Əli Nağıyev: Azərbaycan kibertəhlükəsizlik sahəsində qlobal mövqeyini ciddi şəkildə yaxşılaşdırıb

Bakı:

21 °C

55 %

5 m/s

AZ RU EN

Ana səhifə / Xəbər lenti / Əli Nağıyev: Azərbaycan kibertəhlükəsizlik sahəsində qlobal mövqeyini ciddi şəkildə yaxşılaşdırıb

Əli Nağıyev: Azərbaycan kibertəhlükəsizlik sahəsində qlobal mövqeyini ciddi şəkildə yaxşılaşdırıb

24.10.2023 [15:15]

“Kibertəhlükəsizlik sahəsində milli ekosistemin formalaşdırılması və inkişafı istiqamətində aparılmış əməli fəaliyyət ölkəmizin beynəlxalq reytinqlərdəki mövqeyinin ciddi şəkildə yaxşılaşdırılması ilə nəticələnib”.

AZƏRTAC xəbər verir ki, bu barədə Azərbaycan Respublikası Dövlət Təhlükəsizliyi Xidmətinin (DTX) rəisi general-polkovnik Əli Nağıyevin 26-27 oktyabrda keçiriləcək “Critical Infrastructure Defence Challenge 2023” tədbiri ilə bağlı tədbir iştirakçılarına müraciətində bildirilib.

Əli Nağıyev qeyd edib ki, 9 indikator üzrə (kritik informasiya infrastrukturunun təhlükəsizliyi, kibercinayətkarlığa qarşı mübarizə, rəqəmsal kriminalistika və digər aidiyyəti sahələr üzrə ölkədə həyata keçirilən fəaliyyətlər və sair) əsaslandırılmış təqdimat nəticəsində Azərbaycanın beynəlxalq kibertəhlükəsizlik üzrə mövqeyinin yüksəldilməsinə nail olunub:

“Belə ki, kibertəhlükəsizlik sahəsində 176 ölkənin 46 indikator üzrə fəaliyyətinin qiymətləndirilərək sıralandığı Milli Kibertəhlükəsizlik İndeksinin reytinq cədvəlində Azərbaycan Respublikası 36 pillə yüksələrək 86-cı yerdən 50-ci yerə irəliləyib. Qeyd olunmalıdır ki, bu nəticə sözügedən reytinq cədvəlində ölkəmizin indiyədək qazandığı ən yüksək mövqedir. Hazırkı reytinq cədvəlində Gürcüstan 24-cü, Ermənistan isə 96-cı yerdədir.

Azərbaycan Beynəlxalq Telekommunikasiya İttifaqının tərtib etdiyi “Qlobal kibertəhlükəsizlik indeksi - 2020” (“Global Cybersecurity Index” - GCI) reytinqində mövqeyini 15 pillə yaxşılaşdıraraq, 194 ölkə arasında 89,31 xal ilə 40-cı yerdə qərarlaşıb.

Həmçinin 2009-cu ildə ratifikasiya edilmiş “Kibercinayətkarlıq haqqında” Budapeşt Konvensiyasına əsasən, 24/7 şəbəkəsi vasitəsilə sübutların toplanması, rəsmi məlumatın təqdim edilməsi və şübhəli şəxslərin yerinin müəyyən edilməsi istiqamətində Dövlət Təhlükəsizliyi Xidməti tərəfindən daim müvafiq işlər həyata keçirilir”.

Müraciətdə o da qeyd edilib ki, ölkədə kibertəhlükəsizlik üzrə kadr potensialının artırılması istiqamətində bir çox işlər həyata keçirilir:

“2021-ci ildən etibarən ənənəvi olaraq hər il həyata keçirilən “Cyber Summer School”un əsas məqsədi tərəfdaş ölkələrdən olan düşərgə iştirakçıları arasında dostluq münasibətlərinin inkişaf etdirilməsinə, kibertəhlükəsizlik üzrə bilik, bacarıq və xüsusi həvəsə malik yeniyetmələrin müəyyənləşdirilərək ölkə daxilində və xaricində bir araya gətirilməsinə, habelə kibertəhlükəsizlik sahəsində ixtisaslaşmış mütəxəssis kimi yetişmələrinə dəstək verməkdir. Növbəti ildə tədbirə qatılan xarici tərəfdaş ölkələrin sayının artırılacağı planlaşdırılır”, - deyə DTX rəisi əlavə edib.

Paylaş:

Baxılıb: 547 dəfə