İctimai statusunu dərk etməsi vacib olan Delyagin məsuliyyətə cəlb olunacaq

Bakı:

16 °C

67 %

5 m/s

Əlaqə

AZ RU EN

Ana səhifə / Xəbər lenti / İctimai statusunu dərk etməsi vacib olan Delyagin məsuliyyətə cəlb olunacaq

İctimai statusunu dərk etməsi vacib olan Delyagin məsuliyyətə cəlb olunacaq

31.03.2022 [10:00]

Rusiyalı deputat İNTERPOL vasitəsilə beynəlxalq axtarışa verildi

PƏRVİZ

Rusiya Federasiyası Dövlət Dumasının deputatı, Dumanın İqtisadi siyasət üzrə komitəsinin sədr müavini Mixail Delyaginin son günlərdə kütləvi informasiya vasitələrində iki dövlət arasında olan qarşılıqlı fəaliyyətin prinsiplərinə zidd mövqe sərgiləyən çıxışlar etməsi Baş Prokurorluq tərəfindən araşdırılıb. Qurumun Mətbuat xidmətinin məlumatına görə, M.Delyagin 2022-ci il 28 mart tarixində Rusiya Federasiyasının “Rossiya 1” telekanalında yayımlanan verilişdə Azərbaycan Respublikasına qarşı təcavüzkar müharibəni başlamağa açıq çağırışlar edərək ölkəmizin enerji infrastrukturu və neft sənayesinin məhv edilməsi üçün taktiki nüvə silahından istifadə olunması barədə təxribat xarakterli çıxış edərək, sosial media platformasında bu barədə kütləvi sorğu keçirib. Onun əməllərində Azərbaycan Respublikası Cinayət Məcəlləsinin müvafiq maddələrinin tərkib əlamətləri olduğundan 29 mart 2022-ci il tarixdə ibtidai istintaqın aparılması Baş Prokurorluğun İstintaq idarəsinə həvalə olunub.

Məlumatda bildirilir ki, ittiham üçün əsas verən kifayət qədər sübutlar toplandığından 29 mart 2022-ci il tarixdə Mixayıl Delyagin Cinayət Məcəlləsinin qeyd edilən maddələri ilə təqsirləndirilən şəxs qismində cəlb edilərək, məhkəmənin qərarı ilə barəsində həbs qətimkan tədbiri seçilməklə İNTERPOL vasitəsilə beynəlxalq axtarışa elan edilib. Eyni zamanda, bir sıra tərəfdaş dövlətlərin səlahiyyətli orqanlarına təqsirləndirilən şəxsin həmin ölkələrin ərazisinə daxil olduqda dərhal tutularaq istintaqa cəlb edilməsi üçün Azərbaycana verilməsinin təmin edilməsi məqsədilə müraciətlər göndərilib. Hazırda cinayət işi üzrə intensiv istintaq tədbirləri davam etdirilir: “Azərbaycan Respublikasının Baş Prokurorluğu bəyan edir ki, ölkəmizin milli mənafeyi, təhlükəsizliyi və ərazi bütövlüyü əleyhinə yönələn istənilən təxribat xarakterli fəaliyyətlə bağlı qanunla nəzərdə tutulmuş tədbirlərin görülməsi təmin olunacaqdır”.

Məsələ ilə bağlı qəzetimizə açıqlamasında politoloq Qabil Hüseynli bildirib ki, son zamanlar Rusiyada “böyük dövlətçilik şovinizmi” kimi fikirlər peyda olmağa başlayıb. Bu ölkənin bəzi siyasətçiləri bu “ideyaya” dəstək verir. Eləcə də, irqi ayrı-seçkilik məsələləri ilə bağlı təzahürlər də meydana çıxır: “Bundan isə bəzi siyasi məsuliyyətini dərk etməyən adamlar istifadə etməyə çalışır. Bu çox təhlükəli tendensiyadır və Mixail Delyagin də məhz belələrindəndir. Bu baxımdan, Baş prokurorluğun addımını yüksək dəyərləndirirəm. Müstəqil dövlət, onun xalqı haqqında bu cür hədyan fikirləri söyləyən adam mütləq dediklərinin məsuliyyətini daşımalı, cavab verməlidir. Rusiya dumasının deputatı olaraq Mixail Delyagin bu fikirləri səsləndirən zaman özünün ictimai statusunu dərk etməli idi. Sonradan üzr istəsə də, bu heç nəyi dəyişmir. O, mütləq hüquqi məsuliyyətə cəlb edilməlidir. Bu istiqamətdə istintaq hərəkətlərinin başladılması olduqca vacibdir”.

Paylaş:

Baxılıb: 950 dəfə