Füzuliyə qayıdış davam edir...

Bakı:

11 °C

82 %

3 m/s

Əlaqə

AZ RU EN

Ana səhifə / Xəbər lenti / Füzuliyə qayıdış davam edir...

Füzuliyə qayıdış davam edir...

14.12.2023 [10:50]

Daha 112 nəfər doğma torpaqlarına qovuşdu

Yeganə BAYRAMOVA

44 günlük Vətən müharibəsində qazandığımız Zəfər regionun reallıqlarını dəyişdirməsi ilə yanaşı, məcburi köçkünlərimizin də 30 ilə yaxın yurd həsrətinə son qoydu. Vətəndaşlarımızın doğma torpaqlarına qayıtmasına imkan yarandı. İşğaldan azad edilmiş ərazilərdə quruculuq işlərinin görülməsi, “Böyük Qayıdış” prosesinin sürətləndirilməsi gücümüzü, məqsədimizi, birliyimizi, xalqımızın böyüklüyünü bir daha göstərir. Ali Baş Komandanın qətiyyətli mövqeyi, xalqımızın birliyi və ordumuzun əzmi ilə ölkəmiz istədiyi bütün hədəflərə nail ola bilmə bacarığına sahibdir.

Bu gün işğaldan azad edilmiş ərazilərimizdə yeni ab-hava var. Bu istiqamətdə yeni layihələr və planlar həyata keçirilir. Azad edilən rayon və şəhərlərdə genişmiqyaslı və intensiv işlər aparılır. Mənfur düşmənin əsarətindən xilas olan bütün yurd yerlərimizə yenidən həyat verilir. Düşmən üzərindəki tarixi Qələbəmizdən sonra ölkə başçısı dəfələrlə işğaldan azad edilmiş ərazilərə səfərlər edərək bildirib ki, Qarabağda bütün infrastruktur bərpa olunacaq. Prezidentin işğaldan azad olunmuş ərazilərə hər səfəri tarixi hadisədir. İndi həmin ərazilərdə tikinti-abadlıq, yenidənqurma işləri geniş vüsət alıb.

Daha 25 ailə yola salındı

Dünən ölkənin müxtəlif ərazilərində yataqxana, sanatoriya, pioner düşərgəsi, yarımçıq tikililər və inzibati binalarda müvəqqəti məskunlaşmış ailələrdən ibarət növbəti köç karvanı Qaradağ rayonundan yola salınıb. Bu mərhələdə Füzuli şəhərinə daha 25 ailə - 112 nəfər köçürülüb. Xatırladaq ki, indiyədək Füzuli şəhərinə 358 ailənin, yəni 1298 nəfərin daimi məskunlaşması təmin edilib.

30 il ayrı düşdüyüm yurduma geri dönürəm...

Füzuli sakini Sücayət Əliyevanın özlərinə görə, 30 il ayrı düşdüyü, həsrətini çəkdiyi yurduna, torpağına geri dönür: “İndi Füzuliyə getdiyim üçün sevincimin həddi-hüdudu yoxdur. Allah Prezidentimizi var eləsin, şəhidlərimizə rəhmət eləsin, qazilərimizə can-sağlığı versin. Biz onların sayəsində öz torpağımıza qayıdırıq.

Arzum nəvələrimin toyunu Füzulidə etməkdir

Füzuli sakini Güllü İmanova bildirib ki, Füzulini çox ağır şəraitdə tərk etməyə məcbur olub: “Ötən illərdə yaşadığım acı xatirələri doğma torpağımda yaşamaqla unutmağa çalışacam. Arzum nəvələrimin toyunu Füzulidə etməkdir”,

Füzulidə firavan yaşamaq istəyirik...

Füzuliyə qayıdan keçmiş məcburi köçkün Güldəstə Nəsirovanın sözlərinə görə, 1993-cü ilədək Füzulidə yaxşı şəraitdə yaşayıb. Lakin ermənilərin hücumları nəticəsində Füzulini tərk etmək məcburiyyətində qalıb: “Məcburi köçkün düşməmişdən öncəki kimi Füzulidə firavan yaşamaq istəyirik. 85 yaşımda sevinə-sevinə öz yurduma qayıdıram”.

Sevincimi sözlə ifadə edə bilmirəm...

Füzuli sakini Nəriminə Rəhimova bildirib ki, 73 yaşında doğma Füzuliyə geri qayıdır: “Çox sevincliyəm, sevincimi sözlə ifadə edə bilmirəm. Ali Baş Komandanın rəhbərliyi ilə müzəffər ordumuzun sayəsində öz doğma torpaqlarımıza geri qayıdırıq.

Bizim üçün yaxşı şərait yaradılıb...

Füzuli sakini Gülfinaz Məhərrəmova bildirib ki, 30 ildən çox məcburi köçkün həyatı yaşadıqdan sonra öz doğma yurduna geri dönür: “Hazırda bizim üçün orada əvvəlkindən daha yaxşı şərait yaradılıb. Allah şəhidlərimizə rəhmət eləsin, qazilərimizə can-sağlığı versin. Bizim üçün ən əsası torpaqlarımızın işğaldan azad olunması idi”.

Paylaş:

Baxılıb: 425 dəfə