Yunanıstanın XİN başçısına cavab...

Bakı:

26 °C

47 %

1 m/s

Əlaqə

AZ RU EN

Ana səhifə / Xəbər lenti / Yunanıstanın XİN başçısına cavab...

Yunanıstanın XİN başçısına cavab...

12.01.2024 [10:40]

İcma: Afina məsələlərə etnik və dini təəssübkeşlik prizmasından baxmamalıdır

NARDAR

Ermənistanın hərbi təcavüzü nəticəsində 30 il müdətində təkcə torpaqlarımız işğal edilməyib, eyni zamanda, Azərbaycan xalqına məxsus çoxəsrlik qədim tarixi-dini abidələr dağıdılaraq yerlə-yeksan edilib, onların bir qismi isə saxtalaşdırılıb. Təcavüzkar dövlətin bu cür vandal əməllərə əl atmaqda əsas məqsədi xalqımızın minilliklər ərzində yaşadığı torpaqlarda həm tarixi keçmişimizi, həm də mənəvi yaddaşımızı məhv etmək olub. Bütövlükdə, 200 ildən artıq müddətdə Azərbaycan xalqına qarşı davam etmiş erməni təcavüzünün qurbanları həm də tarixi-dini abidələr, müqəddəs ocaqlar və məbədlərdir. Eyni zamanda, tarixi torpaqlarımız olan indiki Ermənistan ərazisindən azərbaycanlılar tamamilə qovulub, deportasiya edilib.

Bütün bunların fonunda nə qədər paradoksal olsa da, Ermənistan və onun havadarları Azərbaycanı etnik təmizləmədə və “erməni mədəni irsini” məhv etməkdə ittiham etməyə çalışırlar. Belə ki, bugünlərdə Ermənistana səfər etmiş Yunanıstanın xarici işlər naziri Yorqos Qerapetritis deyib ki, ölkəsi tezliklə “Qarabağdan məcburi köçkünlərin maliyyələşdirilməsi, onların ehtiyaclarının ödənilməsi, xüsusən də mənzillə bağlı problemlərin həlli üçün proqrama dəstək verəcək. Bu, həmçinin Qarabağda xristian və mədəni yerlərin mühafizəsi məsələsi ilə bağlı olacaq”. Yunan nazir bildirib ki, “biz mütləq Qarabağda xristian yerlərinin qorunub saxlanmasının tərəfdarıyıq və istəyirik ki, UNESCO-nun faktaraşdırıcı missiyası bu yerlərin məruz qaldığı və çəkə biləcəyi zərərləri üzə çıxarsın”.

Qərbi Azərbaycan İcması Yunanıstanın xarici işlər nazirinin bu açıqlamasına münasibət bildirib. İcmanın bununla bağlı yaydığı açıqlamada deyilir: “Yunanıstanın xarici işlər naziri İrəvanda ölkəsinin “Qarabağda xristian ocaqlarının qorunması və onlara dəymiş ziyanın müəyyənləşdirilməsi məqsədilə Avropa İttifaqı və UNESCO çərçivəsində kampaniyaya start verəcəyi”ni bildirib. Yunan nazirin bu açıqlamalarını rəsmi Afinanın Azərbaycanın suverenliyinə qarşı açıq-aşkar hörmətsizliyi və onun daxili işlərinə kobud müdaxiləsi kimi qiymətləndiririk. Yunanıstan məsələlərə etnik və dini təəssübkeşlik prizmasından baxmamalı, Azərbaycana qarşı təxribatçı addımlar atmamalı, Ermənistandan Azərbaycan xalqının mədəni irsini məhv və təhrif etməməyi, UNESCO-nun faktaraşdırıcı missiyasının səfərinə imkan verməyi tələb etməlidir”.

Qərbi Azərbaycan İcmasının İdarə Heyətinin sədri, Milli Məclisin deputatı Əziz Ələkbərli isə qeyd edib ki, bəzi Qərb ölkələri öz ermənipərəst və azərbaycanofob mövqelərini elə çılpaq şəkildə nümayiş etdirirlər ki, bəzən özlərini nə dərəcədə gülünc vəziyyətdə qoyduqlarının fərqində belə deyillər. Onun sözlərinə görə, Yunanıstanın xarici işlər naziri yaddan çıxarır ki, Qərbi Azərbaycan İcması Ermənistana qarşı eyni ittihamla hələ 2022-ci il martın 27-də UNESCO-nun Baş direktoruna müraciət edib və həmin müraciət 2022-ci il mayın 20-də BMT-nin rəsmi sənədi kimi yayılıb. Bundan az sonra - 2022-ci il mayın 23-də UNESCO-nun Baş direktoru İcmanın müraciətinə rəsmi cavab verib. İndi yunanıstanlı nazir İcmanın addımını qədim yunan teatr ənənəsinə uyğun olaraq təqlidlə məşğuldur.

Əziz Ələkbərli vurğulayıb ki, yaxşı olar Yunanıstanın xarici işlər naziri indiki Ermənistan ərazisində ermənilər tərəfindən dağıdılan, təhqir edilən Azərbaycan dini abidələri barədə danışsın: “Əgər onda bu barədə kifayət qədər material yoxdursa, ona Ermənistanda dağıdılan, əkin sahəsinə çevrilən, ortasından asfalt yol çəkilən, həyətyanı sahə kimi ermənilərə paylanılan müsəlman qəbiristanlıqları ilə bağlı istədiyi qədər fakt, sübut, hətta əyani görüntülər təqdim edə bilərəm”.

Paylaş:

Baxılıb: 637 dəfə