Ukraynanın əks-hücum planı

Bakı:

25 °C

61 %

4 m/s

Əlaqə

AZ RU EN

Ana səhifə / Analitik / Ukraynanın əks-hücum planı

Ukraynanın əks-hücum planı

28.04.2023 [11:01]

Müharibənin gedişində nə dəyişəcək?

Mübariz FEYİZLİ

Artıq bir ildən çoxdur ki, davam edən Rusiya-Ukrayna müharibəsinin sonu görünmür. Ötən hər gün müharibə tərəfləri həm texnika, həm də canlı qüvvə sarıdan böyük itkilər verirlər. İtkilər artsa da, son vaxtlarda mövqelərdə ciddi dəyişikliklər müşahidə edilmir. Kollektiv Qərbin Ukraynaya hərbi və digər təyinatlı dəstəyi artırmasının fonunda ekspertlər yaxın perspektivdə müharibənin daha dəhşətli ssenari ilə davam edəcəyini proqnozlaşdırırlar.

Döyüşlərdə sürprizlər olacaq

Ukrayna ilk vaxtlarda müəyyən ərazi itkilərinə məruz qalsa da, sonradan kollektiv Qərbin dəstəyi sayəsində müqaviməti artırmağa nail oldu. Artıq hər kəsə bəllidir ki, sürətli müharibə taktikası iflasa uğrayıb. Hazırda Ukraynadan əks-hücum əməliyyatlarına başlamağın zamanının yetişdiyi barədə xəbərlər gəlməkdədir. Bununla bağlı Ukraynanın ən yüksəksəviyyəli rəsmiləri açıqlamalar verirlər. Prezident Volodimir Zelenski bildirib ki, Ukrayna müdafiəçiləri əks-hücuma və işğal olunmuş ərazilərini azad etməyə hazırlaşırlar. O, sərt mesajlarını dilə gətirərək vurğulayıb ki, düşmən Ukraynanı tərk etməsə, məhv olacaq.

Ukrayna müdafiə naziri Aleksey Reznikov isə əks-hücum əməliyyatların hamı üçün sürpriz olacağını deyib. Nazir vurğulayıb ki, Rusiya hərbçiləri əks-hücum haqda nə qədər uzun müddət xəbərsiz olsalar, bir o qədər uğurlu olacaq.

Ukrayna Müdafiə Nazirliyinin rəhbəri əlavə edib ki, xəbər resurslarından nəyisə gizlətmək çətindir, üstəlik, hərbçilərin özləri də sosial mediada aktivdirlər: azad edilmiş yaşayış məntəqəsinə daxil olaraq dərhal selfi çəkirlər və yayımlayırlar, hər şey hər kəsə aydın olur. Nazirin sözlərinə görə, cəmiyyətin əks-hücum gözləntiləri bir qədər qızışıb, hamı növbəti qələbəni gözləyir: “Əvvəllər qələbəyə inanmırdılar, istəyirdilər ki, Ukrayna ən azı minimum səviyyədə qalsın, özünün heç olmasa bir hissəsini qoruyub saxlasın. Silahlı Qüvvələr uğur qazananda hamı qələbəyə inanmağa başladı - Zmeynı adasından sonra Kiyev, Çerniqov, Sumı və Xarkov vilayətləri, eləcə də Xerson. Növbəti qələbəni istəyirlər. Bu normaldır, emosiyalardır. Əlbəttə, Müdafiə Nazirliyi ukraynalıların əks-hücumdan gözləntilərini dəyişə bilməz, amma başa düşmək lazımdır ki, bu, müharibədir, burada hər şey çox çətindir”.

“Azov” batalyonunun sözçüsü Bohdan Kroteviç isə öz açıqlamasında bir az da irəli gedib. O, “The Washington Post”a bildirib ki, Ukrayna əks-hücum zamanı əraziləri geri almaq üçün Rusiyanın kiçik şəhərlərini ələ keçirmək taktikasından istifadə edə bilər. Fikirlərinə davam edən Kroteviç vurğulayıb ki, Ukrayna Silahlı Qüvvələri Rusiyanın kiçik şəhərlərini ələ keçirmək taktikasından “əvvəllər işğal altına düşən ərazilərin geri qaytarılması üçün rıçaq kimi istifadə etməyə” cəhd göstərə bilər. O, həmçinin əlavə edib ki, “Azov” “Azovstal”da böyük döyüş təcrübəsi qazanıb və gələcək toqquşmalarda bu təcrübə işə yaraya bilər.

