Azad olunmuş ərazilərdə səsvermə

Bakı:

26 °C

53 %

0 m/s

Əlaqə

AZ RU EN

Ana səhifə / Xəbər lenti / Azad olunmuş ərazilərdə səsvermə

Azad olunmuş ərazilərdə səsvermə

08.02.2024 [16:26]

Xalqımızın yerə-göyə sığmayan seçki sevinci

Y.SAHİB

2024-cü il fevralın 7-i xalqımız üçün əlamətdar gün oldu. İlk dəfə olaraq növbədənkənar prezident seçkiləri bütün ölkə ərazisini əhatə etdi. İlham Əliyev inamlı qələbə qazanaraq növbəti müddətə dövlət başçısı seçildi. Mərkəzi Seçki Komissiyasının (MSK) son açıqlamasına görə, məntəqələrdən bülletenlərin 93,3 faizinin nəticəsi təqdim edilib. Azərbaycanın hazırkı Prezidenti İlham Əliyev səslərin 92,05 faizini qazanmaqla növbədənkənar prezident seçkilərində liderlik edir.

Bu qələbə xalqın öz liderinə sarsılmaz inamından qaynaqlanmaqla, son 20 ildə görülən işlərə, qazanılan uğurlara verilən dəyərdir. Prezident seçkiləri bir dövrün yekunu, yeni bir dövrün başlanğıcı sayılır. Ötən ilin sentyabrında suverenliyimiz tam bərpa olundu, Qarabağda separatçı rejimin mövcudluğuna birdəfəlik son qoyuldu.

Prezident İlham Əliyev müdrik siyasəti ilə xəyal kimi görünən arzularımızı həqiqətə çevirdi. İndi isə yeni bir dövr başladı, bu dövrün başlanğıcı məhz fevralın 7-dəki prezident seçkiləri ilə qoyuldu.

Digər diqqət çəkən məqam ondan ibarətdir ki, ilk dəfə olaraq bu seçkilər Azərbaycanın hər bir guşəsində, o cümlədən 30 illik işğaldan azad edilmiş torpaqlarımızda keçirildi. 2024-cü ilə suverenliyini tam bərpa etmiş ölkə və xalq kimi başlamışıq. Prezident İlham Əliyev işğaldan azad edilmiş ərazilərə Böyük Qayıdışın reallaşması üçün inanılmaz qətiyyət və əzmkarlıq göstərir. Görülən bütün işlər Azərbaycan xalqının, Azərbaycan vətəndaşının daha xoş güzəranını qurmaq, sabahını daha firavan etmək məqsədi daşıyır.

İşğaldan azad olunmuş ərazilərdə həyat yenidən qayıdır: infrastruktur obyektləri ilə paralel olaraq, yaşayış kompleksləri, məktəb binaları tikilib istifadəyə verilir, yenilərinin təməli qoyulur. Bütün bunlar Böyük Qayıdışın geniş perspektivindən xəbər verir. Azad olunmuş ərazilərə qısa müddətdə 1360 ailə, yaxud 5 min 354 nəfər köçürülüb. Onlara prezident seçkilərində ilk dəfə olaraq doğma yurdda səs vermək xoşbəxtliyi nəsib olub.

Bakıda və bölgələrdə olduğu kimi, işğaldan azad olunmuş ərazilərimizdə yaradılan seçki məntəqələrində qələbəlik hökm sürürdü. Ərazidəki seçicilər məntəqəyə gələrək öz namizədlərinə səs verirdilər. Vətəndaşlar qalib xalq olaraq səs verməkdən böyük qürur hissi keçirdiklərini qeyd ediblər. Bir sözlə, azad olunmuş rayonlarımızda yaradılan seçki məntəqələrində seçici fəallığı müşahidə olunub.

Mərkəzi Seçki Komissiyasından (MSK) bildirilib ki, azad olunmuş ərazilərdə seçici fəallığı 118 saylı Ağdam Şəhər Seçki Dairəsində 78,64 faiz, 119 saylı Ağdam Kənd Seçki Dairəsində 48,25 faiz, 120 saylı Cəbrayıl-Qubadlı Seçki Dairəsində 76,55 faiz, 121 saylı Laçın Seçki Dairəsində 79,7 faiz, 122 saylı Xankəndi Seçki Dairəsində 83,28 faiz, 123 saylı Kəlbəcər Seçki Dairəsində 80,57 faiz, 124 saylı Şuşa-Ağdam-Xocalı-Xocavənd Seçki Dairəsində 79,58 faiz, 125 saylı Zəngilan-Qubadlı Seçki Dairəsində 78,86 faiz olub.

Ümumilikdə isə işğaldan azad edilmiş ərazilərdəki 47 seçki məntəqəsi üzrə seçici fəallığı 93 faizdən çox olub. Bütün seçki marafonu dövründə MSK-nın rəsmi internet səhifəsinə 3 milyon 500 mindən artıq baxış olub.

Paylaş:

Baxılıb: 592 dəfə