İranın ədalətsiz “ədalət”i

Bakı:

27 °C

46 %

4 m/s

Əlaqə

AZ RU EN

Ana səhifə / Xəbər lenti / İranın ədalətsiz “ədalət”i

İranın ədalətsiz “ədalət”i

17.12.2022 [11:06]

Təbriz klubunun sabiq futbolçusuna edam cəzası

Günel ABBAS

Edam cəzası tarixin qaranlıq səhifələrindən gələn utanc kimi xarakterizə olunsa da, təəssüf ki, dövrümüzdə hələ də tətbiq edilir. Edam cəzası dövrümüzdə BMT-yə üzv olan 102 ölkənin qanunvericiliyindən çıxarılıb. 7 ölkə edam cəzasını yalnız müharibə dövrü cinayətləri üçün tətbiq edir, 50 ölkənin qanunvericiliyində mövcud olmasına baxmayaraq, faktiki olaraq praktikada 10 ildir ki, tətbiq edilmir. 37 ölkənin isə həm qanunlarında, həm də praktikasında edam cəzası mövcuddur. Təsadüfi deyil ki, hazırda dünyada ən çox edam cəzalarının tətbiq olunduğu ölkələr arasında İran ilk yerlərdə dayanır.

Yeri gəlmişkən, son günlər İranda baş verən hadisələr fonunda ölüm cəzaları və hökmləri günbəgün artır. Etirazlara qoşulan gənclər məhkəməsiz-filansız edam edilir. “Traktor” klubunun sabiq futbolçusu Amir Nasr Azadani də İranda baş verənlərə etiraz etdiyi üçün edam cəzasına məhkum olunub. Təbriz təmsilçisi - “Traktor” tvitter hesabında yaydığı məlumatda 26 yaşlı yarımmüdafiəçinin həyatının təhlükədə olduğunu bildirib.

Məsələnin ən acınacaqlı tərəfi odur ki, bu, son aylarda İranda baş verən ilk hadisə deyil. Bundan əvvəl də İran məhkəməsi Tehran vilayətində etirazçılardan biri barəsində ilkin ölüm hökmü çıxarmışdı. Səbəb isə ölkədəki haqsızlığa etirazı idi. İranın bu məsələdə mövqeyi məlumdur, bu ölkədə etirazın cəzası ölümdür.

Əslində, son proseslər göstərir ki, İranın qəbul etdiyi qərarlarda nəzərə çarpan məqamlar təsadüfi deyil. Bu gün İranın güneyli azərbaycanlılara göstərdiyi münasibət, heç şübhəsiz, oyunçularının əksəriyyəti əslən azərbaycanlı olan komandaya qarşı da təzahür edir. Ümumiyyətlə, İran hökuməti Təbriz və Güney Azərbaycan adının hallandığı məsələlərdə “ölüm hökmü” cəzası qədər kəskin mövqe nümayiş etdirir. Bu mənada hökumətin haqq tələb edənlərə ədalətsiz “ədalət” göstərməsi heç kimə sirr deyil.

Bir insana “peşman olmaq” və “özünü islah etmə” imkanı verməyən bu ədalətsiz ölüm cəzası “böyük səhv etdik” deməklə kompensasiya edilə biləcək bir qərar deyil. İranın addımını həm də vəhşilik adlandırmaq olar, çünki günahsız bir insanı dövlət əli ilə öldürmək vəhşilikdir. Bu, dövlətin qatillərlə eyni əxlaqi mövqedə durduğunu göstərir. Şübhəsiz ki, bu cür səhvlərlə məsum insanları ölüm sırasına qoymaq geri dönüşü mümkünsüz xətalara və ədalətsizliyə səbəb olacaq. Aydındır ki, ölüm cəzasının bərpası yoxdur.

Ümumilikdə, İranın timsalında, demək olar ki, edam cəzası bir qisas metodu deyil. Unudulmamalıdır ki, cinayətkarlığı azaldacaq ölüm cəzası deyil, maarifləndirmədir. Yəqin ki, İranın susmuş vicdanını aiddiyyəti qurumlar və təşkilatların əli ilə dindirmək mümkündür.

Paylaş:

Baxılıb: 500 dəfə