Lobbistlərə züy tutanlar...

Bakı:

22 °C

57 %

9 m/s

Əlaqə

AZ RU EN

Ana səhifə / Xəbər lenti / Lobbistlərə züy tutanlar...

Lobbistlərə züy tutanlar...

15.08.2023 [11:30]

Yalan təbliğatı işə yaramayan mərkəzlər zorakılığa əl atırlar

Şahanə XANKİŞİYEVA

Azərbaycanın Cənubi Qafqazda formalaşdırdığı yeni siyasi-hərbi reallıqlar Ermənistanı və onun havadarlarını açıq şəkildə narahat etməkdədir. Rəsmi İrəvan bu siyasi və hərbi reallıqların ortaya qoyduğu təzahürləri hələ də qəbul etmək cəsarəti nümayiş etdirə bilmir. Erməni lobbisinin təsiri altında hərəkət edən bəzi beynəlxalq təsisatlar, eləcə də, bir sıra dövlətlərin rəsmi nümayəndələri isə erməni təxribatlarını açıq-aşkar dəstəkləməkdən çəkinmirlər. Məsələn, ABŞ konqresmeni Bred Şermanın David İşxanyanı rus sülhməramlılarının nəzarət etdiyi ərazilərdə hələ də qalan qondarma və oyuncaq qurumun “parlament sədri” vəzifəsinə seçilməsi münasibətilə təbrik etməsi birmənalı şəkildə beynəlxalq hüquqa ziddir. Bred Şerman özünün “təbrik məktubunda” ölkəsinin siyasi mövqeyinə əks gedərək separatizmi dəstəkləyir, həqiqətləri təhrif edir. Bununla da beynəlxalq hüquqa qarşı hörmətsizliyini çəkinmədən hətta “məharətlə” təqdim edir.

Nəzərə alınmalıdır ki, şəbəkələşmiş ermənipərəst mərkəzlər sinxron hərəkət edir - bu mənada, Şermanın “təbriki” də təsadüfi deyil. Belə ki, konqresmenin bu təxribatçı hərəkətindən “ürəklənən” bir neçə erməni ABŞ-ın Los-Ancelesdəki Azərbaycanın baş konsulluğunun qarşısında aksiya keçirib. Qondarma iddialarla keçirilən aksiya Los-Ancelesdəki erməni icması tərəfindən təşkil olunub. Ənənəvi “şüar” və “tələblərlə” müşayiət olunan bu təxribatçı aksiyada “Laçın yolunun açılması”, “Qarabağda yaşayan ermənilərin “blokadadan çıxarılması” kimi əsassız fikirlər səsləndirilib. Onlar hətta konsulluq binasına girişi də bağlayıb, çadırlar qurublar.

Təəssüf ki, adını “konqresmen” qoymuş bəziləri də tapılır ki, bu kimi yalan və qərəzi dəstəkləyir. Məsələn, konqresmen Adam Şiff dəfələrlə Azərbaycanın əleyhinə olan açıqlamalarla gündəmə gəlib. 44 günlük müharibədən sonra “Qarabağın azadlığı tanınmalı, Türkiyənin bölgədəki rolu azaldılmalıdır”,-deyərək ermənipərəst mövqe sərgiləyən Şiff də Kaliforniya ştatından Konqesə seçilib - həmin ərazi isə ABŞ-dakı erməni icmasının nümayəndələrinin yaşadığı bölgə sayılır. Bu mənada, onun mövqeyi və açıqlamaları da təəccüb doğurmamalıdır. Adam Şiff Los-Ancelosdakı etirazçılara tezliklə Ermənistana gedəcəyini “vəd edib”.

Mövzu ilə bağlı “Yeni Azərbaycan”a danışan politoloq Tural İsmayılov bildirib ki, Los-Anceles şəhəri Amerikada ermənilərin ən kompakt yaşadığı ərazilərdəndir. Eyni zamanda, bu şəhər erməni lobbisinin Amerikadakı mərkəzlərindən biri hesab edilir: “Əslində bu ssenari əvvəlki dönəmdə baş verən hadisələrin təkrarıdır. Xatırlayırıq ki, 44 günlük Vətən müharibəsi və postmüharibə dövründə Ermənistan bölgədə gərginlik yaratmaq üçün Los-Ancelosdakı erməni lobbisinin xidmətindən istifadə edirdi. Ümumiyyətlə, oradakı erməni lobbisi kifayət qədər təhlükəli sayılır. Hətta Koliforniya ştatında “Little Armenia” deyilən xüsusi qəsəbə belə var. Hansı ki ASALA, Daşnaksütyun zehniyyətində olan bir çox terrorçular burada diaspora adı altında fəaliyyət göstərir. Təəssüfləndirici məqamlardan biri isə odur ki, Bred Şerman kimiləri ideoloji baxımdan da bu terroru dəstəkləyirlər. Ermənistanın tarix boyu Azərbaycana və Türkiyəyə qarşı müxtəlif təxribatlar törətməsi sirr deyil. Onlar bu məsələyə görə cəza almayıblar və məsuliyyət daşımayıblar. Bu gün də analoji terrorun davam etməsi məhz həmin cəzasızlıqdan qaynaqlanır. ABŞ dövləti isə Los-Ancelosdakı Azərbaycan konsulluğunun təhlukəsizliyini və mühafizəsini təmin etməlidir”.

Paylaş:

Baxılıb: 527 dəfə