Dostluq və qardaşlıq münasibətləri

Bakı:

13 °C

82 %

6 m/s

Əlaqə

AZ RU EN

Ana səhifə / Arxiv / Dostluq və qardaşlıq münasibətləri

Dostluq və qardaşlıq münasibətləri

03.06.2025 [16:13]

Azərbaycanın beynəlxalq siyasətdə dostluq və qardaşlıq münasibətlərinə böyük önəm verməsi heç kimə sirr deyil. Bu baxımdan, tarixi, mədəni və dini yaxınlıq, ortaq maraqlar və strateji tərəfdaşlıq zəminində qurulan Azərbaycan-Türkiyə və Azərbaycan-Pakistan münasibətləri xüsusi önəm daşıyır. Hər iki ölkə ilə olan dostluq və qardaşlıq əlaqələri, yalnız diplomatik və iqtisadi sahələrdə deyil, həm də təhlükəsizlik, humanitar və mədəniyyət sahələrində sıx əməkdaşlıq şəklində özünü göstərir. Azərbaycan, Türkiyə və Pakistan üçlüyü bölgədə və dünyada sülhün və sabitliyin möhkəmləndirilməsində, habelə ortaq maraqların müdafiəsində güclü və əhəmiyyətli bir əməkdaşlıq nümunəsi kimi çıxış edir.

28 may 2025-ci il tarixində Azərbaycan Respublikasının Prezidenti İlham Əliyev Laçın şəhərində möhtəşəm bir çıxışla xalqımızın və bütün türk-müsəlman dünyasının qürur mənbəyinə çevrilən üçtərəfli qardaşlıq və əməkdaşlıq münasibətlərini bir daha təsdiqlədi. Bu tarixi gün eyni zamanda Azərbaycan Xalq Cümhuriyyətinin yaranmasının ildönümünə təsadüf edir və Azərbaycan dövlətçiliyinin zəfər günlərindən biridir.

Prezident İlham Əliyev öz nitqində Azərbaycanın ərazi bütövlüyünün bərpası və Laçının azad olunmasının tarixi əhəmiyyətindən danışdı. Dövlət başçısı Laçının sürətlə dirçəldiyini, şəhərin yeni həyat tərzinə qədəm qoyduğunu, həmçinin Qarabağ və Şərqi Zəngəzur bölgələrinin böyük potensiala malik olduğunu vurğuladı.

Ən önəmlisi isə, Prezident İlham Əliyev Azərbaycanın ən yaxın dost və strateji müttəfiqləri olan Türkiyə və Pakistanla münasibətlərin yüksək səviyyədə olduğunu bir daha diqqətə çatdırdı. Prezident İlham Əliyev vurğuladı ki, Azərbaycan-Türkiyə-Pakistan üçtərəfli əməkdaşlığı regionda sülhün, sabitliyin və inkişafın əsas təminatçılarından biridir. Türkiyə və Pakistanın Azərbaycanın 44 günlük Vətən müharibəsində və sonrakı bərpa prosesində göstərdiyi dəstək unudulmazdır.

Prezident İlham Əliyev qardaş ölkələrin dövlət başçılarına – Prezident Rəcəb Tayyib Ərdoğana və Baş nazir Şahbaz Şərifə xüsusi təşəkkürünü bildirdi. Çıxışında bu birlik və qardaşlığın yalnız sözlərlə deyil, real layihələr, iqtisadi-ticari əlaqələr və hərbi əməkdaşlıqla da möhkəmləndiyini qeyd etdi.

Azərbaycan-Türkiyə-Pakistan birliyi, əslində, tariximizin, mədəniyyətimizin və dinimizin dərin köklərinə söykənir. Üç ölkənin ortaq maraqları, bir-birinə olan sarsılmaz etibarı və birgə hərəkət strategiyası Cənubi Qafqaz və bütövlükdə Avrasiya regionunda güc balansını dəyişdirəcək əhəmiyyətə malikdir. Prezident İlham Əliyevin Laçında etdiyi bu çağırış, yalnız Azərbaycanın deyil, bütün Türk dünyasının gələcək inkişafının əsasını qoyan çağırış idi.

Bu gün Laçında Prezident İlham Əliyevin dilindən səslənən "Yaşasın Azərbaycan-Türkiyə-Pakistan birliyi və qardaşlığı!" şüarı hər birimizin qəlbində əbədi yaşamalıdır. Bu birlik gücümüzdür, gələcəyimizdir və bölgədə sülhün təminatçısıdır.

Beləliklə, Prezident İlham Əliyevin Laçında etdiyi bu tarixi çıxış, Azərbaycanın müstəqillik bayramının Laçında qeyd olunması ilə yanaşı, dost və qardaş ölkələrlə – Türkiyə və Pakistanla olan qardaşlıq və dostluq münasibətlərinin əbədi olaraq davam edəcəyini bir daha nümayiş etdirdi.

Fidan Hüseynova,
YAP Quba rayon təşkilatının sədri

Paylaş:

Baxılıb: 407 dəfə