Yolumuz Qərbi Azərbaycanadır!

Bakı:

18 °C

88 %

3 m/s

Əlaqə

AZ RU EN

Ana səhifə / Xəbər lenti / Yolumuz Qərbi Azərbaycanadır!

Yolumuz Qərbi Azərbaycanadır!

19.08.2023 [12:00]

Y.SAHİB

“Göyçə-Zəngəzur Respublikası” fəaliyyətini dayandırdığını elan edib. Bu barədə “Göyçə-Zəngəzur Respublikası” və “Qərbi Azərbaycana Qayıdış” İctimai Birliyinin birgə bəyanatında bildirilib.

Prezident İlham Əliyevin Qərbi Azərbaycan və bu bölgədən köçürülən yüz minlərlə soydaşımızın taleyi ilə bağlı müdrik düşüncələrə və planlara sahib olduğunu daim görmüşük. Ölkə başçısı hələ 2014-cü ildə hərbçilərimiz qarşısında çıxış edərkən söyləmişdi: “Bu gün biz yaxşı bilirik ki, Ermənistan dövləti tarixi Azərbaycan torpaqlarında yaranıbdır. İrəvan xanlığı, Zəngəzur, Göyçə mahalı bizim tarixi torpağımızdır. Biz azərbaycanlılar o torpaqlara qayıtmalıyıq və qayıdacağıq”.

Prezidentin 24 dekabr 2022-ci il tarixində Qərbi Azərbaycan ziyalıları ilə görüşündə etdiyi çıxışından sonra Qərbi Azərbaycanlılarla bağlı dövlətimizin siyasi xətti ilə daha yaxından tanış olduq. Ölkə başçısı bu sahədə həyata keçirdiyi siyasi xəttə uyğun Qərbi Azərbaycan İcmasının qısa müddətdə yenidən təşkilatlandığına və bu gün çox böyük uğurla fəaliyyət göstərdiyinə şahid olduq.

Bu gün bütün Qərbi azərbaycanlılar pozulmuş hüquqlarının Azərbaycan Prezidentinin siyasi iradəsi, dövlətimizin gücü ilə bərpa olunacağına əmindirlər. Buna görə də onlar vahid niyyətlə bir olmalı, çaşqınlıq yaradan hər cür bölücü addımlardan kənar durmalı və Qərbi Azərbaycana - öz doğma torpaqlarımıza qayıtmaq üçün birgə mübarizə aparmalıdırlar.

Düşmən dəyirmanına su tökmək...

Millət vəkili, Qərbi Azərbaycan İcmasının üzvü Ramin Məmmədov “Yeni Azərbaycan” açıqlamasında bildirib ki, tarixi mənbələrdən də bəlli olduğu kimi, Göyçə, Zəngəzur və hətta İrəvan Azərbaycanın tarixi torpaqlarıdır: “Cənab Prezident İlham Əliyev də ən mötəbər kürsülərdən dəfələrlə bütün dünyaya bəyan edərək bildirib: “Hər kəs artıq bunu yaxşı bilir, dünya ictimaiyyəti də bilir ki, 1920-ci ilin noyabr ayında tarixi torpağımız Zəngəzur bizdən ayrılıb Ermənistana birləşdirildi, Göyçə də həmçinin. İrəvan şəhəri 29 may 1918-ci ildə Ermənistana verildi. Zəngəzurun o vaxtkı əhalisinin mütləq əksəriyyəti azərbaycanlılar idi. Zəngəzurun bütün yaşayış məntəqələrinin adları Azərbaycan adları idi”.

Ancaq bütün bunlara baxmayaraq, “Göyçə-Zəngəzur Respublikası”nı elan etmək düşmən dəyirmanına su tökməkdən başqa bir şey deyildi. Bu, tamamilə yanlış, məqsəd və məramı bilinməyən, hətta bir qədər şübhə doğuran və Azərbaycanın dövlət maraqlarına zidd olan düşünülməmiş addımdır”.

R.Məmmədovun sözlərinə görə, Qərbi Azərbaycan İcması haqlı olaraq “Göyçə-Zəngəzur Respublikası” adlı bir qurumu heç vaxt tanımayıb: “İcma tarixi torpaqlarımızla bağlı belə özfəaliyyət hərəkətləri yolverilməz və zərərli hesab edib”.

Dövlətimizin siyasətinə zidd idi

Deputat qeyd edib ki, bu gün də Qərbi azərbaycanlıların cəmiyyəti yaradılıb və onlar öz doğma torpaqlarına qayıtmaq üçün siyasi müstəvidə mübarizə aparırlar: “Ancaq “Göyçə-Zəngəzur Respublikası”nın yaradılması birbaşa Azərbaycanın dövlət siyasətinə zidd idi. Buna görə də yarandığı gündən bəri daim tənqid olunublar və onların heç bir siyasi fəaliyyətləri nəzərə çarpmayıb. Bu baxımdan da onlar haqqında araşdırmalara başlanıldı və sonda “fəaliyyət”lərini dayandırdılar. Azərbaycan dövlətinin vahid siyasi planı var: Biz ölkəmizin ərazilərini tam bərpa etmişik. Təbii ki, beynəlxalq qanunlara uyğun olaraq da hər bir köçkün öz yurduna qayıtmaq hüququna sahibdir”.

Paylaş:

Baxılıb: 550 dəfə