Şəhid ailələri və müharibə əlillərinə xüsusi diqqət

Bakı:

12 °C

87 %

3 m/s

Əlaqə

AZ RU EN

Ana səhifə / Xəbər lenti / Şəhid ailələri və müharibə əlillərinə xüsusi diqqət

Şəhid ailələri və müharibə əlillərinə xüsusi diqqət

14.06.2022 [10:27]

Daha 1500 şəhid ailəsi və müharibə əlilinə ev və fərdi mənzil veriləcək

Nicat Dilqəmli

Azərbaycanda şəhid ailələri, müharibə əlilləri, qazilər hər zaman diqqət mərkəzində saxlanılırlar. Prezident İlham Əliyev şəxsən özü müharibə veteranları və qazilər ilə, şəhid ailələri ilə mütəmadi olaraq görüşür, onların qayğıları ilə maraqlanır. 44 günlük Vətən müharibəsi bir daha sübut etdi ki, Azərbaycan xalqı Prezidentinin ətrafında sıx birləşib, Ali Baş Komandanın hər bir çağırışını yüksək səviyyədə yerinə yetirməyə hər an hazırdır. Dövlət başçımızın rəhbərliyi ilə şəhid ailələrinə və müharibə iştirakçılarına mənzillər və avtomobillər hədiyyə edilir, yaşayış şəraitinin daha da yaxşılaşdırılması üçün bütün addımlar atılır. Sadalananlar bu gün də uğurla davam etdirilməkdədir.

Yeri gəlmişkən, ötən gün postmüharibə dövründə şəhid ailələri və müharibə əlillərinin mənzil və avtomobillə, sosial xidmətlərlə təminatı işlərinə dair mətbuat konfransı keçirilib.

Sosial Xidmətlər Agentliyinin sədri Vüqar Behbudov postmüharibə dövründə şəhid ailələri və müharibə əlillərinin mənzil və avtomobillə, sosial xidmətlərlə təminatı işlərinə dair keçirdiyi mətbuat konfransında bildirib ki, 2021-ci ildə 3 min, 44 günlük Vətən müharibəsindən sonra isə 3500 şəhid ailəsi və müharibə əlili mənzil və fərdi evlərlə təmin edilib.

Qeyd olunub ki, Prezident İlham Əliyevin tapşırığına əsasən şəhid ailələri və müharibə əlillərinin mənzil təminatı proqramı 2021-ci ildə 5 dəfə genişlənib və keçən il 3 min mənzilin bu kateqoriyalardan olan şəxslərə verilməsi proqramı icra olunub. Eyni zamanda, Əmək və Əhalinin Sosial Müdafiəsi Nazirliyi tərəfindən ötən dövrdə ümumilikdə 12500-dən çox şəhid ailəsi və müharibə əlilinə mənzil və ya fərdi ev verilib.

Mətbuat konfransında o da diqqətə çatdırılıb ki, dövlət başçısının 25 avqust 2021-ci il tarixli Sərəncamı ilə Vətən Müharibəsi Qəhrəmanlarına və onlardan şəhid olanların ailələrinə də mənzillər verilir. Məlumatda bu il artıq sosial cəhətdən həssas qruplardan olan ailələrə 500-dən çox mənzilin verildiyi deyilib: “Cari il ərzində ümumilikdə 1500 mənzil və fərdi evin verilməsi nəzərdə tutulub”.

Bundan başqa, müharibə əlillərinin avtomobillə təminatı tədbirləri çərçivəsində son 4 ildə də 1450-dək, ümumilikdə ötən dövrdə 7400 müharibə əlili avtomobillə təmin edilib: “Bu il müharibə əlillərinə 50, 44 günlük Vətən müharibəsindən sonra ümumilikdə 200, ümumilikdə ötən dövrdə 7400 avtomobil verilib”.

Daha sonra mətbuat konfransında şəhid ailələrinin və müharibə əlillərinin sağlamlıq şəraitinin yaxşılaşdırılması istiqamətində görülən işlər barədə hesabat verilib. Bildirilib ki, postmüharibə dövründə 450-dən çox şəhid ailəsi və müharibə əlilinə sanatoriya-kurort və müalicə mərkəzlərinə yollayış verilib, 41 nəfər müharibə əlili peşə reabilitasiyasına cəlb olunub, 60 qazi üçün motivasiya düşərgələri təşkil olunub: “Eyni zamanda, həssas əhali qruplarından olan şəxslər üçün Sığınacaq və Sosial Reabilitasiya Müəssisəsinin Görmə qabiliyyəti məhdudluğu olan şəxslər üçün sosial reabilitasiya və bərpa şöbəsində qazilər tibbi, pedaqoji, idman, mədəniyyət və incəsənət, psixoloji, eləcə də digər sosial reabilitasiya xidmətlərinə cəlb ediliblər”.

Paylaş:

Baxılıb: 663 dəfə