Həqiqət və reallıq

Bakı:

4 °C

60 %

8 m/s

Əlaqə

AZ RU EN

Ana səhifə / Analitik / Həqiqət və reallıq

Həqiqət və reallıq

16.08.2022 [10:08]

Qarabağ erməniləri Ermənistana inanmır

Yeni mərhələ üzrə - normallaşma prosesi üzrə inkişaf edən danışıqlar prosesində Qarabağ mövzusu yoxdur

PƏRVİZ

Ermənistan hakimiyyətinin qeyri-səmimi davranışları, iqtisadi gücsüzlük, verilən vədlərin quru sözdən uzağa gedə bilməməsi Qarabağda yaşayan ermənilərlə Ermənistan arasında dərin bir uçurum yaradıb. Artıq Qarabağ erməniləri Ermənistandan verilən vədlərə inanmırlar. Beləliklə də, Ermənistan Qarabağda yaşayan ermənilər üzərində təsir imkanlarını itirir. İsmayıllı rayonunun Basqal kəndində Azərbaycan televiziyasına müsahibəsində bu məqamlara toxunan Prezident İlham Əliyev bildirib ki, yeni Laçın yolunun hadisəsi bunu daha da qabarıq şəkildə göstərdi, - Ermənistan hakimiyyəti Qarabağda yaşayan ermənilərə öz təsir imkanlarını itirir. Bu, həqiqətdir: “Əksinə, Azərbaycan hakimiyyəti öz təsir imkanlarını artırır. Bu, reallıqdır. Bunun səbəbi, məncə, ondan ibarətdir ki, Qarabağda yaşayan ermənilər açıq-aydın gördülər ki, Ermənistan hakimiyyəti onların problemlərini həll etmək iqtidarında deyil - nə təhlükəsizlik, nə iqtisadi, nə maliyyə, nə başqa. Heç bir problemi həll etmək iqtidarında deyil. Əksinə, gördü ki, Azərbaycan hakimiyyəti onlara öz vətəndaşları kimi yanaşır və mən bunu demişəm, birinci dəfə deyil. Qarabağda yaşayan ermənilər bizim vətəndaşlarımızdır. Nə qədər onlar bunu tez dərk etsələr və bu proses artıq başlayır, o qədər də hamımız üçün yaxşı olar”.

Bu gün Qarabağda yaşayan ermənilər Azərbaycan dövlətinin işğaldan azad edilmiş regionlarında öz vətəndaşları üçün yaratdığı şəraiti görür. Yaradılan imkanları öz həyatları ilə müqayisə edən Qarabağ erməniləri bundan ibrət götürməlidirlər. Azərbaycan dövləti hər zaman özünün humanist siyasətini ortaya qoyub - Qarabağda yaşayan ermənilərə Azərbaycan vətəndaşı kimi yanaşılması bu humanizmin göstəricisidir. Anlamalıdırlar ki, Ermənistanın əsassız iddialarının arxasınca getmək onların maraqlarını təmin etməyəcək. Bu ölkə nəinki Qarabağda yaşayan ermənilərin, öz vətəndaşlarının belə təhlükəsizliyini təmin etmək, maliyyə prloblemlərini həll etmək, onların hüquqlarını qorumaq iqtidarında deyil. Məğlub Ermənistan hazırda necə yaşayacağının yollarını araşdırır ki, bu yol da Azərbaycanla normal qonşuluq siyasətinə əsaslanır. Bunun əksi isə Ermənistan üçün qarşısıalınmaz faciələrə yol aça bilər.

Danışıqlar masasında hər hansı bir statusdan söhbət belə getmir

Üçtərəfli bəyanatın imzalanması ilə Qarabağ münaqişəsi sona yetdi. Artıq yeni mərhələ üzrə - normallaşma prosesi üzrə inkişaf edən danışıqlar prosesində Qarabağ mövzusu yoxdur. Prezident İlham Əliyev bildirib ki, bu gün danışıqlar masasında hər hansı bir statusdan, ümumiyyətlə, söhbət belə getmir. Nədən söhbət gedir? Qarabağda yaşayan ermənilərin hüquqları və təhlükəsizliyi: “Mən də demişəm bəli, onların hüquqları da, təhlükəsizliyi də Azərbaycan dövləti tərəfindən təmin ediləcək və mən nəyi deyirəmsə, onu da həmişə icra edirəm”.

Yerləşdiyi regionun lider dövləti Azərbaycan buna qadirdir. Başqa sözlə, Qarabağda yaşayan ermənilərin təhlükəsizliyinin və hüquqlarının müdafiəsinin təmini Azərbaycanın qarantı altındadır. Bu proses artıq başlayıb. Laçın dəhlizinə alternativ yolun tikintisi zamanı həmin ərazidə yaşayan ermənilərin davranışları, onların Azərbaycan dövlətinə təşəkkür etməsi onu sübut edir ki, həmin şəxslər Ermənistana yox, Azərbaycana inanırlar. Prezident İlham Əliyev öz müsahibəsində maraqlı bir məsələyə toxunub: “Yeni Laçın yolunun inşası zamanı biz bunu gördük. Çünki mən deyə bilərəm ki, biz bu yolu təzə inşa etməyə başlayanda rus sülhməramlıları bizim inşaatçıları elə bil ki, qoruyurdu yerli əhalidən, ya da ki, onları bizdən, bizim inşaatçılardan. Bilmirəm kimi kimdən qoruyurdu, amma hər halda onlar var idi orada. Bir müddətdən sonra onlar çıxıb getdilər və təqribən son 6-7 ay ərzində, ümumiyyətlə, yol boyunca bir dənə də Rusiyanın sülhməramlıları yox idi, ehtiyac yox idi. Bizim inşaatçılar oradakı kəndlərdə yaşayan yerli ermənilərlə təmasda idilər, hətta onların bəziləri gəlib kömək edirdi, təşəkkürünü bildirirdi ki, belə keyfiyyətli yol tikirik”.

Bu kimi faktlar regionun siyasi reallıqlarının dəyişdiyi kimi, Qarabağda yaşayan ermənilərin də reallıqları qəbul etdiyinin göstəricisidir. Onlar dərk edirlər ki, Azərbaycan dövləti tarixi ədalətsizliyə son qoyaraq öz ərazi bütövlüyünü təmin edib. Bu isə Qarabağ ermənilərinin gələcəyi üçün də mühüm bir amildir.

Paylaş:

Baxılıb: 762 dəfə