Bakıdan Gürcüstanın ərazi bütövlüyünə və suverenliyinə növbəti dəstək

Bakı:

23 °C

49 %

2 m/s

Əlaqə

AZ RU EN

Ana səhifə / Arxiv / Bakıdan Gürcüstanın ərazi bütövlüyünə və suverenliyinə növbəti dəstək

Bakıdan Gürcüstanın ərazi bütövlüyünə və suverenliyinə növbəti dəstək

11.06.2024 [10:00]

Qonşu və dost dövlət olan Gürcüstanın müstəqilliyinin ilk vaxtlarından üzləşdiyi əsas problemlərdən biri ölkə ərazisində separatizm ocaqlarının yaranması ilə bağlı olub. Rəsmi Tbilisi aradan onilliklər ötsə də, hələlik ölkənin bütün ərazisində suverenliyini tam təmin etməyə nail olmayıb. Mayın 9-da zamanında Gürcüstan ərazisində yaranan və yaxud yaradılan separatizm bölgələrindən birində - Tsxinvalidə “parlament seçkiləri” keçirilib. Bəs bu seçkilərə beynəlxalq səviyyədə münasibət necə olub?

Azərbaycanın suverenlik prinsipinə əsaslanan ədalətli mövqeyi

Azərbaycanın Xarici İşlər Nazirliyi Gürcüstanın Tsxinvali bölgəsində keçirilmiş qondarma “parlament seçkiləri”nə dair bəyanat yayıb.

Nazirliyin Mətbuat xidməti idarəsindən “Yeni Azərbaycan”a verilən məlumata görə, bəyanatda bildirilir ki, Azərbaycanın Xarici İşlər Nazirliyi Gürcüstanın suverenliyini və ərazi bütövlüyünü dəstəklədiyini bir daha təsdiqləyir və iyunun 9-da Gürcüstanın Tsxinvali bölgəsində keçirilmiş qondarma “parlament seçkiləri”ni, həmçinin onların nəticələrini tanımır.

Göründüyü kimi, Azərbaycan Gürcüstanın Tsxinvali bölgəsində keçirilmiş qondarma “parlament seçkiləri”nə yanaşmada müstəqillik və suverenlik prinsipini əsas götürüb. Sədd heyif ki, bu gün dünyanın nizamının pozulduğunu müşahidə edirik. Beynəlxalq münasibətlər sistemində bir sıra hallarda ikili standartlar və selektiv yanaşmalar önə çxır. Güc mərkəzləri və beynəlxalq təsisatlar oxşar məzmunlu problemlərə fərqli yanaşmalar ortaya qoyurlar. Bəzən işğalçı dövlətlər və separatçı qüvvələr vaxt itirilmədən sərt şəkildə cəzalandırılırlar. Digər hallarda isə münaqişələrin həlli onilliklər boyunca uzanır.

İş elə gətirib ki, qonşu və dost ölkələr olan Azərbaycan və Gürcüstan müstəqilliklərinin ilk illərində separatizmlə və ona yanaşmada beynəlxalq təşkilatların, güc mərkəzlərinin ikili standartlar prizmasından yanaşmalarının şahidi olublar. Azərbaycan ərazisindəki separatizm mənbəyini öz gücü ilə məhv etməyə nail oldu. Dost ölkə siyasətində suverenlik prinsipindən çıxış etsə də, hələlik ərazi bütövlüyünü təmin etməyə nail olmayıb. Azərbaycan da öz növbəsində haqq mübarizəsində daim Gürcüstanın yanında yer alır. İndiyədək respublikamız müxtəlif səviyyələrdə bu ölkənin ərazi bütövlüyünü və suverenliyini dəstəklədiyini birmənalı şəkildə bəyan edib.

Gürcüstan Azərbaycanın nümunəsini təkrarlayacaqmı?

İndiyədək Gürcüstan ərazisindəki separatizm probleminin aradan qaldırılması istqamətində müxtəlif variantlar təklif olunub. Güc mərkəzlərindən gələn belə təkliflərdən biri də Gürcüstanda federativ əsaslı dövlət quruluşu formalaşdırılması ilə bağlı idi. Həmin təklif özündə separatizm subyektlərinin Gürcüstanın tərkibində yüksək statusla mövcudluğunu ehtiva edirdi. Gürcüstan buna sərt şəkildə etirazlarını bildirdi və təklifi gündəliyinə qəbul etmədi.

Son vaxtlarda Gürcüstanın ərazi bütövlüyünün mütləq qaydada bərpa edəcəyi ilə bağlı müzakirələrin intensivliyi artıb. Verilən məlumatlarda vurğulanır ki, indiki geosiyasi reallıqlar fonunda Gürcüstan ərazisində də separatizmin aradan qaldırılmasının vaxtı çatıb. Gürcüstanın baş naziri İrakli Kobaxidzenin 26 may Müstəqillik Günü ilə bağlı çıxışından o qənaət hasil olub ki, hakimiyətin hədəflərində biri Gürcüstanın müstəqilliyinin 40-cı ildönümündə ölkənin ərazi bütövlüyünə nail olmaqdır. Kobaxidze çıxışı zamanı qısa müddət ərzində Gürcüstanın ərazi bütövlüyünün təmin olunması istiqamətində çox mühüm nəticələrin əldə olunacağını bəyan edib. Baş nazir bildirib ki, söhbət konkret 2030-cu ildən gedir: “2030-cu ildə abxaz və osetin qardaş və bacılarımızla vahid və güclü Gürcüstanda yaşamaq arzumuzdur. Vahid və güclü Gürcüstan Avropa ailəsinin tamhüquqlu üzvü olmalıdır”.

Heç şübhəsiz ki, Gürcüstanın indiki rəhbərliyinin ölkənin ərazi bütövlüyünün və suverenliyinin tam təmin olunması ilə bağlı konkret hədəflər müəyyənləşdirməsinə təsir göstərən amillər sırasında Azərbaycanın yaratdığı reallıqlar təsirsiz ötüşməyib. Azərbaycanın qətiyyət nümayiş etdirməsi, böyük güclərə qarşı özünün dəyişməz mövqeyini ortaya qoyması və əlbəttə ki, gücü, hərbi potensialı tarixi ədalətin, beynəlxalq hüququn təmin edilməsində həlledici amillər qismində çıxış etdi. Gürcüstan Azərbaycanın nümunəsini təkrarlayacaqmı? Bunu zaman göstərəcək.

Mübariz FEYİZLİ

Paylaş:

Baxılıb: 636 dəfə