Təbiətin sınağı - 81 sel və daşqın

Bakı:

20 °C

83 %

6 m/s

Əlaqə

AZ RU EN

Ana səhifə / Xəbər lenti / Təbiətin sınağı - 81 sel və daşqın

Təbiətin sınağı - 81 sel və daşqın

05.07.2023 [11:45]

Son zamanlar ana təbiət bizi tez-tez sınağa çəkir. İqlim dəyişmələrinin fəsadları özünü daha qabarıq şəkildə büruzə verir. Biz yağıntıların ölkə ərazisi üzrə qeyri-bərabər paylanmasını müşahidə edirik. Belə ki, Azərbaycanın bəzi bölgələrində aylıq normanın heç yarısı qədər yağıntı düşmədiyi halda, əsasən dağlıq və dağətəyi bölgələrdə lokal güclü leysan nəticəsində sel-daşqın hadisələri baş verir. Ekologiya və təbii sərvətlər nazirinin müavini Umayra Tağıyevanın məlumatına əsasən, 2023-cü ilin aprel ayından iyunun 30-dək 81 sel-daşqın hadisəsi qeydə alınıb. Təkcə iyulun 1-də 3 sel hadisəsi müşahidə olunub.

Mütəxəssis həmçinin bəzi vətəndaşların sel-daşqın hadisələri zamanı məsuliyyətsiz davranışlarına da fikir bildirib. Təəssüflər olsun ki, bəzən sel-daşqın hadisələri ağır fəsadlarla, hətta ölümlə nəticələnir. Əhaliyə xəbərdarlıq edilməsinə baxmayaraq, bəzi hallarda təhlükənin ciddiliyi və ağır fəsadlar törədə biləcəyi nəzərə alınmır. Hələ də selin yanında durub onu seyr edən, təhlükəli anları lentə alanlar var. Unutmamalıyıq ki, hadisə yerindən dərhal uzaqlaşmaq lazımdır. Selin istiqamətini öncədən müəyyənləşdirmək olmur. “Bununla yanaşı, sel iri gətirmələrlə, daş qaya ilə müşayiət oluna bilir. Bəzən əmlakını xilas etməyə çalışanlar öz həyatlarını təhlükə altına qoyurlar. Əhaliyə bir daha müraciət edirik ki, əlverişsiz hava şəraiti haqqında məlumatları mütləq şəkildə nəzərə alsınlar. Sel-daşqın hadisələri baş verən ərazilərdən mümkün qədər tez uzaqlaşmaq, daha hündür ərazilərə çıxmaq tövsiyə olunur. Bəzən bir neçə saniyə bizi böyük təhlükədən xilas edə bilər”, - deyə U.Tağıyeva vurğulayıb.

Zəruri tədbirlər davam etdiriləcək

Baş nazir Əli Əsədovun sədrliyi və müvafiq qurumların rəsmilərinin iştirakı ilə keçirilən müşavirədə sel və daşqınların törətdiyi fəsadlar və onların aradan qaldırılması ilə bağlı aktual müzakirələr aparılıb. Baş nazir Ə.Əsədov bildirib ki, ötən illərdən fərqli olaraq cari ilin may-iyun aylarında ölkənin bəzi rayonlarında hava şəraiti qeyri-sabit keçmiş, yağıntıların miqdarı artmış, əsasən dağlıq və dağətəyi rayonlarda leysan xarakterli intensiv və güclü olmuşdur.

Qeyd edilib ki, əsasən iyun ayında respublikanın əksər ərazilərində sel sularının daxil olması nəticəsində bir sıra çaylarda sululuq artıb, sel və daşqınlar baş verib.

Baş nazir vurğulayıb ki, təbii fəlakət baş verdiyi rayonlar üzrə aidiyyəti qurumlar tərəfindən zəruri və təxirəsalınmaz tədbirlər görülüb, ərazilərə xüsusi texnika və canlı qüvvə cəlb olunub. Görülmüş işlər nəticəsində operativ olaraq çayların məcrası dəyişdirilib, yuyularaq dağıdılan yol infrastrukturu bərpa olunub.

Müşavirədə bildirilib ki, təbii fəlakət nəticəsində fərdi yaşayış evlərinə, həyətyanı sahələrə, o cümlədən əkin sahələrinə və fermer təsərrüfatlarına, həmçinin digər infrastruktura dəymiş ziyanın qiymətləndirilməsi ilə bağlı tədbirlər davam etdirilir.

Hazırda sel və daşqınlar baş verən ərazilərdə fəsadların aradan qaldırılması üçün zəruri tədbirlər görüldüyü barədə də müşavirədə ətraflı məlumat verilib. Bunun nəticəsində də təbii fəlakət baş verən bölgələrdə həyat öz axarına qayıdır. Baş nazir Ə.Əsədov bu istiqamətdə zəruri və operativ tədbirlərin davam etdirilməsi ilə bağlı müvafiq tapşırıqlarını verib.

Eyni zamanda, müşavirədə qeyri-sabit hava şəraiti ilə əlaqədar Milli Hidrometeorologiya Xidməti tərəfindən tətbiq edilən erkən xəbərdarlıq sisteminin təkmilləşdirilməsinin vacibliyi vurğulanıb. Təbii fəlakətin qarşısının alınması məqsədilə qabaqlayıcı tədbirlərin görülməsi baxımından xidmətin fəaliyyətinin digər aidiyyəti qurumlarla əlaqələndirilmiş şəkildə həyata keçirilməsinin önəmi qeyd edilib.

M.FEYİZLİ

Paylaş:

Baxılıb: 827 dəfə