3 dəfə əlavə maaş alacaqlar

Bakı:

26 °C

46 %

6 m/s

Əlaqə

AZ RU EN

Ana səhifə / Xəbər lenti / 3 dəfə əlavə maaş alacaqlar

3 dəfə əlavə maaş alacaqlar

26.01.2023 [10:19]

Sosial rifahın artırılması dövlətin əsas prioritetidir

Vətəndaşların sosial rifahının artırılması dövlətin siyasətində əsas prioritetlərdən biridir. Dövlət başçısı İlham Əliyev hər il vətəndaşların rifahının artırılması istiqamətində müvafiq qərarlar qəbul edir və bu siyasətin davamlı xarakter aldığını görürük.

Prezidentin bir neçə həftə əvvəl imzaladığı sərəncamla minimum əmək haqqı 345 manata çatdırılmışdı. Sərəncama əsasən, minimum pensiya 280 manata çatdırılacaq, müavinət və təqaüdlər də artırılır. 700 min vətəndaşı əhatə edəcək minimum əmək haqqındakı artım üçün dövlət büdcəsindən əlavə 450 milyon manat ayrılacaq. Minimum pensiyadakı artımı da nəzərə alsaq, maaş və pensiyalar üzrə artımdan 800 mindən çox vətəndaşımız faydalana biləcək. Bu o deməkdir ki, hansı sektorda çalışmasından asılı olmayaraq minimum əmək haqqı alan bütün vətəndaşlarımızın maaşları artacaq. Artımlar özəl sektoru da əhatə edəcək. Yəni yalnız dövlət sektorunda deyil, özəl sahədə də bu ildən 345 manatdan az əmək haqqı verilə bilməz.

Ümumilikdə, prezidentin son sərəncamı ilə Azərbaycan müstəqillik tarixində ilk dəfə olaraq minimum əmək haqqı 200 dollarlıq həddi keçdi. Minimum əmək haqqı bu il üçün müəyyən olunan yaşayış minimumunu 40,2 faiz üstələyəcək. Bu sərəncam, eyni zamanda, digər sahələrdə də artım üçün baza yaradacaq. Sərəncam 2023-cü ildə də sosial təminat məsələlərinin prioritet olacağını bir daha təsdiq edir. Sosial proqramlarda artımlar il ərzində davam etdiriləcək. Bu, həm də vətəndaşın dövlətdən məmnunluğuna da ciddi təsir edə biləcək amillərdən biridir.

Statistik göstəricilər Azərbaycanda iqtisadiyyatın sabitliyinin təmin edildiyini, həmçinin əhalinin sosial-müdafiə sahəsində irəliləyişin müşahidə olunduğunu göstərir. Əgər iqtisadi sabitlik olmasa, ölkə iqtisadiyyatı inkişaf etməsə, əlbəttə ki, bu məbləğlərin artımı müşahidə olunmazdı. Bu, onu göstərir ki, dövlət keçən il bu sahədə də uğurlu siyasəti həyata keçirməyə müvəffəq olub. Digər vacib bir məqam isə budur ki, dövlətin vətəndaşların rifahının artırılmasına, gücləndirilməsinə böyük bir dəstəyi var və dövlət bu istiqamətdə vətəndaş üçün müvafiq addımları atır. Dövlət vətəndaşların rifahını düşünür və vətəndaşların rifahının daha da yüksəlməsi üçün davamlı olaraq müxtəlif addımları atır. Eləcə də, müxtəlif struktur orqanlarda çalışan vətəndaşların maaşları ilə bağlı da müvafiq qərarlar verərək, bu sahəyə öz diqqət və qayğısını artırmağa davam edir. Belə ki, Nazirlər Kabinetinin “Dövlət qulluğu ilə bağlı bəzi məsələlərin tənzimlənməsi haqqında” Qərarında dəyişiklik edilib.

Milli Məclisin üzvü Vüqar Bayramov “Yeni Azərbaycan”a açıqlamasında bildirib ki, dəyişikliyə əsasən bəzi şəxslərə 2023-cü ildə 3 dəfə əlavə maaş ödəniləcək: “Dəyişikliklərə görə, 2023-cü il yanvarın 1-dən etibarən dövlət orqanlarında çalışan dövlət qulluqçusu olmayan işçilərin (qeydiyyatçı, nəzarətçi, təsərrüfat işçisi, xadimə, dalandar, bağban, gözətçi, ocaqçı, ixtisas dərəcəsi olmayan fəhlə və s.) aylıq vəzifə maaşları artırılıb. Belə ki, ali kateqoriya dövlət orqanlarında aylıq əmək haqqı 400, 1-ci kateqoriya dövlət orqanlarında 385, 2-ci və 3-cü kateqoriya dövlət orqanlarında 365, 4-cü və 5-ci kateqoriya dövlət orqanlarında isə 345 manat nəzərdə tutulub.

Bununla yanaşı, həmin şəxslərə 2023-cü ildə 3 dəfə maaşları həcmində əlavə ödəniş ediləcək. Belə ki, bu Qərarda qeyd olunan işçilərin mükafatlandırılması məqsədilə hər il növbəti il üçün təsdiq edilən dövlət büdcəsində onların çalışdıqları dövlət orqanlarında həmin işçilər üçün müəyyən olunmuş aylıq vəzifə maaşının 3 misli həcmində əlavə vəsait nəzərdə tutulur. Gözlənilir ki, il ərzində əlavə maaşlar 3 dəfə mükafat formasında, bayram günlərində ödəniləcək”.

Günel ABBAS

Paylaş:

Baxılıb: 1185 dəfə