Azərbaycanda uşaq hüquqlarının qorunmasında yeni mərhələ

Bakı:

16 °C

94 %

4 m/s

Əlaqə

AZ RU EN

Ana səhifə / Arxiv / Azərbaycanda uşaq hüquqlarının qorunmasında yeni mərhələ

Azərbaycanda uşaq hüquqlarının qorunmasında yeni mərhələ

20.04.2026 [17:57]

Bir dövlətin gələcəyə münasibətini ən aydın göstərən meyarlardan biri onun uşaqlara yanaşmasıdır. Uşağın təhlükəsizliyi, təhsili, sağlamlığı və ləyaqətinin necə qorunduğu əslində həmin cəmiyyətin hansı dəyərlər üzərində qurulduğunu ortaya qoyur. Azərbaycan Respublikasında 2026-cı il 3 mart tarixində qəbul edilən yeni “Uşaq hüquqları haqqında” Qanun da məhz bu baxımdan təkcə hüquqi sənəd deyil, dövlətin gələcək nəsillərə verdiyi strateji təminat kimi qiymətləndirilməlidir.

Bu qanun bir daha göstərir ki, müasir Azərbaycan dövlət siyasətində uşaq məsələsi yalnız sosial mövzu deyil, milli inkişaf strategiyasının əsas sütunlarından biridir. Burada söhbət yalnız hüquqların kağız üzərində sadalanmasından getmir, söhbət uşağın həyatının bütün mərhələlərini əhatə edən sistemli dövlət yanaşmasından gedir.

Yeni qanunun ən diqqətçəkən tərəfi “uşağın üstün mənafeləri” prinsipinin əsas xətt kimi müəyyən olunmasıdır. Bu, o deməkdir ki, dövlət orqanlarından təhsil müəssisələrinə, ailədən cəmiyyətə qədər qəbul edilən bütün qərarlarda uşağın rifahı, təhlükəsizliyi və inkişafı əsas meyar olmalıdır. Müasir hüquqi dövlət məhz belə qurulur: ən həssas təbəqənin hüquqları önə çəkilməklə.

Xüsusilə uşaqlara qarşı zorakılıq, erkən evlilik və rəqəmsal mühitdə təzyiq halları ilə bağlı müddəalar qanunun sosial əhəmiyyətini daha da artırır. Bu gün uşaqların üzləşdiyi risklər yalnız fiziki mühitlə məhdudlaşmır. İnternet üzərindən psixoloji təzyiq, zorakılıq və manipulyasiya halları da ciddi təhlükə yaradır. Yeni qanunun bu çağırışları nəzərə alması dövlətin qabaqlayıcı və çevik yanaşmasının göstəricisidir.

Burada xüsusilə Ailə, Qadın və Uşaq Problemləri üzrə Dövlət Komitəsinin fəaliyyətinə toxunmaq vacibdir. Komitə son illərdə erkən evliliklərin qarşısının alınması, uşaqlara qarşı zorakılıq hallarının aşkarlanması, ailə institutunun möhkəmləndirilməsi və maarifləndirmə istiqamətində mühüm işlər həyata keçirib. Regionlarda təşkil olunan görüşlər, məktəblərdə aparılan maarifləndirmə tədbirləri və risk qrupunda olan ailələrlə iş bu fəaliyyətin real nəticələrini ortaya qoyur. Yeni qanunun bir sıra müddəaları məhz bu praktiki fəaliyyətin hüquqi müstəvidə daha da gücləndirilməsi kimi görünür.

Xüsusilə erkən evliliklə bağlı sərt yanaşma cəmiyyət üçün mühüm mesajdır. Uşağın gələcəyi onun iradəsi xaricində müəyyən edilə bilməz. Ailə dəyərlərinin qorunması yalnız ənənə ilə deyil, hüquqla, təhsil və maarifləndirmə ilə mümkündür. Dövlətin bu məsələyə prinsipial yanaşması gələcəkdə sosial problemlərin qarşısının alınması baxımından böyük əhəmiyyət daşıyır.

Əslində bu qanun bu günün hüquqi sənədi olmaqla yanaşı, sabahın Azərbaycanı üçün yazılmış yol xəritəsidir. Çünki uşağın hüququ qorunan cəmiyyət daha güclü, daha sabit və daha inkişaf etmiş cəmiyyət olur. Dövlətin böyüklüyü bəzən ən çox onun ən kiçik vətəndaşına necə sahib çıxmasında görünür.

Bu qanun da məhz həmin məsuliyyətin və dövlət qayğısının hüquqi ifadəsidir.

Misir Məmmədov
YAP Laçın rayon təşkilatının fəal üzvü

Paylaş:

Baxılıb: 484 dəfə