Güclü kənd təsərrüfatı güclü dövlətin əsas dayaqlarından biridir

Bakı:

20 °C

77 %

7 m/s

Əlaqə

AZ RU EN

Ana səhifə / YAP xəbərləri / Güclü kənd təsərrüfatı güclü dövlətin əsas dayaqlarından biridir

Güclü kənd təsərrüfatı güclü dövlətin əsas dayaqlarından biridir

01.06.2026 [14:57]

Fəsli Nəbiyev

YAP Gənclər Birliyinin sədr müavini

Azərbaycan Respublikasının Prezidenti İlham Əliyevin kənd təsərrüfatı məsələlərinə həsr olunmuş müşavirədə səsləndirdiyi fikirlər ölkəmizdə aqrar sektorun inkişafına verilən strateji əhəmiyyəti bir daha nümayiş etdirir. Dövlət başçısı çıxışında vurğulayıb ki, kənd təsərrüfatının inkişafı təkcə iqtisadi məsələlər deyil, həm də ərzaq təhlükəsizliyinin möhkəmləndirilməsi, regionların inkişafı, məşğulluğun artırılması və sosial rifahın yüksəldilməsi baxımından xüsusi əhəmiyyət daşıyır.

Prezident İlham Əliyev qeyd edib ki, 2004-cü ildən etibarən həyata keçirilən regional inkişaf proqramları nəticəsində ölkənin bütün bölgələrində genişmiqyaslı infrastruktur layihələri icra olunub, qaz, elektrik enerjisi, yol və su təminatı sahələrində əsaslı dəyişikliklər baş verib. Bu layihələr kənd təsərrüfatının inkişafı üçün möhkəm zəmin yaratmaqla yanaşı, kənd yerlərində yaşayan insanların həyat səviyyəsinin yüksəlməsinə də mühüm töhfə verib.

Müşavirədə dövlət başçısı aqrar sahədə həyata keçirilən islahatların nəticələrinə də toxunaraq pambıqçılıq, baramaçılıq, üzümçülük, fındıqçılıq və digər istiqamətlərdə əldə olunan uğurları diqqətə çatdırıb. Bildirilib ki, dövlət dəstəyi, subsidiya mexanizmləri, güzəştli kreditlər və müasir texnologiyaların tətbiqi sayəsində bir sıra sahələrdə istehsal həcmi dəfələrlə artıb, kənd təsərrüfatı ölkə iqtisadiyyatının mühüm istiqamətlərindən birinə çevrilib.

Prezident İlham Əliyev çıxışında qlobal çağırışların fonunda ərzaq təhlükəsizliyinin daha da aktuallaşdığını vurğulayıb. Dünyada müşahidə olunan müharibələr, iqlim dəyişiklikləri, nəqliyyat-logistika problemləri və beynəlxalq bazarlardakı qeyri-müəyyənliklər hər bir ölkənin daxili istehsal potensialını gücləndirməsini zəruri edir. Bu baxımdan Azərbaycanın qarşısında duran əsas vəzifələrdən biri kənd təsərrüfatında məhsuldarlığın artırılması və idxaldan asılılığın azaldılmasıdır.

Dövlət başçısı xüsusi olaraq vurğulayıb ki, regionların inkişafı və kəndlərin cəlbediciliyinin artırılması gələcək dövlət siyasətinin əsas istiqamətlərindən biri olaraq qalacaq. Məqsəd kəndlərdən şəhərlərə deyil, şəhərlərdən kəndlərə qayıdış meylinin formalaşdırılması, insanların doğma torpaqlarda yaşayıb işləməsi üçün daha əlverişli şəraitin yaradılmasıdır. Bu yanaşma həm sosial sabitliyin möhkəmləndirilməsinə, həm də dayanıqlı iqtisadi inkişafın təmin edilməsinə xidmət edir.

Müşavirədə yeni texnologiyaların tətbiqi, torpaqların elektron xəritələşdirilməsi, süni intellekt və peyk imkanlarından istifadə, müasir suvarma sistemlərinin genişləndirilməsi, aqroparkların inkişafı və investisiyaların artırılması kimi məsələlər də xüsusi diqqət mərkəzində olub. Prezident İlham Əliyev bildirib ki, 2026–2030-cu illəri əhatə edən yeni Dövlət Proqramı kənd təsərrüfatının inkişafına yeni impuls verəcək və Azərbaycanın ərzaq təhlükəsizliyinin daha da möhkəmləndirilməsinə xidmət edəcək.

Prezident İlham Əliyevin müşavirədə səsləndirdiyi müddəalar göstərir ki, Azərbaycanda kənd təsərrüfatının inkişafı dövlət siyasətinin prioritet istiqamətlərindən biri olaraq qalır. Qarşıya qoyulan məqsədlər və müəyyən edilən vəzifələr ölkəmizin aqrar potensialının daha səmərəli istifadəsinə, ərzaq təhlükəsizliyinin gücləndirilməsinə və regionların davamlı inkişafına mühüm töhfə verəcəkdir.

Paylaş:

Baxılıb: 102 dəfə