Ədalətli və düzgün qərar!

Bakı:

26 °C

59 %

3 m/s

Əlaqə

AZ RU EN

Ana səhifə / Xəbər lenti / Ədalətli və düzgün qərar!

Ədalətli və düzgün qərar!

18.11.2023 [11:20]

“Qızıl qələm” mükafatı daha verilməyəcək...

Y.SAHİB

Bir zamanlar cəmiyyətdə müəyyən nüfuz qazanmış “Qızıl qələm” mükafatının verilməsi dayandırılıb. Bu barədə Azərbaycan Mətbuat Şurası məlumat yayıb.

Bildirilib ki, vaxtilə dəyərli qələm adamlarına verilmiş, Kütləvi İnformasiya Vasitələri İşçiləri Həmkarlar İttifaqının (KİVİHİ) təsis etdiyi “Qızıl qələm” mükafatı son illər jurnalistikadan uzaq insanlara təqdim olunmaqla etibarını itirib və cəmiyyətdə haqlı narazılıq doğurub.

Mətbuat Şurası jurnalistikamızın və peşəkar media işçilərinin nüfuzuna xələl gətirən məsələyə biganə qala bilməzdi. Buna görə də sözügedən quruma faktiki rəhbərlik edən Çingiz Qurbanoğlu Şuraya dəvət olunub, icraçı katibin müavini İlqar Tağıyev Mətbuat Şurasının mövqeyini, irad və tövsiyələrini onun diqqətinə çatdırıb. Nəticədə Ç.Qurbanoğlu Mətbuat Şurasına müraciət ünvanlayıb.

Müraciətdə qeyd olunub: “Son zamanlar mətbuatda və sosial şəbəkələrdə sədri olduğum KİVİHİ-nın müxtəlif insanlara təqdim etdiyi “Qızıl qələm” və digər media mükafatları ilə bağlı narazılıqları, həmçinin MŞ-nın tövsiyələrini nəzərə alaraq, KİVİHİ Rəyasət Heyətinin qərarı ilə bu mükafatların təqdimatını dayandırdığımızı bildirirəm”.

Mətbuat Şurası müraciəti anlayışla qarşılayaraq problemin həllini tapdığını bildirir. Şura digər təşkilatlara da müraciət edərək, media ilə bağlı mükafatlar verilməsi məsələsinə ehtiyatlı və həssas yanaşmağa, jurnalistikamızın nüfuzuna xələl gətirən addımlardan çəkinməyə çağırır.

Bu durum bizə ağır gəlirdi...

Əməkdar jurnalist Azər Həsrət “Yeni Azərbaycan”a açıqlamasında sözügedən mükafatın daha verilməyəcəyi ilə bağlı qərarı müsbət dəyərləndirib. Onun sözlərinə görə, hətta mükafatın verilməsinin dayandırılması ilə bağlı qərar bir az gecikib: “Əvvəllər bu mükafatla bağlı dəfələrlə həyəcan təbili çalmışdm. Həqiqətən də jurnalistikaya aidiyyəti olmayan, yazmağı bacarmayan adamlara 20-30-50 manata “Qızıl qələm” mükafatı təklif edirdilər. Sanki bir bazar açmışdılar. Təbii olaraq, bu durum da bizə ağır gəlirdi, həqiqətən də jurnalistika ilə məşğul olan adamlar bunu qəbul edə bilməzdilər. Dəfələrlə məsələ qaldırmışdıq, hətta bir dəfə mənə də zəng edib o mükafatı vermək istəyirdilər. İddia edirdilər ki, yazım onların çox xoşuna gəlib, təbii ki, sərt və kobud cavab vermək məcburiyyətində qaldım”.

Jurnalistika adına ləkə idi...

A.Həsrət təklif edib ki, “Qızıl qələm” mükafatını alan şəxslər həmin mükafatdan imtina etsinlər: “Həqiqətən düzgün deyil, ömründə 1-2 cümlə yazmamış birinə belə mükafatın verilməsi nə qədər ədalətli və düzgün ola bilər? Təəssüf ki, bu durum jurnalistika adına bir ləkə idi. Ona görə də hesab edirəm ki, mükafatın daha verilməyəcəyi yerində olan və ədalətli bir qərardır, alqışlanmalıdır”.

Paylaş:

Baxılıb: 700 dəfə