Rəcəbov

YAP Ağdaş rayon təşkilatının sədri

Paylaş:

Baxılıb: 154 dəfə