Azərbaycan-İran münasibətlərində yeni səhifə

Bakı:

26 °C

49 %

2 m/s

Əlaqə

AZ RU EN

Ana səhifə / Arxiv / Azərbaycan-İran münasibətlərində yeni səhifə

Azərbaycan-İran münasibətlərində yeni səhifə

06.05.2025 [18:35]

Ağaverdi Əliverdiyev,

YAP Qusar rayon təşkilatının əməkdaşı

Azərbaycan Respublikası, İran İslam Respublikası ilə münasibətlərini mehriban qonşuluq, bərabərhüquqlu tərəfdaşlıq, qarşılıqlı hörmət və faydaya əsaslanan prinsiplər üzərində qurur və bu əlaqələrin inkişafında hər iki tərəfin nümayiş etdirdiyi güclü siyasi iradəni əsas götürür.

İran İslam Respublikası Azərbaycan Respublikasının müstəqilliyini 25 dekabr 1991-ci ildə tanımışdır və iki ölkə arasında diplomatik əlaqələr 12 mart 1992-ci ildə qurulmuşdur. Müstəqilliyimizin bərpasından sonra Azərbaycan qarşılıqlı hörmət və əməkdaşlıq prinsipini əsas götürərək, yaxın qonşuluq əlaqələrini daim prioritet kimi qəbul edib. Görüş zamanı Prezident İlham Əliyev çıxışında Azərbaycan ilə İran arasında mövcud olan mehriban qonşuluq münasibətlərinin təkcə tarixi və mədəni bağlarla deyil, eyni zamanda qarşılıqlı etimada əsaslanan strateji maraqlarla da möhkəmləndiyini vurğuladı. Dövlət başçısı bölgədə sülhün, sabitliyin və qarşılıqlı hörmətin təmin olunmasında İranla əməkdaşlığın xüsusi əhəmiyyət daşıdığını qeyd edərək, bu münasibətlərin həm regional, həm də beynəlxalq müstəvidə mühüm təsir gücünə malik olduğunu bildirdi. Tərəflər arasında müzakirə olunan əsas istiqamətlərdən biri nəqliyyat-tranzit imkanlarının genişləndirilməsi oldu. Prezident İlham Əliyev öz çıxışında “Şimal-Cənub” beynəlxalq nəqliyyat dəhlizinin inkişafını, Azərbaycan və İran arasında əməkdaşlığın mühüm dayağı kimi qiymətləndirdi. Bu layihə təkcə iki ölkənin deyil, ümumilikdə regionun iqtisadi xəritəsində əhəmiyyətli dəyişikliklərə səbəb ola biləcək miqyasda strateji önəm daşıyır.
Belə görüşlər, diplomatik münasibətlərin gündəlik axarından çıxaraq xalqlar arasında səmimi bağların formalaşmasına, ortaq tarix və mədəni dəyərlər əsasında daha da güclənməsinə şərait yaradır. Azərbaycanın və İranın dövlət başçılarının nümayiş etdirdiyi siyasi iradə, regionda sabitlik və rifah naminə atılan mühüm birgə addımların əlamətidir.

Öz növbəsində, İran İslam Respublikasının Prezidenti Məsud Pezeşkian da bildirib ki, calışacağıq ki, gələcək üçün geniş, əhatəli və daha yaxşı strateji planımız olsun. Bütün sahələrdə – sənaye, elm, mədəniyyət, iqtisadiyyat, siyasət, təhlükəsizlik üzrə planlarımız olsun. Biz birlikdə bölgədə sülh, təhlükəsizlik və əmin-amanlığı təmin edəcəyik və öz çətinliklərimizi həll edəcəyik. Əminəm ki, əgər biz müsəlman ölkələri, regional dövlətlər və qonşular, qədim dövrlərdən bir yerdə olmuş qardaş və bacılar əl-ələ verib bir-birinin ərazi bütövlüyünə hörmətlə yanaşsaq, dünyaya baxışlarımız qarşılıqlı qaydada razılaşdırılmış olacaq. Beləliklə, bütün sahələrdə əməkdaşlıq edə bilərik. Elə bir bölgə yarada, ölkələr arasında elə bir əlaqə qura bilərik ki, Avropa ölkələri arasında olan əlaqələrdən daha üstün olsun.Azərbaycan ilə İran arasında regional və beynəlxalq təşkilatlar, o cümlədən İslam Əməkdaşlıq Təşkilatı, İqtisadi Əməkdaşlıq Təşkilatı, Qoşulmama Hərəkatı çərçivəsində əməkdaşlıq davam edir. Azərbaycanla İran arasında Azərbaycan-İran-Rusiya, Azərbaycan-İran-Türkiyə, Azərbaycan-İran-Gürcüstan-Türkiyə və 3+3 regional məşvərət mexanizmi çərçivəsində də əməkdaşlıq mövcuddur.

Keçirilən görüş və verilən bəyanatlar onu göstərir ki, Azərbaycan beynəlxalq münasibətlərdə öz suverenliyinə, milli maraqlarına söykənərək uğurlu siyasət aparır və qonşularla münasibətlərdə ədalətli və qarşılıqlı faydalı əlaqələrin tərəfdarıdır. Əminik ki, cənab Prezidentin apardığı qətiyyətli siyasət nəticəsində Azərbaycan-İran əlaqələri yeni inkişaf mərhələsinə qədəm qoyacaq, bölgədə daha güclü sabitlik və rifah təmin olunacaq.

Paylaş:

Baxılıb: 464 dəfə