Ukraynada əks-hücuma keçmək üçün təqribən 40 000 nəfərə təlim keçildiyi də gələn xəbərlər sırasındadır. Bu barədə “Reuters” agentliyi ukraynalı çağırışçılara və yüksək rütbəli komandirlərə istinadən məlumat yayıb. Qeyd edək ki, fevral ayında Ukrayna Daxili İşlər Nazirliyi Hücum Qvardiyasına yeni çağırışçıların qəbulunu elan edib və 35 mindən çox müraciət daxil olub.

13 milyard avro dəyərində silah tədarükü

Ukraynanın əks-hücum planı ABŞ başda olmaqla kollektiv Qərbin bu ölkəyə dəstəyi artırması fonunda gündəmə gəlib. “Avropa İttifaqı (Aİ) Ukraynaya 13 milyard avro dəyərində silah tədarük edib və 16 mindən çox ukraynalı hərbçiyə təlim keçib”. Bunu Aİ ölkələrinin xarici işlər nazirlərinin görüşündən sonra keçirilən mətbuat konfransında Avropa İttifaqının xarici siyasət və təhlükəsizlik məsələləri üzrə ali nümayəndəsi Josep Borrel bildirib. “Biz silah tədarükünün həcmini müzakirə etdik, güman edirəm ki, onlar artıq 13 milyard avrodan artıq tədarük edilib. Biz Ukraynaya 1 milyon döyüş sursatı, artilleriya mərmisi və raket tədarük etmək vədimizi yerinə yetirməyə davam edirik. 1 000-dən çox raket və bəzi sursat artıq göndərilib . Mən dəqiq rəqəmlər deyə bilmərəm. Yeni silahların alınması istiqamətində də işlər davam edir. Bundan əlavə, dostum və həmkarım Breton (daxili bazar üzrə Avropa komissarı Tyerri Breton nəzərdə tutulur - red.) tezliklə hərbi sənayenin inkişafı planını təqdim edəcək, lakin hələlik əlimizdə olanlarla kifayətlənməliyik, əlimizdə isə çox şeyimiz var”, - deyə Aİ-nin rəsmisi qeyd edib.

Avropanın baş diplomatı əlavə edib ki, Aİ “artıq Ukraynadan 16 000-dən çox əsgər hazırlayıb və bu ilin sonuna qədər bu rəqəmi 30 000-ə çatdırmaq niyyətindədir”. Onun sözlərinə görə, Ukraynanın xarici işlər naziri Dmitro Kuleba videokonfrans vasitəsilə Avropa İttifaqındakı həmkarlarını ölkədəki vəziyyətlə bağlı məlumatlandırıb.

Çin və Braziliyanın sülh təkliflərindən danışan Borrel onlara “Kiyevə getməyi və vəziyyətə Ukraynanın gözü ilə baxmağı” tövsiyə edib. Fikirlərinə davam edən Aİ rəsmisi vurğulayıb: “Ona görə də biz artıq Ukraynanı tanklar, hava hücumundan müdafiə və döyüş təyyarələri ilə təmin edirik, Aİ ölkələri də hava imkanlarını təmin edir, nə qədər lazımdırsa, bunu davam etdirəcəyik”.

Ukraynanın gözlənilən hücum əməliyyatının müharibənin gedişində əsaslı dönüşün yaradacağını söyləmək hələ tezdir. Şübhəsiz ki, Rusiya tərəfi də buna cavab ssenarisi hazırlayıb. Hələlik bu ssenarinin təfərrüatları açıqlanmasa da, Rusiyanın hərbi-siyasi elitası cavab tədbirlərinin çox sərt olacağını və proseslərin gedişində şəraitin tələb etdiyi bütün mümkün tədbirlərin görüləcəyini bildirirlər.

Paylaş:

Baxılıb: 932 dəfə