Şuşada Türk Biznes Forumu keçirilib

Bakı:

22 °C

73 %

9 m/s

Əlaqə

AZ RU EN

Ana səhifə / Xəbər lenti / Şuşada Türk Biznes Forumu keçirilib

Şuşada Türk Biznes Forumu keçirilib

17.09.2022 [11:24]

Sənədlər imzalanıb

Qarabağın üzük qaşı Şuşa yenidənqurma işlərinin aparılması ilə paralel olaraq beynəlxalq səviyyəli tədbirlərə ev sahibliyi etməkdədir. Sentyabrın 16-da Şuşada işğaldan azad edilmiş ərazilərin bərpasına və inkişafına həsr olunmuş Türk Biznes Forumu keçirilib.

Forum Türk Dövlətləri Təşkilatının, Türk Ticarət və Sənaye Palatasının, Azərbaycanın İqtisadiyyat Nazirliyinin dəstəyi, Kiçik və Orta Biznesin İnkişafı Agentliyi (KOBİA) və Sahibkarlar (İşəgötürənlər) Təşkilatları Milli Konfederasiyasının birgə təşkilatçılığı ilə baş tutub. Tədbirdə Türk Dövlətləri Təşkilatının Baş katibi Bağdad Amreyev, eləcə də Azərbaycanla yanaşı, Türk Dövlətləri Təşkilatının 4 daimi üzvü (Türkiyə, Qazaxıstan, Qırğızıstan, Özbəkistan) və müşahidəçi üzv Macarıstanın dövlət qurumlarının, eləcə də müxtəlif təşkilatların və diplomatik korpusun nümayəndələri, iş adamları iştirak ediblər. Forumun məqsədi türk dövlətləri arasında iqtisadi, biznes və investisiya əlaqələrinin daha da dərinləşməsi, sahibkarlar arasında dialoqun təşviqi, Qarabağ regionunun iqtisadi və sərmayə potensialının xarici iş adamlarına təqdim olunmasıdır.

Forumda çıxış edən kənd təsərrüfatı naziri İnam Kərimov bildirib ki, işğaldan azad edilmiş ərazilərdə 50 min hektarda yazlıq və payızlıq əkinləri aparılıb: “Prezident İlham Əliyevin rəhbərliyi ilə torpaqlarımız işğaldan azad olunduqdan sonra bölgədə böyük quruculuq işləri aparılır. Həyata keçirilən böyük infrastruktur layihələri - yolların, hava limanlarının inşası Azərbaycanın logistik imkanlarını genişləndirib. Bu imkanlardan region dövlətləri, o cümlədən dost ölkələr yararlana bilərlər. İşğaldan azad olunmuş əraziləri dövlət başçısı “Yaşıl Enerji Zonaları” elan edib. Torpaqların azad edilməsi ilə bölgədə kənd təsərrüfatının bərpası və yenidən inkişaf etdirilməsi üçün yeni imkanlar yaranıb. Təsadüfi deyil ki, Prezidentin azad olunmuş torpaqlarımızla bağlı ilk tapşırığı bu torpaqların əkilib becərilməsi ilə bağlı olub”.

Nazir qeyd edib ki, “Ağıllı kənd” layihəsi çərçivəsində aqrar emal müəssisələrinin inşası burada istehsal olunan məhsulların daxili və xarici bazarlara çıxarılmasına imkan yaradacaq: “Zəngilan rayonunun Ağalı kəndi “Ağıllı kənd” konsepsiyası əsasında yenidən qurulub, burada “Smart village” konsepsiyasının hər üç komponenti - ağıllı dövlət idarəçiliyi, ağıllı infrastruktur və xidmətlər, eyni zamanda, ağıllı təsərrüfat və biznes mühiti yaradılıb. “Ağıllı kənd”ə qayıtmış sakinlər arasında məşğulluğun təmin olunmasında aqrar sahənin payı böyükdür. “Ağıllı kənd” təkcə azad edilmiş ərazilərimizə insanlarımızın Böyük Qayıdışının ilk məntəqəsi deyil. Bu kənd həm də quruculuq işlərində dost dövlətlərlə əməkdaşlığın ilk təməl nöqtəsidir. Təsadüfi deyil ki, işğaldan azad olunmuş torpaqlarda salınmış ilk intensiv bağ - Azərbaycan-Türkiyə Qardaşlıq Bağı “Ağıllı kənd”dədir xarici və yerli sərmayənin cəlb olunduğu ilk aqroparkın əsası bu ərazidə qoyulub”.

TDT-nin baş katibi Bağdad Amreyev bildirib ki, Türkdilli ölkələrin Birgə Sərmayə Fondunun yaradılması üzrə işləri yekunlaşmaq üzrədir: “Noyabrda türkdilli ölkələrin növbəti sammitində prezidentlər səviyyəsində bu fondun rəsmi açılışı olacaq. Fond daha çox orta və kiçik sahibkarlığın təşviqini nəzərdə tutur. Eyni zamanda, fond böyük infrastruktur layihələrini maliyyələşdirəcək. Əsas prioritetlə?dən biri Qarabağ regionu olacaq və bizim iş adamlarımız bu sərmayə fondundan faydalana biləcəklər”. Onun sözlərinə görə, gömrükdə keçidin sadələşdirilməsi ilə bağlı saziş imzalanmaq üzrədir.

Forumda bir sıra sənədlər imzalanıb. Bunlar Qırğızıstanın Ticarət və Sənaye Palatası Şurası və Azərbaycanın Sahibkarlar (İşəgötürənlər) Təşkilatları Milli Konfederasiyası arasında Azərbaycan-Qırğızıstan Biznes Şurasının yaradılması haqqında saziş (1), Özbəkistanın Sahibkarlığın İnkişafı Agentliyi ilə Azərbaycanın İqtisadiyyat Nazirliyi yanında Kiçik və Orta Biznesin İnkişafı Agentliyi (KOBİA) arasında birgə tədbirlərin həyata keçirilməsinə dair Yol Xəritəsi (2), Türkiyənin “Kut Ticarət və Marketinq Məhdud Şirkəti” ilə “Azərbaycan Qadın Sahibkarlığın İnkişafı Assosiasiyası” İctimai Birliyi arasında Anlaşma Memorandumu (3), Türkiyənin “İnmak Şirkətlər Qrupu” ilə “Bakı Tekstil Fabriki” MMC arasında Anlaşma Memorandumudur (4).

Günel ABBASOVA

Paylaş:

Baxılıb: 712 dəfə