YAP Mərkəzi Aparatında Vyetnam-Azərbaycan və Laos-Azərbaycan dostluq qruplarının nümayəndə heyətləri ilə görüş keçirilib

Bakı:

11 °C

93 %

3 m/s

AZ RU EN

Ana səhifə / Arxiv / YAP Mərkəzi Aparatında Vyetnam-Azərbaycan və Laos-Azərbaycan dostluq qruplarının nümayəndə heyətləri ilə görüş keçirilib

YAP Mərkəzi Aparatında Vyetnam-Azərbaycan və Laos-Azərbaycan dostluq qruplarının nümayəndə heyətləri ilə görüş keçirilib

08.05.2024 [18:57]

Mayın 8-də Yeni Azərbaycan Partiyası (YAP) Sədrinin müavini – Mərkəzi Aparatın rəhbəri Tahir Budaqov Vyetnam-Azərbaycan və Laos-Azərbaycan dostluq qruplarının nümayəndə heyətlərini qəbul edib.

Qonaqları salamlayan YAP Sədrinin müavini – Mərkəzi Aparatın rəhbəri Tahir Budaqov Azərbaycanın istər Vyetnam, istərsə də Laosla xüsusilə də BMT və Qoşulmama Hərəkatı çərçivəsində səmərəli əməkdaşlıq əlaqələrinə malik olduğunu qeyd edib. Xalqlarımız arasındakı münasibətlərin təməlinin hələ SSRİ dövründə qoyulduğunu diqqətə çatdıran Tahir Budaqov Vyetnam xalqının öndəri Ho Şi Minin 1959-cu ildə Azərbaycana, xalqımızın Ümummilli Lideri Heydər Əliyevin isə SSRİ Nazirlər Soveti Sədrinin birinci müavini kimi 1983-cü ildə Vyetnama səfərinin tarixi əhəmiyyətinə diqqəti cəlb edib. O, həm Vyetnam, həm də Laosdan olan çox sayda tələbənin SSRİ dövründə Azərbaycanda ali təhsil aldıqlarını, onlardan bir çoxunun ölkələrinə qayıtdıqdan sonra yüksək vəzifələrdə çalışdıqlarını və ictimai-siyasi həyatda fəal rol oynadıqlarını, eləcə də ölkələrimiz arasında əlaqələrin inkişafına mühüm töhfələr verdiklərini söyləyib.

Tahir Budaqov vurğulayıb ki, qarşılıqlı səfərlər dövlətlərarası əməkdaşlığın dərinləşməsinə təkan verir. YAP Sədrinin müavini 2014-cü ildə Prezident İlham Əliyevin Vyetnam Sosialist Respublikasına dövlət səfərinin, 2015-ci ildə isə Vyetnam Prezidenti Truonq Tan Sanqın Azərbaycana rəsmi səfərinin bu kontekstdə xüsusi önəm daşıdığını bildirib.

YAP Mərkəzi Aparatının rəhbəri qeyd edib ki, Yeni Azərbaycan Partiyasının hakim partiyalar olan Vyetnam Kommunist Partiyası (VKP) və Laos Xalq İnqilab Partiyası (LXİP) ilə əlaqələri möhkəm təməllər üzərində inkişaf etməkdədir. O, 2022-ci ilin noyabrında LXİP nümayəndə heyətinin Yeni Azərbaycan Partiyasının 30 illik yubiley tədbirində və Asiya Siyasi Partiyaları Beynəlxalq Konfransının (ICAPP) YAP-ın ev sahibliyi ilə keçirilən “Təhlükəsizlik və əməkdaşlıq: Siyasi partiyaların rolu” mövzusunda xüsusi konfransında iştirakının, eləcə də VKP nümayəndə heyətinin ICAPP-ın sözügedən xüsusi konfransına onlayn formatda qatılmasının, 2022-ci il noyabrın 24-də ölkəmizə səfəri çərçivəsində VKP nümayəndə heyəti ilə keçirilən görüşün, həmçinin VKP-nin dəvəti ilə YAP nümayəndə heyətinin 2023-cü il 19-24 noyabr tarixlərində Vyetnama səfərinin və bu çərçivədə partiyalar arasında əməkdaşlıq sazişinin imzalanmasının əhəmiyyətini xüsusi vurğulayıb. O qeyd edib ki, YAP-ın həm VKP, həm də LXİP ilə imzaladığı əməkdaşlıq sazişindən irəli gələn vəzifələrin icra olunması qarşılıqlı faydalı işbirliyinin inkişafına xidmət edir.

Vyetnam nümayəndə heyətinin rəhbəri, Vyetnam-Azərbaycan Dostluq Assosiasiyası sədrinin müavini, Vyetnam Sosialist Respublikası Elmlər Akademiyasının eksperti Fam Honq Kuan səmimi qəbula görə təşəkkür edərək Azərbaycana yenidən səfər etməkdən son dərəcə məmnun olduqlarını bildirib.

O, dostluq və tərəfdaşlıq əlaqələrinə malik olan Azərbaycan ilə Vyetnam arasında münasibətlərin yüksələn xətlə inkişafının məmnunluq doğurduğunu söyləyib.

Ali təhsilini ölkəmizdə aldığını və Azərbaycan xalqının dost münasibətini daim hiss etdiyini bildirən Fam Honq Kuan respublikamızın uğurla inkişaf etdiyini diqqətə çatdırıb. Vyetnam nümayəndə heyətinin rəhbəri səfər çərçivəsində Şuşa və Füzuli şəhərlərini ziyarət etdiklərini və işğaldan azad olunmuş ərazilərdə genişmiqyaslı yenidənqurma işlərinin əyani şahidi olduqlarını qeyd edib.

Laos nümayəndə heyətinin rəhbəri, Laos Xalq Demokratik Respublikasının energetika və mədənlər nazirinin müavini Sonqfat İntsavonq da Azərbaycanda səfərdə olmaqdan məmnunluğunu ifadə edib. O, səfər çərçivəsində keçirilən görüşlərin ölkələrarası münasibətlərin inkişafına mühüm töhfə olacağını diqqətə çatdırıb.

Sonqfat İntsavonq Azərbaycan ilə Laos arasında müxtəlif sahələrdə mübadilələrin aparılmasının önəmindən bəhs edib və ölkələrarası əməkdaşlığı dərinləşdirmək üçün geniş potensialın mövcud olduğunu söyləyib.

S.İntsavonq Azərbaycanda ali təhsil aldığı illərin onun üçün unudulmaz və əlamətdar olduğunu qeyd edərək ölkəmizin qısa müddət ərzində sürətli inkişaf yolu keçdiyini vurğulayıb.

Görüş zamanı qarşılıqlı maraq doğuran digər bir sıra məsələlər də müzakirə edilib.

Sonda qonaqlara hədiyyələr təqdim olunub və xatirə fotosu çəkdirilib.

Paylaş:

Baxılıb: 595 dəfə