Zəfərin beşinci baharı: Qələbədən quruculuğa!

Bakı:

6 °C

87 %

5 m/s

Əlaqə

AZ RU EN

Ana səhifə / Xəbər lenti / Zəfərin beşinci baharı: Qələbədən quruculuğa!

Zəfərin beşinci baharı: Qələbədən quruculuğa!

08.11.2025 [09:39]

Tarixin böyük zaman axarında beş il bəlkə bir göz qırpımıdır, amma bizim üçün bu beş ilin içində bir əsrlik dirçəlişin, böyük qayıdışın silinməz izləri var. Çünki düz beş il əvvəl məhz bu günlər Azərbaycan öz xoşbəxt gələcəyinə qapı açdı - ədalətin, haqqın və sarsılmaz suverenliyin qapısı.

Bu gün yaşadığım, fəaliyyət göstərdiyim Xankəndi şəhərinin geniş küçələrində hər addımda həyat eşqi duyulur. Təhsil ocaqlarından çıxıb evlərinə tələsən uşaqların, yeniyetmələrin, gənclərin şən, xoşbəxt səsləri ətrafa yayılır. Qarabağın mərkəzi, Böyük Qayıdışın paytaxtı illər sonra ilk dəfə bu qədər azad və dolğun nəfəs alır.

Beş il öncə bu torpaqlarda yad, boğucu bir sükut hökm sürürdü. Bu gün o sükutu üçrəngli bayrağımızın küləkli havada xoş bir xışıltı ilə dalğalanan zərif səsi pozur. Bu, bizim azadlıq nəğməmizdir.

Xüsusən də Qarabağ Universitetinin həyətində gənclərin gur səsi gələcəyə atılan ən böyük addımdır. Onların universitetə doğru atdığı hər addım Zəfərin ən böyük davamçısıdır. Unutmayaq ki, torpaqlar hərblə azad edilir, amma yalnız elm, bilik və güclü düşüncə ilə qorunur, inkişaf etdirilir.

Azərbaycan bu Zəfərlə sadəcə sərhədlərini bərpa etmədi. O, özünün tarixi iradəsini, milli birliyini və əzəmətli dövlətçilik ruhunu bərpa etdi. Dünya gördü ki, bu xalq təkcə keçmişinin varisi deyil, həm də gələcəyinin qətiyyətli sahibidir. Beş il əvvəl cəbhədə ucalan bayraq indi Xankəndidə, Şuşada, Ağdamda qürurla dalğalanır.

Bu torpaqlarda elm, mədəniyyət və tükənməz yaradıcı ruh hökmrandır. Bu şəhərin küçələrində səslənən Azərbaycan dili - dövlətimizin suverenliyinin ən güclü və danılmaz bəyanıdır. Biz indi bu səslə, bu ruhla yeni bir dirçəliş tarixi yazırıq.

Böyük qələbəmizi yaşadır, ucaldır və gələcəyə ötürürük. Qarabağ artıq sadəcə qələbə torpağı deyil, həm də bərpa, quruculuq, tolerantlıq və birgə yaşama mədəniyyətinin təməl daşının qoyulduğu məkandır.

Bu gün Qarabağda atılan hər təməl daşı, çəkilən hər yol, tikilən hər yeni ev dözümlülüyün və milli qətiyyətin simvoludur. Xankəndidəki tikinti meydançalarından gələn səslər – kranların, yenidənqurma maşınlarının səsləri – keçmişin ağır sükutunu qovaraq, işıqlı gələcəyin musiqisini ifa edir.

Qarabağın iqtisadi damarları yenidən canlanır. Bu torpaqlara qayıdan hər sakin özü ilə bərabər yeni ümid, yeni enerji gətirir. Onlar doğma ocaqlarında yeni bir həyat qurur, Qarabağın zəngin mədəniyyətini yeni dövrə daşıyırlar.

Bu beş il bizə göstərdi ki, güclü dövlət və sarsılmaz xalq birliyi ilə hər cür çətinliyin öhdəsindən gəlmək mümkündür. Zəfərin ardınca gələn bu böyük quruculuq dövrü Azərbaycanın sülhə, sabitliyə və regionun inkişafına olan qətiyyətli sadiqliyini nümayiş etdirir. Xankəndi indi regional tərəqqinin, dialoqun və qonşuluq münasibətlərinin inkişaf etdiyi bir mərkəzə çevrilir.

Bizim beşinci baharımız – daim yüksəlişin, inkişafın və əbədi qayıdışın rəmzidir. Bu, Azərbaycanın öz tarixi taleyinin sahibi kimi tam təsdiqləndiyi, haqqın və ədalətin bərqərar olduğu bir dövrdür. Qarabağ bu gün bütün Azərbaycanın ürəyində döyünən, milli birliyimizin və suverenliyimizin sarsılmaz qalasıdır!

Günel Abbas

Paylaş:

Baxılıb: 484 dəfə