Gəncəni bombalamaq əmri verən...

Bakı:

21 °C

78 %

5 m/s

Əlaqə

AZ RU EN

Ana səhifə / Xəbər lenti / Gəncəni bombalamaq əmri verən...

Gəncəni bombalamaq əmri verən...

05.10.2023 [10:52]

Arutyunyanın dosyesi

24 saatlıq antiterror tədbirlərinin nəticəsi olaraq Azərbaycana qarşı cinayətlər törətmiş şəxslərin saxlanılması davam edir. Azərbaycan Dövlət Təhlükəsizlik Xidmətinin (DTX) əməkdaşları Qarabağda separatçıların keçmiş “prezidenti” Araik Arutyunyanı da saxlayıblar. O Bakıya gətirilib və hətta ilkin dindirilməsi belə olub. Onun vəkili təyin edilən Alov Səfərəliyev dindirilmədə iştirak edib. “Bu gün Araik Arutyunyanın müdafiəçisi kimi onun dindirilməsində iştirak etdim. Səhhəti və psixoloji durumu yerindədir. Təkcə onu deyə bilərəm ki, onun dedikləri bir çox məsələlərin açılmasına kömək olacaq. Müdafiəmizi Azərbaycan Respublikasının qanunvericiliyinə, beynəlxalq konvensiyaların tələblərinə və vəkil etikasına uyğun olaraq quracağıq. Bir sözlə, peşə borcumuzu vicdanla yerinə yetirəcəyik!”, - deyə vəkil bildirib.

Məsələnin aktuallığını nəzərə alaraq Araik Arutyunyanın separatçı xuntadakı “vəzifələrini” araşdırdıq.

Dosye: Araik Vladimiroviç Arutyunyan 1973-cü ildə Xankəndi şəhərində anadan olub. 1990-cı ildə Xankəndi fizika-riyaziyyat təmayüllü məktəbi bitirərək İrəvan Xalq Təsərrüfatı İnstitutuna qəbul olub. Daha sonra qondarma rejimin yaratdığı “artsax” universitetində aspiranturanı bitirib.

1992-ci ildə Qarabağda yaradılan qanunsuz silahlı birləşmələrin tərkibində Azərbaycan ordusuna qarşı döyüşüb. 1995-97-ci illərdə separatçı rejimin “İqtisadiyyat və maliyyə nazirinin” köməkçisi olub. 1999-2004-cü illərdə “Armaqrobankın” Xankəndi filialının rəhbəri olub. 2005-ci ildə “Azad Vətən” adlı partiyanın sədri kimi separatçı rejimin “parlamentinə” seçilib. 2007-ci ildən 2017-ci ilə kimi separatçı rejimin “baş naziri” olub. 2009-cu ildə yenidən “Azat Ayenik” partiyasının sədri seçilib. 2010-cu ildə rəhbərlik etdiyi “Azat Ayenik” partiyası qondarma respublikanın parlamentinə keçirilən seçkilərdə 33 yerdən 14-nü qazanaraq qalib gəlib. 25 sentyabr 2017-6 iyun 2018-ci illərdə qondarma respublikanın “dövlət naziri” olub. Araik 31 mart 2020-ci ildə qondarma respublikanın “başçısı seçkiləri”ndə birinci turda 1-ci yeri tutub.

44 günlük Vətən müharibəsində Azərbaycana qarşı bir sıra təxribatlarda iştirak edən Arutyunyan Gəncə şəhərinə qarşı xain raket hücumunun əmrini verdiyini özü etiraf edib. Bununla bağlı videomüraciətdə o bildirib ki, məhz onun sərəncamı ilə Gəncə yaylım atəşinə tutulub: “Mənim sərəncamımla “artsax silahlı qüvvələri” yaylım atəş sistemi ilə Gəncə şəhərini vurub. Vaxtında qeyd etmişdim, xəbərdarlıq etmişdim. Təəssüflər olsun ki, bizim tarixi “Qandzak”ı - Gəncəni, “Kirovabad”ı, onların daimi hərbi yerləşdirmə yerlərini vurmuşuq. Çünki onlar buna məcbur etdilər. Özünüzə gəlin. Çünki daha böyük şəhərləri vurmağa ehtiyac olarsa, davam edəcəyik. Yeri gəlmişkən, düşmənə zaman verərək bir müddət böyük şəhərlərin raket və artilleriya ilə atəşə tutulmasını dayandırmaq əmrini vermişəm. O, xəbərdarlıq atəşi idi”.

Araik Arutyunyan bu il avqustun 31-də qondarma rejimin başçılığından istefa vermişdi. 24 saatlıq antiterror tədbirləri zamanı müqavimətə əl atmaq istəyən “komandanın” üzvü kimi müzakirələrdə iştirak edib. Bunu sübut edən fotoşəkillər mövcuddur. Arutyunyanın oktyabrın 3-də həbs edilməsi xəbəri yayılıb. Qondarma rejimin başçısı Azərbaycanın ədalət mühakiməsinə cavab verir...

SADİQ

Paylaş:

Baxılıb: 670 dəfə